VOV4.Êđê - Leh 2 hruê mă bruă, aguah mbruê, Klei kƀĭn phung bi ala bruă Đoàn êdam êra Cộng sản Hồ Chí Minh čar Gia Lai tal XV wưng thŭn 2022 – 2027 tŭ jing jăk siam. Klei kƀĭn bi mklă leh hnơ̆ng čuăn wưng thŭn 2022-2027. Hlăm anăn, grăp thŭn, 100% knuă druh Đoàn, đoàn viên, 80% ênoh êdam êra dưi hriăm, mtô mblang kơ Hdră êlan mtrŭn mơ̆ng Đảng, hdră bhiăn mơ̆ng knŭk kna lehanăn Klei klah čŭn mơ̆ng bruă Đoàn gưl dlông. Mđĭ lar gru mngač, klei yăl dliê jăk siam hlăm bruă tui hriăm lehanăn hluê ngă klei mĭn, knhuah hdĭp, knhuah mă bruă Hồ Chí Minh.

Grăp thŭn, pla mrâo ƀiă êdi 300.000 phŭn ana kyâo mtah. Bi hgŭm mkŏ mjing hdră đru kčĕ kơ bruă kơ êbeh 40 êbâo čô êdam êra mnuih djuê ƀiă, hưn mthâo bruă mă kơ 20 êbâo čô êdam êra… Klei kƀĭn ruah leh Anôk kiă kriê bruă Đoàn čar Gia Lai gưl XV mâo 40 čô, Phung bi ala ăt ruah 11 čô bi ala nao ti Klei bi kƀĭn phung bi ala bruă Đoàn êdam êra Cộng sản Hồ Chí Minh kluôm ala tal XII, wưng thŭn 2022-2027.

VOV TâyNguyên/ Pô mblang: H’Nêč Êñuôl