Aguah mbruê 2/6, êbeh 6.800 čô bi lông čar Kon Tum mŭt hlăm gưl bi lông mŭt adŭ 10 hŏng mta bi lông tal êlâo jing Ngữ văn, mmông bi lông 120 mnĭt. Klei bi lông mŭt adŭ 10 thŭn hriăm 2025 – 2026 čar Kon Tum mâo êbeh 6.800 čô bi lông, êjai anăn hnơ̆ng čuăn dưi jao jing giăm 7.700 čô hđeh sang hră. Čiăng kơ gưl bi lông mkŏ mjing êđăp ênang, djŏ hdră bhiăn, knơ̆ng bruă sang hră mơar čar Kon Tum mkŏ mjing 254 êpul gơ̆ng bi lông ti 10 kdriêk, ƀuôn prŏng, tiŏ nao êbeh 1.050 čô knuă druh, phung dlăng klei bi lông.

Knơ̆ng bruă sang hră mơar čar Kon Tum brei thâo, klei bi lông mŭt adŭ 10 thŭn anei mâo čar mkŏ mjing hnưm hĭn sa mlan čiăng rơ̆ng ngă hdră êlan mkŏ dăp anôk bruă knŭk kna dŭm gưl. Klei bi lông mŭt adŭ 10 mơ̆ng čar Kon Tum thŭn anei mâo lu mta mrâo. Hđeh sang hră bi lông 3 mta mâo Ngữ văn, Toán leh anăn mta tal 3 dưi ruah  mơ̆ng dŭm mta hriăm klei hriăm gưl 2, rơ̆ng amâo mâo ruah djŏ sa mta hriăm tal 3 hlăm 3 thŭn mđrĭng.