VOV4.Êđê- Aguah mbruê, Thượng tướng Trần Quang Phương, K’iăng khua anôk bruă kƀĭn ala bi tuôm leh hŏng phung knuă druh, mnuih mă bruă ti Anôk bruă Kar êa pui Bình Sơn (Quảng Ngãi). Ti knăm anei, lu phung bi ala ti anôk bruă hưn mthâo leh klei dleh kpăk ti Wăl duh mkra Dung Quất hlăk amâo mâo ôh hdră duh bi liê mđĭ kyar anôk bruă kar êa pui tinei. Truh ară anei, knŭk kna ka mâo ôh hdră duh bi liê phŭn kñăm mjing sa êpul kar êa pui kjăp djăp hnơ̆ng čuăn ala čar khădah mâo leh Sang maĭ kar êa pui Dung Quất.

K’iăng khua anôk bruă kƀĭn ala Trần Quang Phương bi tuôm hŏng mnuih ƀuôn sang ti Quảng Ngãi

Lu phung bi ala ăt lač kơ klei mâo lu mnuih mă bruă ti Wăl duh mkra Dung Quất lehanăn Sang maĭ kar êa pui Dung Quất kƀah sang dôk kơ mnuih mă bruă. K’iăng khua anôk bruă kƀĭn ala Trần Quang Phương čih yap dŭm klei blŭ đru mguôp mơ̆ng phung bi ala lehanăn brei thâo hdră bi tuôm anei yuôm bhăn êdi čiăng kơ anôk bruă djŏ tuôm thâo klă klei čiăng mơ̆ng mnuih ƀuôn sang kñăm hưn mdah ti Klei bi kƀĭn tal 4, Anôk bruă kƀĭn ala gưl XV./.

VOV/Pô mblang H’Nêč