Tlam mbrue 19/7, ti Knơ̆ng bruă sang čư̆ êa kdriêk Côn Đảo, Khua lăn čar Võ Văn Thưởng bi tuôm leh hŏng phung bi ala Êpul mjĕ êrô kahan cách mạng Việt Nam tuôm hŏng klei phung roh krư̆ kđăl, lehanăn 76 čô jing mnă bruă kđĭ čar Côn Đảo bi ala brei kơ êbeh 5 êbâo čô knuă druh, kahan cách mạng tuôm hŏng klei phung roh krư̆ kđăl, čiăng čuă êmuh mđĭ ai, lehanăn čih pioh dŭm ai tiê klei săn asei mlei prŏng prĭn mơ̆ng phung lĭng kahan cách mạng, phung jhŏng ktang djiê êngiă lehanăn jih jang mnuih ƀuôn sang thâo khăp kơ lăn čar, kyua klei êngiê kơ lăn čar.

Ti anôk bi tuôm, phung bi ala lŏ bi hdơr hrue mlan dleh dlan mơ̆ng phung lĭng kahan cách mạng hur har jih ai tiê, tŭ klei roh čăm biêng thiêng knuă, tuh luh klang êrah, ƀiădah ăt păn kjăp ai tiê cách mạng. Leh lu thŭn lŏ wĭt kơ Côn Đảo, lu phung mnă bruă kđi čar êlâo dih bi êdah klei hơ̆k mơak ƀuh klei bi mlih anôk pô tuôm găn leh yap jing msĕ si ƀuôn phung djiê, jing anôk knŏng boh tâo, kyâo krô, rơ̆k êruê khăng hlăk anăn jiă leh hŏng klang êrah mơ̆ng lĭng kahan   cách mạng jhŏng kmlăn. Blŭ hrăm ti anôk bi tuôm, Khua lăn čar Võ Văn Thưởng mâo klei čua êmuh, bi êdah ai tiê prŏng prĭn, klei thâo knga truh hŏng phung mnă bruă kđi čar Côn Đảo; brei thâo hlăm dŭm thŭn êgao, Đảng, Knŭk kna mâo nanao klei mđing čuă êmuh mđĭ ai hŏng êbeh 9 êklăk čô mnuih mâo bruă tŭ dưn, lŏ dơ̆ng ngă dŭm bruă hdơr knga tla ai, boh nik kuai duah klang kleh phung djiê êngiă, lŏ mkra wĭt bi msiam kbut msat, kñăm bi êdah ai tiê thâo hdơr knga.

Ăt tlam hrue, Khua lăn čar nao čuă leh sang kriê pioh Côn Đảo lehanăn knhuah gru sang mnă Phú Hải.