VOV4.Êđê - Aguah mbruê 18/10, ti sang bruă Khua lăn čar, Khua lăn čar Nguyễn Xuân Phúc tŭ drông leh Khua phŭn bruă hŏng tač êngao Dhŭng Korea Park Jin klă klơ̆ng hriê čuă Việt Nam ƀri wưng bi hdơr 30 thŭn mkŏ mjing klei mjĕ giăm plah wah 2 ala čar. Khua lăn čar Nguyễn Xuân Phúc bi mni kơ Khua phŭn bruă hriê čuă ala čar Việt Nam, ala čar Ngŏ Dhŭng Asi tal êlâo, leh đĭ păn bruă, mbĭt anăn mñă klă Đảng, knŭk kna leh anăn mnuih ƀuôn sang Việt Nam hmăng hmưi mđĭ klei mjĕ giăm Việt Nam – Dhŭng Korea hŏng klei đăo knang hĭn.

Khua lăn čar mñă klă, Việt Nam jing anôk jưh jơ̆ng êđăp ênang, hơĭt kjăp leh anăn mkŏ mjing klei găl kơ dŭm knơ̆ng bruă mơ̆ng Dhŭng Korea mâo klei hơĭt duh bi liê wưng sui. 2 tĭng ăt čiăng gĭr mâo hnơ̆ng mnia mblei 100 êklai USD ti thŭn êdei leh anăn ti thŭn 2030 hluê êlan bi kna, hlăm anăn Dhŭng Korea mđĭ hĭn klei blei mnia mnơ̆ng dhơ̆ng mơ̆ng Việt Nam. Khua phŭn bruă hŏng tač êngao Park Jin mâo klei bi juh ti anăp dŭm klei luč liê mơ̆ng mnuih ƀuôn sang Việt Nam kyua klei angĭn êbŭ, êa lêč, mbĭt anăn lŏ mñă klă Dhŭng Korea dlăng kơ Việt Nam jing ƀĭng hgŭm bi mguôp kơ klei đru mđĭ kyar ODA.

VOV/Pô mblang: Y-Bel