Aguah mbruê 16/11, ti anôk bruă Đảng gưl dlông, ti gŭ klei gĭt gai mơ̆ng Khua gĭt gai Đảng Nguyễn Phú Trọng, Phŭn bruă kđi čar, Êpul khua bruă Đảng mkŏ mjing klei kƀĭn kluôm ala kơ bruă hyuă kjăp leh anăn hluê ngă hdră mtrŭn mrô 26 mơ̆ng Phŭn bruă kđi čar kơ hdră êlan mđĭ kyar bruă duh mkra ala ƀuôn, rơ̆ng klei êđăp ênang, mđĭ kyar krĭng Dưr kwar krah leh anăn krĭng kwar krah truh ti thŭn 2030, tă hdră truh ti thŭn 2045 hŏng êlan online leh anăn klă anăp mkŏ mơ̆ng ƀuôn prŏng phŭn Hà Nội hŏng dŭm anôk bi kƀĭn gưl čar, kdriêk leh anăn nah gŭ.

Blŭ gĭt gai klei kƀĭn trông, Khua gĭt gai Đảng Nguyễn Phú Trọng mñă ktang, klei mĭn, klei gĭt gai mơ̆ng hdră mtrŭn anei srăng djŏ guôp hŏng hdră êlan mđĭ kyar bruă duh mkra ala ƀuôn, hdră êlan mđĭ kyar kjăp, đĭ kyar mtah ala čar leh anăn hdră êlan đĭ kyar kjăp bruă duh mkra êa ksĭ Việt Nam. Mđĭ kyar ktang kơ êa ksĭ, mdrŏng mơ̆ng êa ksĭ hluê si tur knơ̆ng bi lar ktang hĭn klei găl, bih nik jing klei găl êa ksĭ, mđĭ kyar leh anăn mđĭ boh tŭ dưn dŭm anôk bruă mkŏ mkra dôk mâo, dŭm anôk bruă duh mkra ktuê hang ksĭ, anôk bruă tuh tia, ƀuôn prŏng ktuê hang ksĭ, dŭm êlan bruă duh mkra, anôk đĭ kyar, dŭm krĭng knơ̆ng leh anăn krĭng boh kdrŭt, dŭm dhar bruă duh mkra êa ksĭ.