Thŭn 2022, bruă duh mkra – ala ƀuôn čar Lâm Đồng đĭ kyar, mâo lu boh tŭ dưn hlăm djăp mta bruă. Kluôm 18/18 hnơ̆ng čuăn dưi mâo lehanăn êgao hdră kčah, Hlăm anăn, hdră duh mkra đĭ 12%, êgao mkă hŏng hdră kčah mơ̆ng 6 – 7%, bruă lŏ hma h’ĭt kjăp, bruă tuh tia mkra mjing đĭ kyar, bruă hiu čhưn ênguê krŭ wĭt pral, ênoh prăk mnia mblei đĭ, hrui mâo kơ ngăn prăk knŭk kna kluôm thŭn mâo 13.100 êklai prăk. Hdră bi hrŏ ƀun h’ĭt kjăp dưi mâo dŭm boh tŭ dưn, hdră rơ̆ng klei êđăp ênang kơ ala ƀuôn dưi krơ̆ng kjăp. Blŭ ti knăm anei, Trần Đức Quận, Khua êpul gơ̆ng bruă ƀuôn sang čar Lâm Đồng lač, khădah hdră duh mkra – ala ƀuôn dưi mâo lu boh tŭ dưn, ƀiădah ăt dôk lu klei gun kpăk brei bi trông čiăng mâo hdră msir mghaih.

Ti klei kƀĭn anei, phung bi ala srăng brei klei blŭ hŏng 27 klei hưn mdah, ksiêm dlăng bi mklă 28 hdră mtrŭn yuôm bhăn lehanăn dŭm hdră bruă phŭn, hmăi truh kơ hdră mđĭ kyar mơ̆ng čar, msĕ si: Hdră mkra êlan pral Bảo Lộc – Liên Khương hluê hdră bi hgŭm knŭk kna – êngao knŭk kna, hdră gang mkhư̆ klei lu đei êdeh ngă gun kpăk klei găn êrô ti ƀuôn prŏng Đà Lạt./.