Kyua hluê ngă ktang phĭt leh anăn hrăm mbĭt dŭm hdră êlan, bruă duh mkra ala ƀuôn thŭn 2022 ti čar Lâm Đồng dưi rơ̆ng klei đĭ kyar, mâo lu boh tŭ dưn yuôm bhăn hlăm djăp mta bruă. Kluôm 18 hlăm 18 hnơ̆ng čoh čuăn dưi mâo ênŭm leh anăn êgao hdră kčah mâo leh.

Êdah êdi jing hnơ̆ng đĭ kyar bruă duh mkra ti alŭ wăl čar mâo truh 11,84%, hnư prăk knŭk kna hrui wĭt 13.000 êklai prăk, đĭ 2000 êklai prăk mkă hŏng hdră kčah leh anăn đĭ êbeh 18% mkă hŏng thŭn êlâo, hnơ̆ng klei mnia mblei mâo êbeh 886 êklăk USD, prăk hrui wĭt kah knar grăp čô mâo 75,3 êklăk prăk, drông 7 êklăk gưl čô tuê hiu čhưn ênguê, đĭ 340% mkă hŏng wưng anei thŭn dih. Blŭ hrăm hlăm klei kƀĭn, Trần Văn Hiệp, khua bruă sang čư êa čar Lâm Đồng mñă klă, dŭm klei dleh kpăk srăng dưi mgaih msir hlăm thŭn 2023. Hlăm anăn, kñăm kơ bruă mkŏ mjing hdră êlan leh anăn hluê ngă mâo boh tŭ dưn hdră mtrŭn mrô 23 mơ̆ng Phŭn bruă kđi čar hŏng dŭm bruă ngă klă klơ̆ng, mnơ̆ng dhơ̆ng klă klơ̆ng.