Kđông kahan knông lăn Ba Sơn, Lĭng kahan knông lăn čar Lạng Sơn kriê dlăng giăm 42 km êlan knông lăn găn 3 să Cao Lâu, Xuất Lễ leh anăn Mẫu Sơn. Hlăm anăn lu jing čư̆ čhiăng, kdrăn lŏ pưk hma knŏng ƀiă, kyuanăn klei hdĭp mnuih ƀuôn sang tuôm hŏng lu klei dleh dlan.

Bi klă bruă klam đru kơ mnuih ƀuôn sang bi hơĭt klei hdĭp, mđĭ kyar bruă duh mkra čiăng gĭr ktưn, kpưn đĭ tlaih mơ̆ng klei ƀun ƀin, knuă druh, lĭng kahan ti kđông kahan Ba Sơn mâo klei hlue ngă “4 hrăm mbĭt”, bi mguôp hŏng bruă sang čư êa  leh anăn dŭm êpul êya hlăm alŭ wăl mkŏ mjing dŭm klei bi hmô mkra mjing, djă kngan ktrâo bruă, đru kơ mnuih ƀuôn sang tinei mđĭ hnư prăk hrui wĭt, bi hơĭt klei hdĭp mda, lĭng kahan bi mkrum mguôp blei êbeh 2.000 ana čê mnga kñĭ mjeh brei kơ dŭm gŏ sang mâo klei hdĭp dleh dlan ti să Mẫu Sơn leh anăn čŏng pô hluê hriăm klei thâo, hdră mnêč rah mjeh, čiăng hrăm mbĭt hŏng mnuih ƀuôn sang pla mjing ana êa drao yuôm anei. Dương Trùng Lỷ (să Mẫu Sơn, kdriêk Cao Lộc, čar Lạng Sơn)

“Gŏ sang kâo ăt mâo kđông kahan knông lăn Ba Sơn mđup brei 100 phŭn ana čê mnga kñĭ. Kâo pô ăt dưi nao hlăm kđông kahan hriăm kơ hdră mnêč pla mjing. Hlăm mmông nao hriăm, mâo klei thâo, kyuanăn ana čê đĭ hriê jăk êdi. Kâo lač jăk kơ phung lĭng kahan knông lăn đru leh kơ gŏ sang mđĭ kyar klei hdĭp mda, rơ̆ng klei hơĭt kơ gŏ sang.”

Djă yua dŭm bĭt lăn huông giăm knông lăn, lĭng kahan knông lăn Ba Sơn lông mkŏ mjing klei bi hmô “kăt kram knông lăn Việt Nam” ti alŭ wăl să Xuất Lễ, blei leh anăn mđup brei 3.500 phŭn mjeh ana kram Bát bộ kơ dŭm gŏ sang nao hgŭm hlăm bruă kriê dlăng êlan gơ̆ng knông lăn. Leh 2 thŭn, dŭm phŭn kram čăt đĭ kpal tĭt leh anăn kčưm dưi hrui mă mkra mjing mnơ̆ng dhơ̆ng mơ̆ng đrao kram. Lý Văn Thắng, k’iăng khua bruă sang čư êa să Xuất Lễ, kdriêk Cao Lộc lač anei jing klei ngă bruă jăk, đru hluê ngă mâo boh tŭ dưn hdră jih jang mnuih ƀuôn sang răng mgang klei dưi kiă kriê ala čar, klei êđăp ênang knông lăn hlăm wưng mrâo.

Bruă pla ana kram čiăng kơ mnuih ƀuôn sang mđĭ kyar klei hdĭp mda jing êlan nao mrâo hlăm să. Hlăm bruă pla mjing, kriê dlăng ăt bi mguôp hŏng bruă răng mgang êlan knông lăn, đru bi mlih klei mĭn mnuih ƀuôn sang, hrăm mbĭt răng mgang êlan gơ̆ng knông lăn leh anăn êdei anăp ana kram prŏng ăt dưi ba wĭt ênoh prăk kơ mnuih ƀuôn sang”.

Hŏng bruă klam, klei khăp leh anăn bi mguôp hŏng mnuih ƀuôn sang, Lĭng kahan kđông kahan knông lăn Ba Sơn mâo leh dŭm bruă ngă klă klơ̆ng, đru kơ mnuih ƀuôn sang hlăm alŭ wăl ƀrư̆ ƀrư̆ mđĭ kyar klei hdĭp mda, lu gŏ sang tlaih mơ̆ng klei ƀun ƀin. Knŏng hlăm 3 thŭn anôk bruă dưi rŭ mdơ̆ng 15 bruă mkŏ mkra yang ƀuôn, mđup brei 5.500 phŭn mjeh kơ dŭm gŏ sang dleh dlan… kluôm ênoh prăk êbeh 4 êklai prăk. Phung lĭng kahan kđông kahan knông lăn ăt mâo klei uêñ mĭn, kriê dlăng phung hđeh điêt mâo klei hdĭp dleh dlan hŏng dŭm hdră “đru adei nao sang hră, “Anak rông kđông kahan knông lăn.” Trung tá Hoàng Trung Hiếu, khua bruă kđi čar kđông kahan knông lăn Ba Sơn brei thâo:

“Bi klă klei bi hmô “Bruă mkŏ mkra yang ƀuôn, bŏ hŏng klei khăp kđông kahan”, hmei čŏng pô, hur har bi mguôp hŏng bruă sang čư êa alŭ wăl hluê ngă lu mta bruă čiăng đru kơ mnuih ƀuôn sang alŭ wăl knông lăn dưi bi hơĭt klei hdĭp, bi mguôp hŏng ƀuôn sang, mơ̆ng anăn mâo klei đru, hrăm mbĭt hŏng êpul lĭng kahan knông lăn kriê dlăng, răng mgang kjăp klei êđăp ênang knông lăn ala čar.

Dŭm bruă ngă klă klơ̆ng, bŏ hŏng klei khăp mơ̆ng phung knuă druh, lĭng kahan kđông kahan knông lăn Ba Sơn leh anăn kluôm jing lĭng kahan knông lăn čar Lạng Sơn dưi đru măl êa mil kơ rup lĭng kahan Awa Hồ, hluê ngă jăk hdră “Kđông kahan jing sang, knông lăn jing ƀuôn, mnuih ƀuôn sang dŭm djuê ana jing ayŏng adei sa amĭ”, đru kơ mnuih ƀuôn sang dŭm djuê ana krĭng knông lăn ƀrư̆ ƀrư̆ mđĭ kyar klei hdĭp mda, đru rơ̆ng klei êđăp ênang knông lăn nah dưr Ala čar