Ti wăl dliê mrô 251, să Ea Bŭng, kdriêk Ea Sŭp, bi lĭr hŏng êlan dơ̆ng mrô 14C, bi knông hŏng Dliê knŭk kna mkuôm Yŏk Đôn, lu ana kyâo dliê mâo boh prŏng mơ̆ng 10 – 40 cm, dlông mơ̆ng 3 – 4 m arăng druôm êbuh, buč wăt agha, bi kƀĭn mklin jing dŭm kăm. Ti ênhă lăn dliê arăng bi rai, dŭm pluh ha dưi pla ana Agaci pluă mbĭt hŏng ktơr. Nguyễn Thanh Hồng, dôk ti să Ea Bŭng, kdriêk Ea Sŭp, sa čô hgŭm hluê ngă hdră brei thâo, dliê arăng bi rai hlăm wăl dliê mrô 251, mơ̆ng aduôn Trịnh Thị Hương, ară anei jing khua khua kiă kriê knơ̆ng bruă pla dliê 27/7 kriê dlăng. Kluôm ênhă dliê mâo klei rai hlăm brô 100ha. Nguyễn Thanh Hồng brei thâo:

“Mlan 7 thŭn 2021, aduôn Hương brei mnuih leh anăn êdêh êdâo mŭt čuk hli 40 ha dliê, leh anăn truh ti mlan 5 thŭn 2022 ñu lŏ brei arăng mŭt čuk hli 60 ha. Kluôm ênhă dliê bi rai hlăm 2 thŭn êgao jing 100ha. Mrâo anei, êpul ksiêm dlăng lu dhar bruă hriê dlăng leh, ƀiădah ka mâo ôh klei wĭt lač kơ phung hgŭm hlăm knơ̆ng bruă hmei.

Dŭm êtuh ha dliê mâo Knơ̆ng bruă pla dliê 27/27 bi rai hĕ pla ana akasi

Hdră mkra mlih, răng mgang leh anăn mđĭ kyar dliê mâo bruă sang čư êa čar Dak Lak tŭ ư jao kơ knơ̆ng bruă tuh tia mnia mblei pla dliê 27/7 hluê ngă hŏng hdră mtrŭn mrô 2959, hlăk mlan 11 thŭn 2010. Kluôm ênhă lăn dliê hluê ngă hdră anei jing 783,4 ha, ti wăl dliê mrô 251, să Ea Bŭng, kdriêk Ea Sŭp. Mta kñăm mơ̆ng hdră anei jing mđĭ kyar dliê leh anăn mkra mjing bruă lŏ hma – dliê kmrơ̆ng bi mguôp. Pô bi ala hluê si klei bhiăn ala čar leh anăn khua kiă kriê knơ̆ng bruă êlâo dih jing Nguyễn Văn Quê, dôk ti čar Tây Ninh, truh ti thŭn 2017 lŏ mlih hĕ, jao kơ aduôn Trịnh Thị Hương, dôk ti čar Đồng Nai.

Lu ana kyâo dliê mâo boh prŏng 30-40 cm, dlông 3-4 m arăng koh druôm

Hluê si Nguyễn Ngọc Luật – k’iăng khua bruă sang čư êa să Ea Bŭng, hruê mmông êgao anôk bruă djŏ tuôm mâo klei hưn mơ̆ng mnuih ƀuôn sang leh anăn phung hgŭm hlăm knơ̆ng bruă tuh tia mnia mblei pla dliê 27/7 hluê ngă hdră mâo lu klei ngă soh. Să bi mguôp leh hŏng anôk bruă kriê dlăng dliê kdriêk Ea Sŭp mbĭt hŏng dŭm adŭ bruă thơ̆ng kơ bruă  hlăm kdriêk mkŏ mjing êpul ksiêm dlăng. Hlăm klei ksiêm dlăng, êpul hmao ƀuh bruă kriê dlăng, răng mgang dliê, pla dliê leh anăn ngă bruă lŏ hma bi mguôp hŏng dliê kmrơ̆ng mơ̆ng knơ̆ng bruă anei soh hŏng hdră êlan mơ̆ng bruă sang čư êa čar Dak Lak bi klă. Boh nik, mâo leh êbeh 326 hlăm 783 ha dliê mâo klei rai, pla dŭm pluh ha kyâo mrâo ti ênhă dliê hrông, ngă klei hưn mdah amâo mâo djŏ hŏng boh sĭt hlăm dliê mơ̆ng Anôk bruă kriê dlăng dliê kdriêk Ea Sŭp.  

Knhal jih mlan 9 mrâo êgao, să mâo klei bi mguôp hŏng Anôk bruă kriê dlăng dliê kdriêk Ea Sŭp ngă klei ksiêm dlăng. Hlăm klei ksiêm dlăng, ênhă čuk hli hlăm hdră mđĭ kyar dliê hŏng klei kjăp, leh anăn knơ̆ng bruă diñu pla leh giam 62 ha ana Agaci ti ênhă anăn. Hluê si klei bhiăn, diñu amâo mâo dưi pla ti ênhă lăn dliê anăn ôh. Hruê mmông kơ anăp, să srăng lŏ mñă kơ dŭm anôk bruă djŏ tuôm leh anăn thơ̆ng kơ bruă mâo klei dưi ƀuah mkra ktang phĭt boh klei anei.”

Arăng pla ana akasi ksĭng mmiă ti lăn dliê hrông

Nguyễn Như Hoàng, Khua kiă kriê anôk bruă kriê dlăng dliê kdriêk Ea Sŭp brei thâo, hlăm hdră mkra mlih, răng mgang leh anăn mđĭ kyar dliê mơ̆ng knơ̆ng bruă pla dliê 27/7 ti să Ea Bŭng, amâo djŏ knŏng soh hlăm bruă kriê dlăng, răng mgang dliê, čuk hli, mkŏ mkra, bi rai dliê soh hŏng hdră bhiăn čiăng pla ana pla mjing bruă lŏ hma, ƀiădah lŏ mâo klei soh hlăm bruă ba jao lăn dliê. Dŭm klei ngă soh anei jing kjham êdi, ƀiădah bruă klam ƀuah mkra jing mơ̆ng gưl bruă nah dlông, kyuanăn, anôk bruă kriê dlăng dliê ngă leh hră hưn mdah čiăng ƀuah mkra phung djŏ tuôm. Nguyễn Như Hoàng lač:

“Anôk bruă kriê dlăng dliê kdriêk mâo leh klei mñă kơ anôk bruă kriê dlăng dliê čar Dak Lak, brei knơ̆ng bruă tuh tia mnia mblei pla dliê 27/7 srăng hlăk mblang leh anăn bi klă phŭn agha ya ngă êbeh 326 ha dliê rai hĕ leh anăn bruă awăt êdu hlăm klei kriê dlăng, răng mgang dliê. Ngă bruă ksiêm dlăng kluôm hdră mkăp čiăng bi klă bruă klam mơ̆ng Êpul khua kiă kriê hđăp leh anăn mrâo ăt msĕ hŏng phung djŏ tuôm mkăn. Hưn mdah hŏng bruă sang čư êa kdriêk mñă kơ kahan ksiêm kdriêk Ea Sup tŭ mă hră mơar čiăng ƀuah mkra ktang phĭt djŏ hŏng klei bhiăn ala čar.”

Ti kdriêk Ea Sŭp, čar Dak Lak mâo 26 hdră jao dliê, brei mưn dliê, lông ngă hdră bruă lŏ hma dliê kmrơ̆ng bi mguôp, kluôm ênhă giăm 20.000 ha. Ƀiădah, leh êbeh 10 thŭn hluê ngă, lu hdră amâo mâo boh tŭ dưn, lui mâo klei bi rai dliê, plah mmiă lăn dliê. Hlăm anăn mâo wăt bruă ba jao hdră hdră, čuk hli lăn dliê čiăng pla mnơ̆ng ƀơ̆ng, boh mnga, ana sui thŭn, mâo đa đa truh kơ mbha čuê, mbha anôk, čhĭ lăn dliê.