Hlue si klei hâo hưn mơ̆ng Knơ̆ng bruă Sang hră mtô bi hriăm čar Kon Tum brei ƀuh, hŏng dŭm gưl sang hră hđeh điêt ară anei čar adôk kƀah êbeh 700 čô nai mtô, gưl sa kƀah 477 čô, gưl 2 kƀah giăm 500 čô leh anăn gưl 3 kƀah 43 čô. Čiăng msir mgaih klei kƀah nai mtô, bruă sang hră mtô bi hriăm čar Kon Tum mkŏ dăp, bi mŭt dŭm sang hră hđeh điêt, sang hră gưl 1 - 3 mâo hnơ̆ng điêt; mbha, dăp êpul knuă druh kriê dlăng, nai mtô ti grăp kdriêk, msir mgaih klei kƀah ti dŭm alŭ wăl, mbha, dăp nai mtô gưl 3 mtô bi hriăm hlăm sang hră gưl 2 dŭm mta klei hriăm, nai mtô gưl 2 mtô dŭm mta klei hriăm ti gưl sa. Thái Khắc Hoà, Khua adŭ bruă sang hră mtô bi hriăm ƀuôn prŏng Kon Tum brei thâo, kluôm ƀuôn prŏng kƀah giăm 160 čô nai mtô, anăn hdră msir jing: “Lŏ dăp adŭ čiăng dăp phung nai mtô rơ̆ng djŏ guôp ti dŭm boh sang hră. Dăp bi mŭt anôk đ’điêt wĭt kơ anôk phŭn snăn bi mŭt leh 7 anôk hlăm anăn mâo 2 anôk mtô hđeh điêt leh anăn 5 bĭt sang hră gưl 1. Hlue ngă klei ba nai mơ̆ng sang hră êbeh nao ti sang hră kƀah čiăng dăp bi djŏ guôp klei hriăm plah wah dŭm sang hră. Hŏng dŭm mta klei hriăm dôk kƀah msĕ si klei hriăm Tin Học, klei Ăngle gưl sa dhar bruă dăp phung nai mtô mlir sang hră. Êngao anăn, dăp leh phung nai mtô Tin học, klei Ăngle gưl dua bi hriăm Tin học, klei Ăngle ti gưl sa.”

Ti Gia Lai, ară anei ăt adôk kƀah êbeh 3700 čô nai mtô bi hriăm. Phạm Văn Đại -  Khua adŭ bruă sang hră mtô bi hriăm kdriêk Ia Grai brei thâo, ară anei adôk kƀah giăm 300 čô nai mtô. Hlue ngă klei kčah mơ̆ng Hdră mtô bi hriăm gưl 3 thŭn 2018, thŭn hriăm 2022-2023 srăng jing thŭn tal êlâo klei hriăm Ăngle leh anăn tin học jing klei hriăm mgô̆ mơ̆ng adŭ 3 ti gưl sa, hrô kơ čŏng ruah msĕ si êlâo dih. Boh sĭt anei ngă kơ kdriêk hlăk kƀah lu nai mtô lŏ dơ̆ng tuôm hŏng lu klei dleh dlan sĭt ka dưi mâo djăp ênoh nai mtô 2 klei hriăm anei. “Ară anei klei dleh dlan bruă sang hră mtô bi hriăm kdriêk Ia Giai jing hlue ngă hdră hdruôm hră mtô mrâo hŏng klei hriăm Ăngle adŭ 2 leh anăn tin học adŭ 3 ară anei kƀah lu. Hŏng ênoh nai mtô Ăngle adôk kƀah hlăm sa sang hră snăn 5 boh sang hră ka mâo ôh nai mtô Ăngle leh anăn 8 boh sang hră ka mâo ôh nai mtô Tin học anăn dleh dlan snăk”

Nguyễn Đình Thức -  Khua adŭ bruă sang hră mtô bi hriăm ƀuôn prŏng Pleiku, alŭ wăl adôk kƀah hlăm brô 600 čô nai mtô. Čiăng rơ̆ng hnơ̆ng jăk mtô leh anăn hriăm, bruă sang hră kƀĭn mđing kơ hdră dăp, hơĭt êpul nai mtô ti dŭm sang hră. Mbĭt anăn, mơ̆ng ênoh phung nai leh mâo, pral ngă hră bi kuôl kă hŏng phung nai mtô, phung mă bruă adôk kƀah. “Adŭ bruă mă leh bruă hŏng dŭm sang hră čiăng lŏ ktuê dlăng sang hră adŭ hriăm leh anăn dăp nai mtô ti dŭm sang hră. Ti anăp klei kƀah nai mtô lu msĕ snăn bi trông leh hŏng dŭm sang hră lŏ dăp adŭ hriăm, bi mguôp sang hră adŭ hriăm jih hnơ̆ng čiăng mkiêt mkriêm phung nai mtô hlăm klei dưi ngă. Adŭ bruă ăt akâo kơ dŭm gưl mâo klei dưi ksiêm dlăng hlăm ai tiê dŭm hdră kčah mơ̆ng dhar bruă čiăng dăp djăp ênoh phung nai mtô ăt msĕ mơh mnuih mă bruă kơ sang hră čiăng rơ̆ng bruă mtô bi hriăm”

Lê Duy Định – Khua Knơ̆ng bruă sang hră mtô bi hriăm čar Gia Lai brei thâo dôk bi hgŭm hŏng Knơ̆ng bruă kriê dlăng bruă knuă hŏng dŭm alŭ wăl čiăng ksiêm dlăng, dăp adŭ hriăm, sang hră, bi mŭt dŭm anôk mtô bi hriăm, mđĭ ênoh hđeh sang hră/adŭ hriăm truh jih hnơ̆ng hlue si klei bhiăn dŭm gưl hriăm. Leh bi leh dŭm boh phŭn kơh lŏ yap klei kƀah, djăp nai mtô ti dŭm alŭ wăl čiăng mbha 1.244 čô Gưl dlông jao. “Hŏng dŭm boh adŭ hriăm gưl sa brei mâo 35 čô hđeh/adŭ, bi hŏng dŭm adŭ gưl 2 brei mâo 45 čô hđeh/adŭ. Dŭm kdriêk hlue ngă bruă bi mŭt dŭm anôk mtô bi hriăm ăt msĕ mơh bruă rơ̆ng ênoh hđeh sang hră hlăm adŭ snăn srăng dưi mkiêt mkriêm sa ênoh phung nai mtô. Leh dưi mbŏ sa čô nai mtô klă sĭt, mbĭt hŏng bruă bi mŭt dŭm anôk mtô ăt msĕ mơh dăp ênoh hđeh sang hră hlăm sa boh adŭ snăn klei găl kơ bruă sang hră ti čar Gia Lai srăng mâo djăp nai mtô”

 Mbĭt hŏng dŭm hdră êjai, čiăng msir mgaih klei kƀah nai mtô, Knơ̆ng bruă sang hră mtô bi hriăm dŭm čar hlăm krĭng Lăn Dap Kngư ăt akâo kơ Phŭn bruă sang hră mtô bi hriăm kčĕ kơ Knŭk kna mbŏ ênoh nai mtô adôk kƀah. Mâo hdră êlan ruah nai mtô hŏng phung hđeh hriăm nai dưi đru prăk mưn hriăm, prăk yua aguah tlam hlue si hdră kčah hlăm Hdră mtrŭn 116 mơ̆ng Knŭk kna čiăng găl ênưih kơ alŭ wăl kơ phŭn hrŏng ruah./.