Thŭn hriăm 2022-2023, sang hră gưl 2 să Đăk Mar, kdriêk Đăk Hà mâo 673 čô hđeh sang hră, hlăm anăn 321 čô hđeh sang hră jing anak čô mnuih djuê ƀiă. Nai Phạm Thị Kim Hồng, K’iăng Khua sang hră brei thâo, mbĭt hŏng anôk phŭn, sang hră lŏ mâo anôk mtô tal dua ti alŭ Kon Gung - Đăk Mút hŏng hlăm brô êbeh 11 km. Ti sang hră anei mâo 7 boh adŭ hŏng 230 čô hđeh sang hră lu jing anak čô mnuih Bahnar leh anăn Sêdang. Čiăng kơ bruă mtô leh anăn hriăm dưi mâo klei tŭ dưn klă sĭt, Phung khua sang hră gưl 2 să Đăk Mar mbha 7 čô nai jing đảng viên mtô dŭm boh dŭ leh anăn phung nai mđĭ lar leh jăk bruă klam nai mtô hđeh sang hră. “Bruă Đảng sang hră jao kơ đảng viên dlăng dŭm boh adŭ leh anăn nao ti grăp alŭ wăl mơ̆ng alŭ, ƀuôn kriê dlăng hlue si êpul păn kjăp boh klei adŭ hriăm phung hđeh čiăng mâo bruă hâo hưn mtô mblang. Hlue ngă bruă klam mtô   ƀiădah phung nai dleh dlan snăn srăng bi trông hŏng phung đảng viên dlăng bruă anăn. Êngao anăn ăt jao kơ đảng viên dlăng bruă bi hgŭm hŏng phung khua ƀuôn čiăng mtrŭt mjhar hâo hưn mtô mblang kơ hđeh sang hră nao hriăm.

Boh sĭt brei ƀuh bruă mtô leh anăn hriăm ti sang hră wăl krah ăt msĕ mơh anôk bi hriăm alŭ Kon Gung - Đăk Mŭt mơng sang hră gưl 2 să Đăk Mar, kdriêk Đăk Hà jăk snăk. Anôk sang hră doh mngač leh anăn jiă kma msĕ si mjing thiăm klei gĭr hlăm grăp klei mtô phung nai ăt msĕ mơh bruă hđeh tui hriăm. Hŏng mnuih ƀuôn sang djuê ƀiă tinei rup phung nai jĕ giăm hŏng hđeh sang hră. Mnuih ƀuôn sang khăng lač ñu pô amâo dưi kriê dlăng bruă phung anak hriăm msĕ si phung nai ôh. Mơ̆ng bruă ngă klă sĭt, klă klơ̆ng mơ̆ng phung nai mâo ai đru kơ mnuih ƀuôn sang bi mlih klei mĭn dlăng myuôm hĭn bruă anak čô pô hriăm hră. Amai Y- Thoan, mnuih ƀuôn sang ƀuôn Kon Gung mâo anak dôk hriăm adŭ 6 bi êdah klei mĭn pô: “Phung nai ti nei jih ai tiê hŏng hđeh sang hrăm hrăm mbĭt hŏng hđeh sang hră.  Hlei pô hriăm awăt lŏ bi hriăm hjăn.  Nai jăk snăk, nao truh ti sang mtă mtăn. Hlei amĭ ama ka thâo săng lŏ mtô kơ phung amĭ ama hdră duh ƀơ̆ng, mtô hriăm anak pô. Hđeh sang hră mdê hjăn nai lŏ nao ti sang sĭt jih gŏ sang amâo mđing nai ăt dôk tinăn mơh mtô lač kơ amĭ hma.  Lu blư̆ nai hriê anăn ñu ăt bi mlih mơh ară anei lŏ nao sang hră leh”.

Mơ̆ng klei jih ai tiê hlăm bruă mtô mơ̆ng phung nai sang hră gưl 2 să Đăk Mar, ênoh phung hđeh hlăm sang hră kriăng nao sang hră mâo êbeh 90% nanao. Boh tŭ anei năng ai ênưih hŏng sang hră ti krĭng găl jăk, ƀiădah hŏng sa boh sang hră mâo mnuih djuê ƀiă hlăm brô 47% jing yuôm bhăn snăn. Amâo djŏ knŏng mtô klei thâo ôh, phung nai lŏ ktrâo lač kơ phung hđeh sang hră klei hdĭp, thiăm ai thâo gĭr kơ phung hđeh gĭr ktưn. Adei Y Kim Lan, hđeh sang hră adŭ 7C, hriăm ti anôk mtô ti ƀuôn Kon Gung - Đăk Mŭt brei thâo: “Phung nai mđing nanao kơ hmei, jĕ giăm hŏng hmei. Phung nai tinei jăk snăk mtô hmei jih ai tiê, Kâo khăp kơ sang hră anei, jing sang kâo tal dua. Nai mtô ăt msĕ si amĭ ama tal dua kơ hmei. Kâo srăng gĭr hriăm hră bi jăk čiăng hdơr knga kơ phung nai mtô leh kâo”

Hŏng bruă klam bi hriăm mnuih, 42 čô nai mtô sang hră gưl să să Đăk Mar lŏ mâo klei đru mguôp yuôm bhăn hong bruă sang čư̆ êa leh anăn mnuih ƀuôn sang alŭ wăl hlăm bruă hlue ngă hdră kñăm ala čar mkŏ mkra krĭng ƀuôn sang mrâo.

Bi mklă mnuih ƀuôn sang jing phŭn hlăm bruă mkŏ mkra krĭng ƀuôn sang mrâo, dŭm thŭn êgao, sang hră gưl 2 să Đăk Mar ngă leh jăk bruă tă hdră hriăm hră leh anăn bruă mă kơ hđeh sang hră, boh nik hđeh sang hră ti 3 ƀuôn mnuih djuê ƀiă Kon Gung - Đăk Mŭt leh anăn Kon Klôk.

Hđeh sang hră mŭt hlăm adŭ 9 phung nai dlăng adŭ bi hgŭm hŏng phung nai mtô klei hriăm mbha êpul hđeh sang hră čŏng ksiêm dlăng klei thâo pô bi mmlă srăng lŏ dơ̆ng hriăm gưl 3 amâodah hriăm bruă. Sang hră gưl 2 să Đăk Mar kčah hdră kñăm hâo hưn, mtô mblang, mtrŭt mjhatt êbeh 80% hđeh sang hră mnuih djuê ƀiă hriăm ruê̆ gưl III leh anăn hriăm bruă čiăng mjng bruă mă mâo hnơ̆ng jăk kơ să.

Lê Xuân Hưng, Khua dlăng bruă đảng să Đăk Mar lač, bi mni kơ klei đru mguôp mơ̆ng phung nai mtô sang hră gưl 2 să Đăk Mar hŏng bruă sang hră leh anăn ngă hdră kñăm ala čar mkŏ mkra krĭng ƀuôn sang mrâo ti să: “Phung nai mđĭ lar sơăi ai tiê bruă klam boh nik phung nai mtô ti dŭm anôk mtô. Êlâo dih să mkŏ mkra krĭng ƀuôn sang mrâo dŭm sang hră mâo klei đru mguôp jăk snăk rơ̆ng hnơ̆ng jăk leh anăn ênoh hđeh hlăm adŭ hriăm. Anei jing sa hnơ̆ng kčah kơ bruă sang hră yuôm bhăn snăk. Gưl 2 nao hriăm bruă leh anăn lŏ hriăm gưl 3 phung hđeh ngă jăk, amâo mâo ôh klei hđeh sang hră amâo nao hriăm bruă. Anei ăt jing sa phŭn mtô bi hriăm knuă druh mnuih djuê ƀiă kơ să.

Hŏng klei đru mguôp hlăm bruă bi hriăm mnuih ăt msĕ mơh mkŏ mkra krĭng ƀuôn sang mrâo, mâo lu thŭn sang hră gưl 2 să Đăk Mar mâo anăn knăl bi lông: Êpul êdah kldưn, anôk bruă dhar kreh… Amâo djŏ knŏng krơ̆ng kjăp klei tŭ dưn să djăp hnơ̆ng čuăn krĭng ƀuôn sang mrâo ôh, thŭn 2021 mrâo êgao să Đăk Mar, kdriêk Đăk Hà, čar Kon Tum ăt jing să djăp hnơ̆ng čuăn krĭng ƀuôn sang mrâo hnơ̆ng jăk hĭn./.