Hlăm dŭm anôk bruă mprăp kơ klei bi blah, đoàn viên, hđeh êdam êra mâo giăm 80% hlăm ênoh lĭng kahan, hluê ngă dŭm mta bruă klam lĭng kahan, răng mgang ala čar. Êma thŭn êgao, 100% phung knuă druh, đoàn viên, hđeh êdam êra dưi bi leh jăk bruă klam tui hriăm, mprăp klei bi blah, mtô bi hriăm, mă bruă knuă… Anei ăt jing êpul êya mâo nanao ƀô̆ mta hlăm dŭm anôk dleh dlan, huĭ hyưt, đru kơ mnuih ƀuôn sang mdrơ̆ng hŏng klei truh yan adiê, klei ruă tưp, tui duah đru dŏng, bi klă klei mĭn, bruă klam mă bruă kơ ala čar, kơ mnuih ƀuôn sang, đru mguôp ai pô hlăm boh tŭ dưn anăn, Thượng úy Phan Văn Linh, pô bi ala quân đoàn mrô 1 brei thâo:“Mkŏ mjing klei jhŏng bruă kđĭ čar hŏng klei kjăp, ai tiê khăp kơ ala čar, mâo klei đăo knang kơ bruă lĭng kahan Việt Nam, knơ̆ng kơ ai dưi, klei thâo, hdră mnêč yua phao ktuang dôk mâo. Bi lar klei hur har, klei mbruă, čŏng pô, bi djŏ guôp hmar hŏng boh sĭt, klei thâo bi kdơ̆ng hlăm klei mbruă, mâo klei mĭn kjăp leh anăn djăp ênŭm dŭm hnơ̆ng čoh čuăn hlăm grăp boh klei.”

Êngao kơnăn, hdră bruă hlăk thŭn mda hŏng klei mbruă leh anăn bruă pah mni phung mda asei mâo klei bruă dưi hmao buh dŭm êbâo klei mĭn kơ bruă, đru kơ phung kreh knhâo mda asei hlăm kluôm lĭng kahan. Dŭm êbâo klei kčĕ leh amâo klei pah mni lŏ dơ̆ng mâo klei bi kluôm mơ̆ng êpul mkra mjing, dưn yua jing klei tŭ dưn, đru mguôp kơ ala čar dŭm êtuh êklai prăk hlăm sa thŭn. Hơ̆k mơak kyua dưi mâo klei pah mni, pô mda asei hŏng klei mbruă, Trung tá Hoàng Văn Tiến, ti anôk mtô bi hriăm wăl adiê, êngĭt adiê, anôk bruă mtô bi hriăm bruă lĭng kahan brei thâo:“Hmei mâo klei mơak sơnăk êjai dưi ba klei khăp čiăng, klei thâo pô čiăng mkra mjing dŭm mta mnơ̆ng dhơ̆ng mrâo mrang hĭn, đru kơ bruă bi mrâo mrang êpul lĭng kahan.”

Ti anăp dŭm bruă klam mrâo jing krŏ leh anăn hing ang hŏng phung lĭng kahan mda asei hlăm wưng kơ anăp, Klei kƀĭn prŏng Êpul hđeh êdam êra lĭng kahan tal anei bi klă mta kñăm jing lu hĭn mkă hŏng 10 hnơ̆ng čoh čuăn hluê ngă bruă hlăm wưng thŭn 2022 – 2027. Mbĭt anăn lač klă 3 klei kdlưn hĭn, anăn jing: Klei kdlưn hĭn hlăm bruă mtô mjuăt klei mĭn bruă cách mạng, Klei kdlưn hĭn hlăm bruă mtô mjuăt bi hriăm leh anăn mprăp klei bi blah, ksiêm duah klei kreh knhâo, hriăm klei blŭ ala tač êngao, klei blŭ mnuih djuê ƀiă, ngă phŭn klei ba yua, dưn yua klei mrâo mrang mkra wĭt leh anăn mkra mjing dŭm mta phao ktuang prŏng, mrâo mrang, dưn yua klei hưn mthâo mrâo mrang, mbruă hlăm klei mlih mrô, mâo klei kdlưn hĭn hlăm bruă mkŏ mjing knuih hdĭp ênuah ênô, dhar kreh, mđĭ klei thâo săng hluê ngă klei bhiăn ala čar, hdră bhiăn leh anăn rơ̆ng klei êđăp ênang. Bruă đoàn leh anăn bruă hđeh êdam êra ăt jing sa mta phŭn yuôm bhăn hlăm hdră mtrŭn gĭt gai, hdră êlan ngă bruă đảng, bruă kđi čar mơ̆ng grăp anôk bruă, msĕ si klei ksiêm êmuh mơ̆ng Trung tướng Trần Hoài Trung, khua bruă kđi čar, wăl kahan 7:“Gưl bruă Đảng nah gŭ, bruă kđi čar, pô hriăm bruă kđi čar, pô gĭt gai, anôk bruă kđi čar dŭm gưl mâo leh klei gĭt gai klă anăp, ktrâo lač, mkŏ mjing klei găl hĭn kơ bruă đoàn leh anăn bruă hđeh êdam êra dưi đĭ kyar, đru mguôp čiăng kơ êpul lĭng kahan dưi bi leh dŭm mta bruă klam dưi jao leh. Thâo săng klă kơ hưm, bruă klam, klei yuôm bhăn mơ̆ng bruă đoàn, bruă hđeh êdam êra leh anăn mâo klei sa ai ngă djăp mta bruă klam čiăng bi leh hmar leh anăn jăk hĭn srăng mâo pô gĭt gai, mâo pô ktrâo lač leh anăn mâo hdră bruă, hlăm anăn bruă hđeh êdam êra jing yuôm bhăn sơnăk.”

Dŭm mta knăm mơ̆ng phung lĭng kahan mda asei srăng đru mguôp mkŏ mjing lĭng kahan knhăk, khuăt leh anăn ktang, mkŏ mjing tur knơ̆ng kjăp čiăng truh kơ thŭn 2030 lĭng kahan jing mrâo mrang, mđĭ hĭn klei thâo răng mgang ala čar mơ̆ng hnưm, mơ̆ng kbưi leh anăn dôk mâo klei đru. K’iăng khua bruă Đảng knơ̆ng gĭt gai lĭng kahan gưl dlông, Khua phŭn bruă lĭng kahan Phan Văn Giang lač klă hlăm klei kƀĭn:“Knơ̆ng gĭt gai lĭng kahan gưl dlông, Khua gĭt gai phŭn bruă lĭng kahan mdưm leh klei đăo knang kơ phung lĭng kahan mda asei, mbĭt anăn mâo nanao klei uêñ mĭn leh anăn mkŏ mjing klei găl hĭn čiăng kơ diñu dưi hluê ngă klei hmăng hmưi đru kơ bruă mkŏ mjing Lĭng kahan yang ƀuôn Việt Nam cách mạng, thơ̆ng kơ bruă, knhăk, ƀrư̆ ƀrư̆ mrâo mrang, mkŏ mjing leh anăn răng mgang ala čar Việt Nam yang ƀuôn ngă phŭn. Mñă kơ phung lĭng kahan lŏ dơ̆ng gĭr ktưn čiăng năng djŏ hŏng klei đăo knang leh anăn klei hmăng hmưi mơ̆ng knơ̆ng gĭt gai lĭng kahan gưl dlông, Phŭn bruă lĭng kahan.”