Să krĭng čư̆ čhiăng A Vương jing 1 hlăm 3 anôk mkŏ mjing klei ksiêm mkă, mbha êa drao amâo mă prăk kơ mnuih ƀuôn sang ƀun. Sui hŏng anei dŭm mlan, krĭng čư̆ čhiăng anei êa lip ngă bi ktlah hjăn, klei hdĭp bŏ hŏng dleh dlan. Mơ̆ng aguah ưm, dŭm êtuh čô mnuih ƀuôn sang ƀun Cơ Tu nao leh ti anôk bruă Knơ̆ng bruă sang čư̆ êa să čiăng mă mnơ̆ng leh anăn ksiêm mkă klei ruă, mă êa drao amâo mă prăk. Phung kkhua mduôn, hđeh điêt, phung mniê mâo phung aê mdrao dŭm sang êa drao anôk knhal tuč ƀuôn prŏng Đà Nẵng ksiêm mkă klei ruă msĕ si: hnơ̆ng êrah đĭ, klei ruă hlăm tian, êlan bi êwa, klang, ală… mnuih ƀuôn sang hmư̆ klei kčĕ, mă êa drao amâo liê prăk čiăng mdrao klei ruă leh anăn mđĭ klei suaih pral. Amai A Lăng Thị Hiềm, ti alŭ Ta Lang, să A Vương ƀuh mđao ai tiê:

“Hmei mni lač jăk kơ êpul nao mđup brei mnơ̆ng kơ jih jang mnuih ƀuôn sang tinei. Mâo êpul ksiêm mkă, mnuih ƀuôn sang tinei mơak snăk dưi drông Tết hơuh mđao”.

 Hgŭm hlăm hdră anei mâo êbeh 100 čô aê mdrao thơ̆ng kơ bruă, Khua, K’iăng Khua dŭm sang êa drao gưl knhal tuč tu Đà Nẵng; Khua, K’iăng KKhua anôk mdrao hlăm Sang êa drao Đà Nẵng, Sang êa drao mdrao biăm Đà Nẵng, Sang êa drao kơ phung amĭ kkiêng anak, hđeh mrâo kkiêng, Sang êa drao ală Đà Nẵng, Sang êa drao ksŏ, Sang êa drao kahan 17, Sang êa drao C, Êpul hgŭm phung aê mdrao mda asei ƀuôn prŏng Đà Nẵng leh anăn dŭm Anôk mdrao mgŭn krĭng wăl

Nao hlăm hdră anei, dŭm sang êa drao ti Đà Nẵng tiŏ nao leh phung aê mdrao mbruă, mâo lu klei thâo ba wăt masin, kdrăp mnơ̆ng mdrao mgŭn leh anăn kdrăp mrâo msĕ si masin ksiêm dlăng, masin dlăng kboh, masin mă rup X.Quang êrô hiu… Boh nik, Anôk bruă kahan 5 leh anăn dŭm sang êa drao hgŭm hlăm hdră anei đru leh êbeh 1000 êa drao, 300 hlâo ală kĭng dlăng kbưi leh anăn giê ală kĭng čiăng mbha kơ mnuih ƀuôn sang. Aê mdrao Phạm Minh Huy,  K’iăng Khua Anôk mdrao anôk êka sang êa drao Đà Nẵng ƀuh mđao ai tiê leh hgŭm hlăm bruă yuôm bhăn anei:

“VOV kwar krah leh anăn êpul hgŭm phung aê mdrao mda asei ƀuôn prŏng Đà Nẵng bi mguôp hŏng jih jang sang êa drao hlăm kluôm ƀuôn prŏng Đà Nẵng mkŏ mjing hdră “Mđup brei mnơ̆ng Tết Bính Ngọ 2026-Bi mguôp Đà Nẵng, lar bra klei khăp” jing yuôm bhăn snăk. Hmei srăng hrăm mbĭt hŏng hdră čiăng mâo klei lar bra mkăn”.

 Hlăm hdră anei, Anôk mkŏ mjing mđup brei leh 1.300 hnư mnơ̆ng, grăp hnư 600 êbâo prăk kơ mnuih ƀuôn sang dleh dlan ti dŭm să knông lăn Hùng Sơn, A Vương, mnuih mă bruă mâo klei hdĭp dleh dlan dôk mă bruă ti Wăl kdrăp mrâo leh anăn dŭm wăl tuh tia mkra mjing Đà Nẵng. Knơ̆ng hlăm sa hruê, Hdră ksiêm mkă leh klei ruă, mbha êa drao amâo mă prăk kơ 600 čô mnuih ƀuôn sang ƀun ti să A Vương; 500 čô mnuih mă bruă mâo klei hdĭp dleh dlan ti wăl tuh tia mkra mjing mrâo mrang leh anăn dŭm wăl tuh tia mkra mjing Đà Nẵng; ksiêm mkă kơ kboh kơ 500 čô hđeh sang hră hđeh điêt, gưl sa ti sang hră gưl sa Ba Lế, să A Vương, ƀuôn prŏng Đà Nẵng. Ênoh mnơ̆ng dhơ̆ng mđup brei hlăm hdră anei hlăm brô 1,5 êklai prăk.