Hŏng anăn “Đà Lạt - Ƀuôn prŏng 4 yan mnga, Festival Mnga Đà Lạt tal 9 thŭn 2022 dưi mkŏ mjing hlăm 2 mlan, mơ̆ng hruê 1/11 truh kơ jih hruê 31/12. Mbĭt hŏng dŭm hdră dưi mkŏ mjing ti Đà Lạt, êbeh 40 hdră mđing truh ăt dưi mkŏ mjing hlăm lu alŭ wăl mkăn ti čar. Ară anei, dŭm hdră mđing truh kơ knăm anei dưi mkŏ mjing ti dŭm kdriêk, ƀuôn prŏng hlăm čar, msĕ si: Knăm bi lông ao dai mnga, rang mdah lehanăn hưn mthâo mnơ̆ng lŏ hma, Knăm m’ak kpiê Vang mtah mda v.v… Hluê Sử Thanh Hoài, Khua anôk bruă sang čư̆ êa kdriêk Lạc Dương, čar Lâm Đồng, alŭ wăl mprăp leh ênŭm dŭm bruă mđing truh kơ knăm anei dưi mkŏ mjing êđăp ênang lehanăn tŭ jăk. “Hluê ngă hdră mtrŭn mơ̆ng Anôk bruă sang čư̆ êa čar kơ bruă nao hgŭm hlăm dŭm hdră mđing truh kơ knăm Festival Mnga Đà Lạt, kdriêk Lạc Dương ăt mâo dŭm bruă mđing truh. Anăn jing m’ak yan rơ̆k hrah mda tĭng pŏk hlăm hruê 19/11, mbĭt anăn kdriêk Lạc Dương ăt mkŏ mjing klei bi lông tông čing char, tŭk knă mnơ̆ng ƀơ̆ng huă, bi hgŭm hŏng anôk bruă duh mkra mkŏ mjing knăm bi lông êran aseh ti să Dă Ñim”

Mbĭt hŏng bruă sang čư̆ êa alŭ wăl, dŭm hdră hiu čhưn ênguê msĕ si anôk mdei săn, anôk đih đăm, anôk hiu čhưn ênguê, ăt mprăp ênŭm dŭm klei găl čiăng rơ̆ng klei čiăng mơ̆ng phung tuê hiu čhưn. Đinh Thiên Long, pô kiă kriê sa anôk čhĭ mnơ̆ng ƀơ̆ng ti ƀuôn prŏng Đà Lạt brei thâo, čiăng mđing truh kơ Festival Mnga Đà Lạt tal anei, êngao mđĭ hnơ̆ng tŭ dŭm hdră bruă, ñu mđing lu hĭn kơ dŭm mta mnơ̆ng dưi mkra mơ̆ng djam mtam, boh kroh jiă knhuah Đà Lạt. “Êlâo Festival, bruă tal êlâo jing brei mkra bi msiam anôk čhĭ mnơ̆ng, mđĭ hnơ̆ng tŭ jăk mă bruă, rơ̆ng klei doh êƀăt mnơ̆ng dhơ̆ng čiăng drông tuê hiu čhưn. Đà Lạt mâo lu mta mnơ̆ng pioh mkra mjing, kyua anăn hmei čiăng kơ phung tuê hiu čhưn srăng dưi tui ksiêm kơ knhuah dhar kreh mnơ̆ng ƀơ̆ng huă mơ̆ng mnuih ƀuôn sang ƀuôn prŏng mnga”.

Êngao kơ hdră kdŏ mmuñ, m’ak, hlăp mbŭl, hưn mthâo dŭm mta mnơ̆ng lŏ hma mâo anăn knăl “Đà Lạt – Anăn knăk jăk mơ̆ng krĭng lăn jăk”, mnga jing mta phŭn mâo bruă sang čư̆ êa alŭ wăl, mnuih ƀuôn sang, anôk bruă duh mkra mjêč mprăp kñăm mkăp kơ klei čiăng dlăng mơ̆ng phung tuê hiu čhưn, boh nik dŭm anôk bi msiam mnga ti krĭng lu mnuih dôk, ktuê êlan phŭn lehanăn djiêu ênao êa Xuân Hương. Ti anôk bruă ƀuôn prŏng Đà Lạt mprăp leh 400 êbâo boh abŭ mnga, hruh mnga čiăng mjing wăl anôk mnga siam hlăm knăm Festival mnga tal anei./.