VOV4.Êđê- Hluê si klei hưn “Ƀun lu mta ti Việt Nam thŭn 2021” srăng lŏ mâo thiăm 10 êklăk čô dưi mâo klei đru mơ̆ng dŭm hdră êlan leh anăn hdră ala čar kñăm đru kơ yang ƀuôn leh anăn bi hrŏ ƀun wưng thŭn 2021 – 2025. Mbĭt hŏng mta kñăm lăm lui klei ư̆ êpa leh anăn bi hrŏ ƀun, boh nik ti dŭm krĭng taih kbưi, mơ̆ng thŭn 2022, knŭk kna mâo leh sa hdră ala čar kñăm kơ hjăn krĭng mnuih djuê ƀiă leh anăn krĭng čư̆ čhiăng, leh 2 thŭn bi mguôp plah wah 10 anôk bruă, phŭn bruă, dhar bruă, dŭm pluh alŭ wăl hlăm kluôm ala, hdră mâo leh dŭm knhuang nao yuôm bhăn čiăng hluê ngă mta kñăm “Amâo mâo lui kơ sa čô ti tluôn ôh”.

Mơ̆ng sa gŏ êsei jing gŏ êsei ƀun sui thŭn, gŏ sang amai Lò Thị Da, ti să Quang Chiểu, kdriêk Mường Lát dưi đru ana mjeh, êđai mjeh mơ̆ng hdră bi hrŏ ƀun hlăm alŭ wăl. Leh 5 thŭn hlue ngă, truh ară anei gŏ sang ñu mâo leh êpul hlô mnơ̆ng rông, mnŭ ada đĭ truh dŭm êtuh drei, hŏng đang ana boh kroh, grăp thŭn mâo prăk hrui wĭt dŭm êklăk prăk, jing gŏ sang đĭ kyar ti ƀuôn.

“Kyua mâo klei đru mơ̆ng alŭ wăl pô dưi ƀiă klei dleh dlan kơ prăk, knŏng rông mnơ̆ng, pla mjing, ăt găl ênưih kyua pô amâo mâo prăk ƀiădah dưi đru ana mjeh, mnơ̆ng rông. Kơ hdră mnêč snăn ăt dưi đru mơ̆ng hdruôm hră, knuă druh ktrâo lač čiăng pô hlue ngă”.

Dă KNang jing să tal êlâo kdriêk Dam Rông (Lâm Đồng) dưi tŭ yap să tlaih ƀun

Ruah gŏ sang kdlưn hĭn ngă klei bi hmô leh anăn bi lar jing sa hlăm dŭm hdră čar Thanh Hoá pŏk ngă Hdră kñăm ala čar pioh hjăn kơ krĭng mnuih djuê ƀiă leh anăn krĭng čư̆ čhiăng. Hà Văn Thuỷ, K’iăng Khua Anôk dlăng bruă Đảng Quan Hóa brei thâo, brei bi mlih klei mĭn hdră ngă hlăm klei hlue ngă hdră bruă; kƀĭn hâo hưn mtô mblang, iêô jak, bi hmô kơ knuă druh, đảng viên, lăm lui klei mĭn dôk čang guôn hlăm Knŭk kna:

“Êlâo dih đru amâo mă prăk, mkăp amâo mă ai ƀiădah dŭm hdră ară anei jing brei mnuih ƀuôn sang brei hrăm mbĭt hlăm hdră, ruah phung djăp hnơ̆ng čuăn. Ară anei bruă brei čiăng đru bi hrŏ čiăng duh bi liê đru mđĭ kyar krĭng, mđĭ kyar bruă duh mkra ala ƀuôn, mjing kleib găl mđĭ kyar mkra mjing hơĭt kjăp”.

 Hdră kñăm ala čar pioh kơ krĭng mnuih ƀuôn sang djuê ƀiă mâo Bruă kƀĭn ala bi mklă hlăm Hdră mtrŭn mrô 120 hruê 19/6/2022. Hdră mbha prăk bi liê mâo Dhar bruă kƀĭn ala bi mklă hlăm hruê 22/5/2022. Anei jing Hdră prŏng, gưl tal êlâo Đảng, Knŭk kna pioh klei găl leh anăn klei mđing dlăng yuôm bhăn, lŏ čuê klei mđĭ kyar hdră êlan djuê ana hlăm wưng êlâo adih. Hlue si Khua phŭn bruă gĭt gai Dhar bruă djuê ana mơ̆ng Bruă kƀĭn ala, anei jing Hdră êlan yuôm bhăn snăk hŏng hdră prŏng: Kƀĭn ti alŭ wăl 13 êbâo 222 alŭ dleh dlan hlăm  3.434 să ti 51 čar krĭng mnuih djuê ƀiă. Anei jing krĭng mâo klei găl bruă duh mkra ala ƀuôn dleh dlan hĭn kluôm čar, dôk hlăm tlâo krĭng phŭn jing Yŭ kwar Dhŭng, Lăn Dap Kngư leh anăn Yŭ Dưr. Kyua anăn, bruă bi klin ênoh mrô, bi trông hŏng dŭm alŭ wăl čiăng lač djăp ênŭm, ba hlăm klei dưi hlue ngă leh mâo Hdră mtrŭn bruă kƀĭn ala jing bruă ngă luič lu hruê mmông. Khua phŭn bruă, Khua Dhar bruă djuê ana Hầu A Lềnh brei thâo:

“Kơ bruă bi hgŭm hŏng dŭm phŭn, dhar bruă, hjăn hdră anei mâo 10 phŭn, dhar bruă hgŭm hlue ngă. Anei jing sa Hdră prŏng mâo 10 hdră bruă, 14 hdră bruă đ’điêt, 36 bruă klam. Jing 36 hdră êlan, dưi kƀĭn mơ̆ng dŭm hdră êlan mrâo, mâo hdră êlan hđăp dôk dưn yua. Kyua anăn, bruă kƀĭn čiăng mkŏ mjing sa hdră hră mơar ktrâo lač pŏk ngă Hdră jing bruă ngă yuôm bhăn leh anăn kjăp. Kyua anei gưl tal êlâo Đảng leh anăn Knŭk kna pioh sa klei găl anăn amâo dưi ngă ngơi mang ôh; brei mâo klei ktuê dlăng bi jăk.”

            Khua phŭn bruă, Khua Dhar bruă djuê ana Hầu A Lềnh

 Wăt tơdah prăk knŭk kna adôk lu klei dleh dlan ƀiădah Bruă kƀĭn ala, Knŭk kna mđi klei găl duh bi liê kơ bruă bi hrŏ ƀun lu hĭn dua blư̆ mkă hŏng wưng êlâo anăn, mâo nanao klei gĭt gai kñăm hlue ngă djăp ênŭm hdră êlan bi hrŏ ƀun, gĭr hlue ngă Hdră kñăm ala čar bi hrŏ ƀun hơĭt kjăp hlue si hdră kluôm, lu tĭng leh anăn mkhư̆ klei lŏ wĭt ƀun; mjing klei găl kơ lu mnuih ƀun; gŏ êsei ƀun ênưih dưi dưn dŭm hdră bruă ala ƀuôn klă klơ̆ng, boh nik ti dŭm alŭ wăl krĭng ƀuôn sang, krĭng čư̆ čhiăng, plao ksĭ, đru hlue ngă hdră kñăm mđĭ kyar bruă duh mkra, rơ̆ng êđăp ênang ala ƀuôn, bi leh hdră kñăm bi hrŏ gŏ êsei ƀun.

 Hdră đru kơ ala ƀuôn giăm 62.000 êklai prăk msir mgaih boh jhat klei ruă Covid-19, dŭm êbâo ton braih đru mjêč leh anăn dŭm êbâo êklai prăk mơ̆ng ênoh prăk kriê pioh gưl dlông čiăng đru mnuih ƀuôn sang kwar krah msir mgaih boh jhat “mâo nanao êa lip lêč, mdrơ̆ng angĭn êbŭ” jing klei gĭr prŏng snăk, čiăng kơ mnuih ƀuôn sang dưi dưn klei dưi hdĭp, klei dưi kriê dlăng mdrao mgŭn, klei dưi duh ƀơ̆ng. Amâo mâo klei mkăn ôh, anăn jing klei gĭt kyua klei dưi kơ anak mnuih mơ̆ng Đảng, Knŭk kna Việt Nam.

Pô mblang: H’Zawut Ƀuôn Yă