
Čar Gia Lai mrâo mkŏ mjing knăm mtrŭt mjhar hdră bruă “Mnuih ƀuôn sang hriăm kơ bruă mrô”. Bruă anei čiăng hlăk mblang klei hriăm leh anăn klei thâo yua mrô truh kơ grăp čô, grăp êpul êya – boh nik jing krĭng ƀuôn sang, krĭng tlaih kbưi, krĭng mnuih djuê ƀiă. Mta kñăm mơ̆ng čar Gia Lai jing mkăp klei thâo kơ ƀiă êdi 80% knuă druh, phung mă bruă knŭk kna, 100% hđeh sang hră leh anăn phung hriăm gưl prŏng, mbĭt hŏng 80% mnuih ƀuôn sang hlăm ênuk thŭn mă bruă čiăng thâo klah čŭn kơ kdrăp mrô. Mnuih ƀuôn sang hriăm kơ bruă mrô amâo djŏ knŏng jing hdră mơ̆ng gưl bruă Đảng nah gŭ, bruă sang čư̆ êa , ƀiadah srăng jing hdră bruă čŏng pô, klă klơ̆ng mơ̆ng jih jang mnuih ƀuôn sang. Kah mbha hlăm knăm mtrŭ mjhar, Phan Văn Chiến, nai mtô ti sang hră gưl 3 Chi Lăng, ƀuôn prŏng Pleiku brei thâo:
“Kâo ƀuh klei mlih mrô đru lu êdi hlăm bruă mtô bi hriăm pô. Bruă mtô online, bi mrâo klei hưn hđeh sang hră, puăng jing găl ênưih hĭn, hrô kơ êlâo dih nai srăng ngă. Ară anei phung nao thâo kơ klei mlih mrô leh anăn ƀrư̆ ƀrư̆ bi hơĭt čiăng hmao tiŏ, đru kơ klei mtô mjuăt mrâo mrang leh anăn tŭ dưn hĭn”.

Čiăng dưi mâo dŭm mta kñăm, Gia Lai bi klă lu hdră êlan kñăm: Mtrŭt mđĭ bruă haoa hưn kơ hdră bruă anăn hlăm dŭm mbha mrô leh anăn klei mrâo hâo hưn, bi râo ai tiê čŏng hriăm, čŏng mlih mrô hlăm mnuih ƀuôn sang. Mjing sang hră, sang dhar kreh, sang dlăng hră jing anôk bruă bi hriăm kơ hdră mrô. Iêo jak klei nao hgŭm ktang phĭt mơ̆ng knuă druh, đảng viên, êpul bruă kđi čar – yang ƀuôn leh anăn knơ̆ng bruă mrô.

Ti čar Dak Lak, ba bruă knơ̆ng prăk truh jĕ hŏng mnuih ƀuôn sang amâo djŏ knŏng anăn pia ôh, ƀiădah dôk klă sĭt ti grăp ƀuôn sang. Čiăng đru kơ mnuih ƀuôn sang mâo dŭm mta bruă jăk hĭn, Agribank anôk bruă Dak Lak mkŏ mjing leh dŭm boh êdeh knơ̆ng prăk thâo mđuê̆, nao truh hlăm grăp ƀuôn sang, truh ti krĭng taih kbưi. Grăp anôk ngă bruă dưi bi hriăm kluôm, dưn yua kdrăp mrâo mrang, rơ̆ng kơ klei êđăp ênang êjai tla prăk, bi hrŏ mmông ngă hră mơar. Kyuanăn, dŭm êbâo êklai prăk mnga hdjul truh hŏng mnuih ƀuôn sang djuê ƀiă. Võ Tiến Nam, khua knơ̆ng prăk Agribank dak Lak brei thâo, truh kơ ară anei ênoh prăk brei čan ti alŭ wăl mâo hlăm brô 22 êbâo êklai prăk, hlăm anăn lu kơ kơ bruă lŏ hma krĭng ƀuôn sang:
Êpul hiu brei čan nao truh ti krĭng taih kbưi, đru kơ mnuih ƀuôn sang êrô êbat. Msĕ si mơ̆ng Nam Ca truh kơ wăl krah Liên Sơn, kdriêk Lak jing kbưi truh 50km. Êjai hmei dăp êbeh brei čan prăk ti dŭm bĭt anôk, mnuih ƀuôn sang bi dăp mmông, brei čan găl ênưih hĭn. Ƀiădah, ăt adôk dleh dlan êjai nao ti krĭng taih kbưi kyua bruă mkŏ mkra ka mâo djăp ênŭm.”
Thâo klă klei mlih mrô jing hdră čiăng êdi, lu êpul hgŭm bruă lŏ hma ti Kak Lak dưi leh anăn dôk čŏng hriăm, boh nik jing yua dŭm kdrăp mrô čiăng hưn mdah leh anăn čhĭ mnia. Lu ƀĭng ngă lŏ hma ba mnơ̆ng dhơ̆ng mơ̆ng anôk mkra mjing truh kơ kngan phung blei ba yua pral. Êpul hgŭm bruă lŏ hma Công Bằng Čư̆ dliê Mnông ti kdriêk Čư̆ Mgar, čar Dak Lak êlâo dih knŏng mưng hŏng bruă mkăp brei mjeh, mnơ̆ng yua, hbâp pruê, đru kơ hdră mnêč kơ ƀĭng ngă lŏ hma mkă mjing mnơ̆ng dhơ̆ng djăp hnơ̆ng čuăn, ƀiădah ară anei klam ngă bruă klam mrâo, jing pô mnơ̆ng dhơ̆ng, mkŏ klei mkra mjing hŏng anôk mnia mblei, hưn mdah anăn knăl mnơ̆ng dhơ̆ng alŭ wăl. Hluê si Thân Cư, k’iăng khua êpul hgŭm bruă, čiăng ngă jăk bruă klam anăn srăng mlih mrô, dưn yua kdrăp mrô hlăm klei hưn mdah mnơ̆ng dhơ̆ng đru leh kơ êpul hgŭm bruă nao jĕ anôk mnia mblei leh anăn kluôm hĭn.
“Pô srăng mđĭ hnơ̆ng bruă mkra mjing bi mguôp hŏng thâo kơ kdrăp mrâo 4.0, thâo hdră čhĭ mnia, nao jĕ anôk mnia mblei, maketinh čiăng čhĭ mnia brei kơ diñu thâo mnơ̆ng thơ̆ng pô jăk mơh. Tơdah pô ngă jăk ƀiădah amâo mâo bi trông, amâo mâo klei hưn jing amâo mâo tŭ dưn ôh”.
Hlăm wưng êgao, êpul hgŭm bruă ti čar Dak Lak mkŏ mjing lu gưl bi hriăm kơ klei mnia mblei hlăm kdrăp mrô, mđĭ kyar anăl knăl, mkŏ mjing rup kơ knơ̆ng bruă, êpul hgŭm bruă. Lê Văn Dần, k’iăng khua gĭt gai êpul hgŭm bruă čar Dak Lak mñă klă hlăm wưng anôk mnia mblei bi ktưn msĕ ară anei, mbĭt hŏng bruă bi mrâo mrang hdră mkra mjing, dŭm êpul hgŭm bruă ăt mtrŭt mđĭ dưn yua kdrăp mrô hlăm bruă hưn mdah, ba čhĭ mnơ̆ng dhơ̆ng hlăm anôk mnia mblei điện tử.
“Lŏ dơ̆ng mtô mjuăt mbha lu gưl čiăng kơ dŭm êpul hgŭm bruă naoi jĕ dŭm boh klei phŭn mơ̆ng anôk mnia mblei điện tử mơ̆ng AI, leh kơnăn dŭm adŭ mtô êlam kơ grăp mnơ̆ng dhơ̆ng. Kyuadah grăp mnơ̆ng dhơ̆ng srăng mâo dŭm hdră êlan hŏng tur knơ̆ng mnia mblei điện tử mdê mdê. Čiăng kơ dŭm êpul hgŭm bruă dưi dôk ti êpul pô čiăng hưn mdah leh anăn čhĭ mnia online hŏng dŭm tur knơ̆ng ară anei. Boh nik jing đru kơ dŭm êpul hgŭm bruă krĭng taih kbưi dưi nao truh djăp anôk mnia mblei”.

Mlih mrô amâo lŏ djŏ jing klei kbưi ôh, ƀiădah dôk ƀrư̆ ƀrư̆ jing klei čiăng êdi hlăm klei hdĭp, bruă mkra mjing leh anăn yang ƀuôn. Dŭm klei gĭr mơ̆ng hdră “Mnuih ƀuôn sang hriăm kơ bruă mrô” ti Gia Lai amâodah dŭm klei bi hmô knơ̆ng prăk, êpul hgŭn bruă ti Dak Lak brei ƀuh klei gĭr leh anăn ai dưi găl guôp ktang phĭt mơ̆ng dŭm alŭ wăl Lăn Dap Kngư. Grăp čô čiăng dưi jao klei găl hriăm, nao jĕ leh anăn ngă phŭn kdrăp mrâo mrang, mlih mrô amâo lŏ djŏ bruă klam hjan mơ̆ng dŭm anôk bruă, êpul bruă, ƀiădah jing boh kdrŭt đĭ kyar kluôm hlăm ênuk mrâo, ênuk kpưn đĭ mơ̆ng djuê ana.
Viết bình luận