Khua gĭt gai knŭk kna mñă ktang, êgao hŏng anei sa thŭn, hlăk hruê 11/10/2021, knŭk kna ba mdah hdră mtrŭn mrô 128 kơ klei hdĭp djŏ guôp, hŏng klei mbruă, ksiêm dlăng mâo boh tŭ dưn klei ruă tưp Covid-19. Truh kơ ară anei, ksiêm wĭt 10 mlan êgao, mâo leh klei mdê, klei mlih mrâo mkă hŏng mmông mkŏ mjing hdră êlan kơ thŭn 2022 ka thâo klă jih ôh.

Knŭk kna kƀĭn klei kƀĭn grăp tuôr anei kñăm ksiêm wĭt boh sĭt bruă duh mkra ala ƀuôn mlan 10 leh anăn 10 mlan thŭn 2022, kñăm mă klei hriăm, ba mdah mta kñăm, klei mĭn gĭt gai mơ̆ng ară anei truh kơ knhal jih thŭn 2022, rơ̆ng kơ mta kñăm mâo leh hluê si klei gĭt gai mơ̆ng gưl dlông, phŭn bruă kđi čar hŏng bruă duh mkra ala ƀuôn hlăm ala čar. Khua knŭk kna hmăng hmưi jih jang phung khua êmua hlăm knŭk kna srăng kñăm jih klei mĭn, klei hriăm, đru mguôp hlăm klei hưn mdah, bi klă, ksiêm wĭt dŭm mta kñăm, bruă klam, hdră êlan djŏ guôp, mbĭt anăn bi klă hdră mtrŭn klei kƀĭn čiăng gĭt gai, ksiêm dlăng hlăm mlan 11 leh anăn 12, mjưh ruê̆ thŭn 2022 tŭ jing, dưi mâo dŭm mta kñăm ba mdah leh.