Lŏ dơ̆ng hdră bi tuôm leh anăn bi mguôp mnuih ƀuôn sang Việt Nam – Campuchia gưl tal 5, tlam mbruê 7/11, Ti čar Dak Nông mkŏ mjing leh hdră bi tuôm, mjĕ êrô plah wah Êpul bi ala 2 ala čar Việt Nam – Campuchia hŏng phung lĭng kahan hđăp, phung thơ̆ng kơ bruă hđăp, lĭng kahan knông lăn leh anăn hđeh êdam êra čar Dak Nông.

Nao hlăm hdră, tĭng Capuchia mâo Vann Phal, pô đru kčĕ bruă kơ Khua knŭk kna Hun Sen, K’iăng khua kiă kriê Êpul hgŭm Campuchia – Việt Nam jing khua êpul, mbĭt hŏng phung bi ala dŭm gưl bruă, dhar bruă, dŭm alŭ wăl. Hlăm mmông bi tuôm, pô bi ala hđeh êdam êra nao hlăm klei bi tuôm, amai H’Hồng, k’iăng khua bruă hđeh êdam êra čar Dak Nông bi êdah klei hdơr knga, mpŭ kơ dŭm klei săn asei mơ̆ng phung ayŏng ama kyua klei êngiê, leh anăn mkŏ mjing klei bi mguôp plah wah 2 ala čar Việt Nam – Campuchia. Phung hđeh êdam êra čar Dak Nông leh anăn phung hđeh êdam êra 2 ala čar srăng hrăm mbĭt ksul mbŏ, mđĭ klei klei bi mguôp anei.