Dôk ti ktuê êlan knông lăn Việt Nam – Campuchia, dua să Mỹ Quý Đông leh anăn Mỹ Quý Tây jing anôk mâo lu klei in jin, tlĕ dăp, ba mnuih găn knông lăn in jin. Ti anăp klei anăn, thŭn 2012 Kđông kahan răng mgang knông lăn Mỹ Qúy Tây bi hgŭm hŏng Anôk bruă gĭt gai lĭng kahan, kahan ksiêm kdriêk Đức Huệ leh anăn bruă sang čư̆ êa dua să pŏk ngă gru hmô “Ênai tŭok mrŭk krĭng knông lăn”, gru hmô mâo mnuih ƀuôn sang khăp leh anăn khăng hưn mthâo kơ êpul kahan răng mgang knông lăn grăp blư̆ mâo klei. Trung tá Cao Xuân Hiền – pô dlăng bruă kđi čar, kđông kahan răng mgang knông lăn Mỹ Quý tây, lĭng kahan răng mgang knông lăn čar Long An brei thâo:

Mơ̆ng bruă hâo hưn mtrŭt mjhar snăn mnuih ƀuôn sang thâo săng klei yuôm bhăn gru hmô “ênai tŭk mrŭk krĭng knông lăn”. Mơ̆ng klei thâo săng anăn mnuih ƀuôn sang gĭr mđing mđrăm mbĭt hŏng kahan răng mgang knông lăn  leh anăn êpul mkăn nao hgŭm jing ba klei tŭ dưn kơ gru hmô “tông tŭk mrŭk krĭng knông lăn” Yap mơ̆ng leh pŏk ngă truh ară anei čar mkŏ mjing klei êđăp ênang ti alŭ wăl dưi krơ̆ng kjăp, klei in jin, mnăm kpiê êsei, bi čik bi čăm hrŏ lu”

Mơ̆ng mphŭn pŏk ngă gru hmô, knuă druh răng mgang kđông kahan răng mgang knông lăn ktrâo lač kơ mnuih ƀuôn sang hŏng hdră tông tŭk mrŭk hlue si klei kčah hjăn, mkŏ mjing klei hriăm mjuăt dŭm boh klei čiăng kơ mnuih ƀuôn sang leh anăn êpul bruă djŏ tuôm ngă djŏ hdră kčah. Mơ̆ng klei hriăm mjuăt, mnuih ƀuôn sang thâo bi knăl ti ênai tŭk mrŭk hưn kơ klei mtuh, ênai tŭk mrŭk hưn kơ klei bi čik bi čăm amâodah tlĕ dăp čiăng ba mnơ̆ng dhơ̆ng čiăng êdi sĭt nao đru. Võ Văn Bình ti alŭ 3, să Mỹ Qúy Đông, kdriêk Đức Huệ, čar Long An brei thâo:

Jih jang klei mâo ti alŭ wăl snăn mâo mnuih ƀuôn sang nao ai. Klă klơ̆ng msĕ si tơdah mâo klei hlăm gŏ sang snăn ênai tŭk mrŭk anăn srăng lar čiăng kơ mnuih ƀuôn sang bi kƀĭn đru kơ gŏ sang. Leh anăn klei bi mguôp plah wah mnuih ƀuôn sang hŏng bruă sang čư̆ êa alŭ wăl, kđông răng mgang knông lăn tliêr kjăp snăk”

Dôk ti alŭ wăl 2 să adôk mâo lu klei dleh dlan, lu mnuih ƀuôn sang ênưih mâo arăng mjhua đru kơ phung ngă soh, kyua anăn Kđông kahan răng mgang knông lăn Mỹ Quý Tây khăng bi hgŭm hŏng êpul kahan ksiêm, êpul lĭng kahan alŭ wăl mkŏ mjing klei hâo hưn mtrŭt mjhar mnuih ƀuôn sang hgŭm răng mgang êlan knông lăn leh anăn răng kriê ƀuôn sang êđăp ênang, răng mgang klei êđăp ênang čar kwar. Truh ară anei dŭm gŏ êsei mâo lăn mkra mjing bi knông hŏng ala čar Campuchia čih anăn răng mgang knông lăn bi knông hŏng kdrêč lŏ pô, mơ̆ng anăn klei êđăp ênang knông lăn dưi hơĭt kjăp, klei ngă soh hŏng hdră biăn dưi hrŏ lu.

Hŏng mnuih ƀuôn sang tinei, knuă druh, lĭng kahan kđông răng mgang knông lăn Mỹ Quý Tây ară aneu jing phung găp djuê mơ̆ng gŏ sang. Ăt kyua anăn mơh, tơdah hdră êlan djŏ mơ̆ng lĭng kahan răng mgang knông lăn mâo mnuih ƀuôn sang ư ai leh anăn jih ai tiê hŏng dŭm êpul răng mgang knông lăn, krơ̆ng kjăp klei êđăp ênang klei dưi čar kwar. Mkŏ mjing êlan knông lăn Việt Nam – Campuchia êđăp ênang, đĭ kyar./.

Knuă druh kđông kahan răng mgang knông lăn Sông Trăng, lĭng kahan răng mgang knông lăn Long An ktrâo lač mnuih ƀuôn sang yua ênai mmông tơdah mâo klei amâo jăk ti alŭ wăl.