Mơ̆ng akŏ thŭn hriăm 2022-2023 truh ară anei, ti alŭ wăl čar Lâm Đồng mâo 5 klei bi čăm hlăm sang hră mơ̆ng gưl hđeh điêt truh kơ gưl 3 ba lu klei ăl čôñ hlăm yang ƀuôn. Hlăm anăn, lu boh klei bi čăm lu mnuih, ngă ruă êka ba dŏng mdrao. Boh nik, mâo 2 čô hđeh mniê ti sang hră gưl sa ti ƀuôn hgŭm 2, ƀuôn prŏng Đà Lạt mâo 1 čô êkei mơ̆ng nah êngao ba hlăm sang tlô ngă klei jhat ƀai. Kjham hĭn jing boh klei mâo hlăm yang hruê dơ̆ng 21/10, sa čô êkei hriăm adŭ 9 mơ̆ng Sang hră gưl 2 Nam Ban, kdriêk Lâm Hà mâo arăng tlŏ hlŏng djiê ti ktuê êlan wĭt mơ̆ng sang hră.

          Hluê si Huỳnh Quang Long, K’iăng khua knơ̆ng bruă sang hră m’ar mtô bi hriăm čar Lâm Đồng, klei bi čăm biêng hlăm sang hră ti alŭ wăl čar mâo klei bi êdah dleh dưi ksiêm dlăng, mâo lu boh klei ngă truh kjham, hmăi truh kơ klei suaih pral, klei mĭn phung hđeh, ba lu klei amâo jăk hlăm yang ƀuôn:

“Ai êwa hlăm sang hră amâo jăk ôh, mơ̆ng phung nai truh kơ phung hđeh, nao djăp anôk ăt bi hing. Leh kơnăn, diñu dôk bi ngi 3, 4, 7 čô ngă kơ ai êwa amâo jăk. Êngao anăn, anei jing klei amâo h’ĭt hŏng phung amĭ ama, ngă kơ anôk bruă mtô bi hriăm luič klei tŭ yuôm mơ̆ng gơ̆. Lehanăn kluôm yang ƀuôn ăt mđing kơ klei anei lehanăn boh klei ăt hmăi truh kơ hdră mtô bi hriăm phung hđeh. Bi êdah hdră mjuăt bi hriăm knhuah hdĭp, knhuah dôk dơ̆ng ƀơ̆ng huă năng hưn brei răng êdi”.

          Ti anăp boh klei anei đĭ lu, Anôk bruă sang čư̆ êa čar Lâm Đồng mtrŭn hră m’ar mtă kơ Anôk bruă sang hră m’ar mtô bi hriăm gĭt gai, bi hgŭm hŏng Khua Anôk bruă mnuih ngă bruă, kahan êka êkeh lehanăn yang ƀuôn, Khua anôk bruă kahan ksiêm čar lehanăn Khua anôk bruă sang čư̆ êa dŭm kdriêk, ƀuôn prŏng, Khua anôk bruă, êpul êya djŏ tuôm hlăm čar mđĭ hdră msir ƀuah mkra. Hlăm anăn, mđing kơ hdră mđĭ klei thâo săng, klei đua klam mơ̆ng knuă druh kriê dlăng, nai mtô, mnuih mă bruă ti sang hră, phung hđeh lehanăn gŏ sang kơ hdră gang mkhư̆ klei bi čăm biêng hlăm phung hđeh ti sang hră; mđing pŏk hdră msir rơ̆ng klei êđăp ênang ti ƀăng jang sang hră lehanăn dŭm krĭng riêng gah, pral gang mkhư̆ phung nah êngao mâo bruă bi duêh, čăm biêng phung hđeh hriăm hră, sinh viên.

Hlăm mlan 9 lehanăn 10 leh êgao, ti čar Dak Lak mâo lu klei bi čăm biêng hlăm phung hđeh ti sang hră. Hlăm anăn, mâo 2 boh klei kjham mâo ti Sang hră gưl 3 Krông Ana lehanăn ti Sang hră gưl 2 Nguyễn Du, wăl krah Ƀuôn Hô. Phạm Đăng Khoa, Khua anôk bruă sang hră m’ar – mtô bi hriăm Dak Lak brei thâo, dŭm klei bi čăm biêng plah wah phung hđeh hriăm hră kreh mâo nah êngao sang hră, leh ruê̆ mmông hriăm. Mta phŭn jing kyua kƀah klei mđing dlăng mơ̆ng gŏ sang, hmăi mơ̆ng klei hâo hưn lehanăn bruă ngă amâo dưi ksiêm dlăng hlăm hla pŏk web yang ƀuôn. Čiăng mkhư̆ klei anei, Anôk bruă Sang hră m’ar mtô bi hriăm čar Dak lak mtă kơ dŭm sang hră mđĭ hdră kriê dlăng phung hđeh, mkŏ mjing hdră mtô mblang, mjuăt bi hriăm hdră bhiăn kơ phung hđeh kñăm mđĭ klei thâo săng mơ̆ng phung hđeh hlăm bruă “Amâo dưi bi čăm biêng hlăm phung hđeh ti sang hră lehanăn klei truh jhat hlăm ala ƀuôn” - Phạm Đăng Khoa lač:

“ Hmei jao klei đua klam kơ sang hră, kơ phung nai mtô, kơ dŭm êpul bruă đoàn hlăm sang hră kreh mđing kơ mnuih mâo klei hdĭp dleh dlan kơ bruă duh mkra amâo dah dleh dlan kơ gŏ sang čiăng đru phung hđeh gang mkhư̆ klei bi čăm biêng hlăm phung hđeh ti sang hră”.

Klei bi čăm biêng hlăm phung hđeh hlăm sang hră ƀrư̆ hruê ƀrư̆ mâo dleh dưi ksiêm dlăng, hmăi truh kơ klei suaih pral, ai tiê klei mĭn phung hđeh. Ti anôk bi kƀĭn bruă kƀĭn ala, phung bi ala lač snei, gŏ sang, sang hră lehanăn kluôm yang ƀuôn brei hgŭm kngan mjuăt bi hriăm phung hđeh djŏ guôp. Ti klei bi kƀĭn tal 4, anôk bruă kƀĭn ala gưl 15, lu phung bi ala lač leh kơ klei anei. Hluê pô bi ala Đặng Bích Ngọc, Êpul bi ala anôk bruă kƀĭn ala čar Hòa Bình: Phung hđeh ară anei hmăi mơ̆ng lu tĭng, hlăm anăn hmăi mơ̆ng klei hriăm hră, klei hdĭp lehanăn mơ̆ng hla pŏk web yang ƀuôn. Kyua anăn, brei mâo klei bi hgŭm kjăp plah wah sang hră lehanăn gŏ sang hlăm bruă mjuăt bi hriăm knhuah hdĭp:

Brei mâo klei bi hgŭm kjăp plah wah gŏ sang lehanăn sang hră, mkŏ mjing klei bi kƀĭn trông, čiăng hưn mthâo klei mâo hlăm yang ƀuôn, klei kơ knhuah hdĭp, mjuăt bi hriăm knhuah dôk dơ̆ng ƀơ̆ng huă, si srăng ngă čiăng kơ phung hđeh dưi kma hlăm pô. Gŏ sang amâo dưi jao jih kơ phung nai mtô ti sang hră ôh ƀiădah brei mâo klei bi trông, bi blŭ hrăm nanao. Phung amĭ ama ăt brei mâo klei bi hgŭm hŏng sang hră, hŏng nai mtô phung anak čô pô lu hĭn”.

        Phung bi ala anôk bruă kƀĭn ala lač snei, sang hră brei mđing mtô bi hriăm dŭm klei thâo hdĭp, mjuăt bi hriăm knhuah hdĭp, klei thâo săng djŏ klă kơ phung hđeh hriăm hră kơ bruă ngă jăk, mđĭ klei đua klam lehanăn klei thâo săng gang mkhư̆, msưh kdŭn klei bi čăm biêng hlăm phung hđeh ti sang hră./.