VOV4.Êđê -  Tlam 18/10, K’iăng Khua knŭk kna Lê Văn Thành nao ksiêm dlăng bruă msir mgaih boh jhat kyua êa lip ti čar Quảng Trị. K’iăng Khua knŭk kna nao ksiêm dlăng, gĭt gai hdră msir klưh hroh lăn, ngă gun kpăk kjham ti êlan dơ̆ng prŏng ala čar 15D nao ti ƀăng jang knông lăn La Lay, kdrêč găn să A Ngo, kdriêk Đak Krông.

K’iăng Khua Knŭk kna Lê Văn Thành gĭt gai čar Quảng Trị leh anăn dŭm anôk bruă djŏ tuôm mjêč msir mgaih, pral pŏk ngă rŭ mdơ̆ng êlan êjai, mâo êlan kơ êdeh găn êrô nao ti ƀăng jang knông lăn La Lay. K’iăng Khua knŭk kna ăt lač klă, anei jing êlan nao ti ƀăng jang Knông lăn La Lay, êdeh êdâo hnơ̆ng prŏng găn êrô, kyua anăn bruă mkra êlan êjai amâodah lŏ mkra êlan phŭn ăt brei rơ̆ng hnơ̆ng jăk. Leh êdeh êdâo lŏ dưi găn êrô snăn brei rơ̆ng bi jăk, wăt tơdah êlan klông êjai ăt kăn dưi ruăt mơh, amâo djŏ ôh kyua klei čiăng mâo êlan kơ êdeh găn êrô rŭ mdơ̆ng luič êđăp ênang ngă mâo klei amâo jăk./.

VOV/Pô mblang: H’Zawut