5 thŭn êlâo, ayŏng Phan Hữu Trung ti alŭ Đha Mi, să Ba, kdriêk Đông Giang, čar Quảng Nam dôk hlăm gŏ sang dleh dlan, amâo mâo bruă mă hơĭt. Leh mâo hdră nao mă bruă ti ala tač êngao, ayŏng Phan Hữu Trung mâo bruă sang čư̆ êa alŭ wăl đru ngă hră mơar lĭng čan 200 êklăk prăk mơ̆ng knơ̆ng prăk đru ba ala ƀuôn čiăng nao mă bruă ti ala tač êngao. Leh 3 thŭn mă bruă ti Japon, ñu dưui mkiêt mkuôm sa ênoh prăk. Êngao kơ ênoh prăk anăn, klei thâo mă bruă mơ̆ng ñu mđĭ hĭn. Mâo prăk anăn, Phan Hữu Trung wĭt hŏng ƀuôn sang duh bi liê ngă bruă dŭ mdiăng, mâo hnư hrui wĭt. Ayŏng Phan Hữu Trung brei thâo:

“Êlâo dih gŏ sang kâo dleh dlan, kyua mâo bruă sang čư̆ êa alŭ wăl mđĭ ai leh anăn uêñ mĭn brei nao mă bruă ti Japon. Grăp mlan mâo mâo 32 êklăk prăk. Ară anei klei hdĭp amâo lŏ dleh dlan msĕ hŏng êlâo. Ară anei hlăm alŭ wăl mâo lu phung nao mă bruă ti ala tač êngao”.

Hluê ngă hdră êlan mrô 3 “Mđĭ klei mtô bruă mă leh anăn mgaih msir bruă mă kơ mnuih mă bruă krĭng mnuih djuê ƀiă leh anăn krĭng čư̆ čhiăng”, kdriêk Đông Giang dưi mâo klei đru êbeh 3 êklai prăk. Alŭ wăl anei ăt knăm ngă bruă ba mnuih nao mă bruă ti ala tač êngao. Hluê anăn, mnuih mă bruă dưi đru kơ ênoh hriăm bruă, hriăm klei blŭ tač êngao, mkă dlăng klei suaih pral leh anăn ngă hră mơar, lĭng čan hŏng knơ̆ng prăk đru ba ala ƀuôn. Nao hlăm anôk mă bruă ti ala tač êngao, mnuih mă bruă jing mnuih djuê ƀiă amâo djŏ knŏng mâo hnư hrui wĭt, tlaih ƀun ƀiădah lŏ dưi mâo klei hriăm, klei thâo čiăng wĭt mă bruă hlăm ƀuôn sang.

Mơ̆ng thŭn 2022 truh kơ ară anei, kdriêk Đông Giang ba leh êbeh 150 čô năo mă bruă ti ala tač êngao. Đỗ Hữu Tùng, k’iăng khua bruă sang čư̆ êa kdriêk čư̆ Đông Giang, čar Quang Nam brei thâo, kluôm kdriêk Đông Giang mâo 15.000 čô hlăm ênuk thŭn mă bruă ƀiădah ênoh mnuih nao mă bruă ti ala tač êngao ka lu ôh:

“Hdră êlan mđĭ hĭn bruă mrô bruă mă leh anăn mgaih msir bruă mă kơ mnuih mă bruă krĭng mnuih djuê ƀiă leh anăn krĭng čư̆ čhiăng hlăm hdră ala čar knăm mđĭ kyar bruă duh mkra ala ƀuôn krĭng mnuih djuê ƀiă leh anăn krĭng čư̆ čhiăng, kâo ƀuh anei jing hdră êlan klă klơ̆ng leh anăn tŭ dưn. Mnuih ƀuôn sang thâo săng klă kơ klei nao mă bruă ti ala tač êngao mâo hnư hrui wĭt, mâo klei hdĭp hơĭt. Anei jing klei năng mơak. Anăp anei, kdriêk Đông Giang mtrŭt mđĭ bruă đru kčĕ, mkŏ mjing klei hưn mdah bruă mă hlăm lăn čar leh anăn êngao lăn čar dưi thâo kơ klei nao mă bruă ti ala tač êngao”.”

Hlăm wưng êgao, dŭm kdriêk čư̆ čhiăng Quảng Nam hâo hưn leh anăn mkŏ mjing lu adŭ mtô bruă mă leh anăn đru kơ mnuih mă bruă nao mă bruă ti ala tač êngao. Mơ̆ng thŭn 2022 truh kơ ară anei, čar Quảng Nam ba leh êbeh 4 êbâo čô mă bruă nao mă bruă, lu hĭn nao mă bruă ti Dhŭng Korea, Japon, Lào, Đài Loan. Čiăng đru kơ mnuih mă bruă nao mă bruă mâo wưng kčah ti ala tač êngao, dŭm dhar bruă djŏ tuôm čar Quảng Nam mkŏ mjing leh lu gưl hưn mdah bruă mă, ksiêm dlăng klei čiăng mă bruă čiăng đru kčĕ kơ mnuih mă bruă.

Čar Quang Nam bi klă nao mă bruă ti ala čar tač êngao jing sa hlăm dŭm hdră êlan klă klơ̆ng hlăm bruă mkŏ mjing bruă mă, mđĭ hnư hrui wĭt. Kyuanăn, grăp thŭn, dŭm knơ̆ng, dhar bruă, alŭ wăl mđĭ hĭn bruă hâo hưn, hlăk mblang hdră êlan mơ̆ng knŭk kna kơ ba mnuih nao mă bruă ti ala tač êngao. Čar ăt mkŏ mjinmg hdră êlan ksiêm dlăng, tĭng mkăn ênoh mnuih hlăm ênuk thŭn mă bruă, ksiêm dlăng kơ klei čiăng nao mă bruă ti ala tač êngao, hluê anăn, čŏng pô bi mguôp hŏng dŭm anôk bruă ba mnuih nao mă bruă ti ala tač êngao găl guôp hŏng klei thâo mnuih mă bruă. Nguyễn Qui Quý, k’iăng khua knơ̆ng bruă mnuih mă bruă, kahan êka êkeh leh anăn yang ƀuôn čar Quảng Nam brei thâo:

“Bi kơ bruă ba mnuih mă bruă ti ala tač êngao, hlăm wưng êgao mâo khua gĭt gai čar Quang Nam uêñ mĭn. Anei jing bruă klam yuôm bhăn hlăm bruă bi hrŏ ƀun hơĭt kjăp ăt msĕ mơh bi mdrŏng kơ dŭm gŏ sang, boh nik ti dŭm kdriêk čư̆ čhiăng. Bruă ba mnuih mă bruă nao mă bruă ti ala tač êngao hŏng klei kuôl kă mâo lu klei mlih jăk leh anăn mâo klei lar bra, ênoh mnuih nao mă bruă ti ala tač êngao ƀrư̆ hruê ƀrư̆ đĭ, klei hdĭp gŏ sang dưi bi hơĭt, lu klei mlih bruă mă leh anăn pŏk mlar klei ngă bruă:

Dưi lač, hŏng  klei nao mă bruă ti ala tač êngao hluê klei kuôl kă dưi mkŏ mjing klei găl kơ mnuih mă bruă ti čar Quang Nam mđĭ hnư hrui wĭt, bi hơĭt klei hdĭp, đru mđĭ hnơ̆ng tŭ jăk mnuih mă bruă, bi hrŏ ƀun hmar leh anăn kjăp.