VOV4.Êđê -  Ƀri bi hdơr 92 thŭn Hruê mkŏ mjing Êpul hgŭm phung mniê Việt Nam, mmăt hruê 18/10, ti Hà Nội, Êpul hgŭm phung mniê Việt Nam mkŏ mjing Hdră kdŏ mmuiñ “klei jăk siam ao dai Việt”. Nao mâo K’iăng Khua lăn čar hđăp Đặng Thị Ngọc Thịnh. Hlăm hdră, phung kdŏ mmuiñ Sang kdŏ mmuiñ Việt Nam bi mguôp rang mdah ao dai mơ̆ng Pô tă kčoh Đỗ Trịnh Hoài Nam leh anăn phung tă kčoh ao dai mniê hlue si 3 akŏ: Phŭn aghA Hà Nội đưm, klei jăk siam leh anăn ñŭ kma. Anei jing klei bi klin dŭm klei kdŏ mmuiñ jăk siam mpŭ kơ rup phung mnuê Việt Nam leh anăn dŭm klei mdah ao dai jiă kma klei jăk siam leh anăn klei khăp hŏng ao dai. Hdră kdŏ mmuiñ anei kñăm kơrŭ wĭt klei khăp, klei ktưn hưn leh anăn bruă klam răng kriê, mđĭ lar ênoh yuôm ao dai leh anăn hưn mdah rup ao dai, anak mnuih Việt Nam truh hŏng lu mnuih ƀuôn sang leh anăn ƀĭng găp dlông rŏng lăn.

Hruê mbruê 18/10, Êpul hgŭm bruă phung mniê čar Kon Tum mkŏ mjing lu mta bruă mâo boh tŭ dưn bi hdơr 92 thŭn hruê phung mniê Việt Nam. Êdah hĭn jing hdră Amĭ pô rông, bi mkŏ klei khăp, klei kƀĭn klrei mtăp mdơr êkei mniê, Hruê phung mniê čô̆ kơ bruă thŭn 2022 leh anăn ksiêm wĭt klei bi lông phung mniê čô̆ kơ bruă, klei kƀĭn đru kčĕ hdră êlan leh anăn mtrŭt mjhar klei bi lông “Mkŏ mjing phung mniê Việt Nam hlăm wưng mrâo”.

Bi kơ hdră Amĭ pô rông – bi mkŏ klei khăp, dŭm gưl êpul dưi hrăm mbĭt đru kơ phung hđeh êrĭt êrin mâo klei hdĭp dleh dlan hŏng ênoh prăk êbeh 2 êklai prăk. Wưng anei, Êpul hgŭm bruă phung mniê čar Kon Tum mđup brei leh klei pah mni kơ 10/23 klei mĭn čô̆ kơ klei mnia mblei leh anăn čô̆ kơ bruă wưng thŭn 2021 – 2025. Ƀuăn đru kơ 22 klei mĭn čô̆ kơ bruă mơ̆ng phung amai adei mniê mơ̆ng ngăn prăk brei čan mnga hdjul mơ̆ng knơ̆ng prăk đru kơ yang ƀuôn hŏng ênoh êbeh 5 êklai prăk.

VOV/Pô mblang: H’Zawut, Y Ƀel