Hlăm klei bi tuôm, K’iăng Khua knŭk kna Bùi Thanh Sơn mñă klă Việt Nam dlăng kơ klei mđĭ kyar klei mjĕ giăm hŏng China, yap yuôm bhăn mklei đĭ kyar leh anăn dŭm boh tŭ dưn dưi mâo mơ̆ng klei mjĕ giăm dua Đảng, dua lăn čar hlăm wưng êgao.

K’iăng Khua lăn čar China Hàn Chính bi mni kơ k’iăng Khua knŭk kna Bùi Thanh Sơn nao čuă China, hrăm mbĭt gĭt gai klei kƀĭn tal 16 dhar bruă bi mguôp dua tĭng, mñă klă China dlăng yuôm bhăn klei bi hguôm hdră êlan kluôm dhuôm, êpul êya bi kah mbha kơ êdei anăp hŏng Việt Nam, dlăng anei jing hdră êlan mđing tal êlâo hlăm bruă hŏng tač êngao mơ̆ng China, sa ai hŏng Việt Nam hlăm klei mlih mrâo, bi mrâo mrang lăn čar, mkŏ mjing tŭ jing yang ƀuôn ngă phŭn. Hlăm wưng kơ anăp, dua tĭng tŭ ư mđĭ hĭn klei gĭt gai dŭm gưl bruă, dhar bruă, dŭm alŭ wăl dua lăn čar bi mguôp kjăp, hur har ngă dŭm klei kuôl kă leh anăn klei thâo săng mbĭt, đru bi êlam hĭn klei mjĕ giăm bi hgŭm kluôm dhuôm, êpul êya bi kah mbha êdei anăp Việt Nam – China mâo boh tŭ dưn hdră êlan.