Hluê si klei đăo knăl, tlam hruê 17, aguah hruê 18/7, angĭn êbŭ mrô 1 srăng truh kơ lăn hang ala čar drei. Anei jing angĭn êbŭ ktang hlăm wưng 5 thŭn hŏng anei. Bi mdrơ̆ng hŏng angĭ êbŭ, 12 mmông yang hruê dơ̆ng hruê mbruê, dŭm čar Quảng Ninh, Nam Định ngă asăp mtrŭn kăm amâo mâo nao hlăm êa ksĭ, mbĭt anăn mdei jih bruă dŭ mdiăng, drông tuê ti dŭm anôk hiu čhưn ênguê. Ksiêm dlăng dŭm alŭ wăl arưp aram leh anăn dŭm war rông kan hdang mơ̆ng dŭm alŭ wăl, mĭn tĭng srăng mâo 30.000 čô mnuih čiăng mbĕ mđuĕ truh kơ anôk êđăp ênang.

Êpul lĭng kahan wăl kahan mrô 3, wăl kahan mrô 4 dôk kñăm đru kơ mnuih ƀuôn sang bi dră kjăp pưk sang, mđuĕ war rông kan hdang, hâo hưn kơ hô̆ pui, kŭm păn wĭt ti anôk êđăp ênang leh anăn dăp anôk kă hô̆ pui, kŭm păn. Bi klă hlăm klei kƀĭn, k’iăng Khua knŭk kna Trần Lưu Quang čih yap klei čŏng pô mơ̆ng dŭm alŭ wăl hlăm bruă bi mdrơ̆ng hŏng angĭn êbŭ, mbĭt anăn mtă kơ dŭm Phŭn, dhar bruă leh anăn alŭ wăl amâo dưi ngă ngơi mang, hluê ngă jăk asăp mtrŭn mơ̆ng Khua knŭk kna hlăm bruă bi mdrơ̆ng hŏng angĭn êbŭ mrô 1.