Thŭn 2022, kluôm hdră êlan ngăn prăk duh bi liê bruă knŭk kna mơ̆ng čar Lâm Đồng dưi mkăp brei jing 6.500 êklai prăk čiăng hluê ngă 350 hdră. Hlăm anăn, mâo 722 êklai prăk jing ngăn prăk bi kdung mơ̆ng thŭn 2021.

Hluê si Bùi Sơn Điền, khua kiă kriê knơ̆ng bruă hdră êlan leh anăn duh bi liê čar Lâm Đồng, yap truh kơ hruê 15/11, hdră êlan ngăn prăk duh bi liê bruă knŭk kna thŭn 2022 mơ̆ng čar knŏng mrâo brei čan mă 3.694 êklai prăk, knar hŏng 68,5% hdră kčah. Mâo klei brei čan êmưt kyua tuôm hŏng lu klei dleh dlan, kpăk gun hlăm bruă ruh mgaih anôk ala leh anăn dŭm mta hră mơar knŭk kna. Ară anei anôk bruă dôk bi mguôp hŏng dŭm anôk bruă djŏ tuôm hlăm čar mtrŭt mjhar phung duh bi liê mtrŭt bi hmar klei ngă bruă. Gĭr truh kơ hruê 31/12 kơ anăp, hnơ̆ng klei brei čan êbeh 95% leh anăn truh kơ jih wưng tlâo mlan tal 1 thŭn 2023 mâo 100% hdră kčah.

“Hmei dôk mă bruă hŏng grăp phung duh bi liê, hŏng dŭm alŭ wăl dưi lač jing tuôm hŏng lu klei dleh dlan. Ƀiădah, hluê si klei đăo knăl leh anăn klei ƀuăn mơ̆ng phung duh bi liê, lu jing srăng brei čan djŏ hŏng hdră kčah. Ênoh ngăn prăk adôk jing lu êdi, êjai anăn mmông ngă bruă knŏng dôk mă sa mlan đuč, kyuanăn hmei ăt mâo mmông mă bruă, iêo đĭng blŭ čiăng mtrŭt mjhar leh anăn mtă kơ diñu. Bi hŏng dŭm hdră mâo klei bi êdah êmưt hŏng hdră kčah ăt hưn mdah leh hŏng bruă sang čư êa čar”.

Năng mđing hĭn, hlăm dŭm hdră mâo ênoh prăk brei čan êmưt, jih jang lĕ hlăm dŭm bruă mkŏ mkra mơ̆ng dŭm knơ̆ng, dhar bruă hlăm čar jing pô duh bi liê. Klă klơ̆ng, Knơ̆ng bruă klei mrâo leh anăn hâo hưn dưi mkăp brei 22 êklai prăk ƀiădah knŏng mrâo brei čan 28%, knơ̆ng bruă lŏ hma leh anăn mđĭ kyar krĭng ƀuôn sang dưi mkăp brei 224 êklai prăk ƀiădah mrâo brei čan knŏng 23%. Sang êa drao prŏng čar dưi mkăp brei 12 êklai prăk ƀiădah ăt knŏng mâo brei čan 11%...

Ti anăp klei brei čan duh bi liê bruă knŭk kna ti alŭ wăl mâo klei êmưt êdi, Trần Văn Hiệp, khua kiă kriê bruă sang čư êa čar Lâm Đồng brei thâo, srăng ktang phĭt ƀuah mkra phung duh bi liê tơdah amâo mâo rơ̆ng klei brei čan djŏ hŏng hdră kčah.

“Klei brei čan duh bi liê bruă knŭk kna hlăm čar ăt dôk mâo lu klei dleh kpăk, dôk êmưt hlăm bruă tla hnô ruh mgaih anôk ala, mâo đa đa bruă mkŏ mkra rŭ mdơ̆ng leh ƀiădah ka leh mơh. Hlăm anăn, bruă brei čan mơ̆ng đa đa dhar bruă dôk đuôm kpăk êdi, čiăng mă klei hriăm leh anăn amâo brei lŏ mâo klei msĕ sơnăn. Klei mĭn jing mñă klă truh kơ knhal jih thŭn, anôk bruă amâo mâo brei čan srăng wĭt hrui wĭt leh anăn amâo lŏ brei ôh ênoh prăk anăn, knŏng tŭ mă dŭm bruă mkŏ mkra ka leh. Leh anăn bruă đua klam jing Khua gĭt gai leh anăn khua kiă kriê dŭm knơ̆ng bruă, dhar bruă.