Ti anôk bi kƀĭn tal 10, Êpul gơ̆ng bruă ƀuôn sang Lâm Đồng gưl X bi klă leh, bruă mkăp klei dưi rŭ mdơ̆ng sang dôk êngao knŭk kna ti ƀuôn prŏng Đà Lạt dôk phưi tha amâo mâo klei kiă kriê kjăp ôh. Jih jang bruă mơ̆ng knŭk kna kiă kriê klei rŭ mdơ̆ng ti alŭ wăl mâo lu jing ka mâo ôh klei dưi mơ̆ng anôk bruă mâo klei dưi ksiêm dlăng, lehanăn bi mghaih msir hĕ hŏng klei pral. Mâo leh mơh đa đa tuôm mghaih msir đŭ bi kmhal leh, ƀiădah ăt lŏ kreh ngă soh, snăn tuôm hŏng klei yang ƀuôn ăl čôñ êdi. Hlăm anăn, klei truh klưh taluy, hroh đuĕ anôk rŭ mkra ngă kơ dua čô mnuih djiê, lehanăn 5 čô mnuih êka ti ƀuôn hgŭm mrô 10, ƀuôn prŏng Đà Lạt hlăm knhal jih mlan 6 leh êgao jing sa klei bi hmô.

 Trần Văn Hiệp, Khua knơ̆ng bruă sang čư̆ êa čar Lâm Đồng lač, bruă čuăl mkă, brei bi mâo hdră êlan hyuă kjăp kiă kriê bruă rŭ mdơ̆ng, bruă sang čư̆ êa dŭm dhar bruă djŏ tuôm bi trông duah hdră mâo ênoh čuăn jăk kơ grăp alŭ wăl, boh nik hŏng dŭm lăn klĭng kngư, êwang bi kpleh taluy prŏng. Trần Văn Hiệp, lač: 

“Dlăng hŏng ală mta ƀoh jing klei amâo mâo jăk ôh, amâo găl ôh êdi, huĭ êdi ƀiădah Đà Lạt ăt brei klei dưi. Nao truh kơ êlan Mimosa, Khe Sanh mâo anôk 3-4 boh sang prŏng siam dôk ti ping čư̆, ti jơ̆ng čư̆, snăn năng lŏ bi ksiêm wĭt, jing anôk amâo mâo hơĭt ôh. Nô năng lŏ sua wĭt jih anôk anei, wăt hră mơar rŭ mdơ̆ng. Klei klưh hroh anăn jing leh sa klei bi hriăm ktrŏ êdi. Brei tuh truh 5.000 tôn lăn, lehanăn lŏ đĭ truh 8.000 tôn, leh mâo dŭm gưl hjan prŏng snăn anôk anăn srăng đĭ ktrŏ dŭm pluh êbâo tôn mtam... Hlŏng ngă soh hŏng wăl êđăp ênang kơ êlan klei pui kmlă, jing čhuak djŏ hlăm wăl êđăp ênang kơ klei pui, anôk amâo mâo brei duah čhuak ôh. Mkra taluy ăt kăn djŏ hŏng hdră mtrŭn mơ̆ng čar mkra êgao kơ 4m, êwang bi kpleh dŭm taluy msĕ snăn amâo mâo djŏ ôh, mơ̆ng anăn yơh mâo klei truh bŏ hŏng klei ênguôt anei”.

Ăt ti anôk bi kƀĭn Êpul gơ̆ng bruă ƀuôn sang čar Gia Lai leh êgao, phung bi ala mâo klei êmuh lu kơ bruă rŭ mdơ̆ng ti alŭ wăl. Hlăm anăn, mâo bruă rŭ mdơ̆ng   homestay, sang rŭ mdơ̆ng soh hŏng klei bhiăn ngă kơ yang ƀuôn ăl čôñ. Kyua êmưt hlăm klei bi leh djăp mta bruă čuăl mkă ti dŭm alŭ wăl jing hĕ leh klei gun kpăk hlue ngă bruă duh bi liê.

 Nguyễn Bá Thạch- Khua kiă kriê knơ̆ng bruă rŭ mdơ̆ng Gia Lai lač, bruă knŭk kna kiă kriê bruă rŭ mdơ̆ng ti čar mâo klei phưi tha đei. Lu anôk rŭ mdơ̆ng soh hŏng klei bhiăn tơl leh jih bruă knuă snăn kơh hmao ƀuh, ngă truh kơ klei dleh hlăm hdră mghaih msir. Klei mnuih ƀuôn sang hlue gưt klei bhiăn kƀah, lu anôk thâo leh jing soh, ăt lŏ ngă, snăn truh kơ klei dleh dlan, lehanăn sui hlăm bruă mghaih msir, đŭ bi kmhal.

Klei êmưt hlăm bruă čuăl mkă, ngă truh kơ lu klei dleh dlan hlăm bruă knŭk kna kiă kriê klei rŭ mdơ̆ng, hmăi leh amâo mâo jăk hlăm lu mta bruă duh bi liê, Nguyễn Bá Thạch brei thâo boh sĭt ară anei: Klei čuăl mkă ti čar knŏng mrâo djăp kgŭ 30%, jing ƀiă hĭn ênoh kah knar mơ̆ng kluôm ala.

 “Mtă kơ dŭm alŭ wăl, mâo dŭm klei čuăl mkă bi djŏ, ya mta bruă amâo mâo dôk hlăm klei čuăl mkă ôh snăn lăm lui jih, dăp hdră êlan ngă bruă bi djŏ. Êjai hlăm klei dôk guôn jih jang djă      p mta ai dưi klei thâo, snăn alŭ wăl năng mkŏ mjing mtam hdră êlan tă hdră mrâo kơ klei čuăl mkă bi djŏ hŏng klei jing hlăm alŭ wăl”./.