Ƀuôn Huổi Lẹ, să Nậm Giôn, kdriêk Mường la, čar Sơn La mâo 100% mnuih ƀuôn sang djuê ana La Ha hdĭp mda. Klei êdah tal êlâo êjai truh ti nei jing êlan gŭ drŏng prŏng leh anăn doh siam, dŭm boh sang krum dôk ti krah đang ƀoh, sang hră mơar, sang kƀĭn ƀuôn dưi rŭ mdơ̆ng kdrưh kơăm leh anăn kjăp. Ƀiădah knŏng ƀiă đuč mnuih thâo, 10 thŭn êlâo, Huổi Lẹ jing sa hlăm dŭm boh ƀuôn 5 amâo mâo “amâo mâo pui kmlă, amâo mâo êlan klông, amâo mâo sang hră mơar, amâo mâo êa doh leh anăn amâo mâo êlan pui kmlă dăng kông” klei hdĭp mnuih djuê ana La Ha ti nei jih thŭn knŏng wĭr wĭr hŏng bruă pưk, bruă hma, klei ngă bruă hlue knhuah đưm amâo mâo đĭ kyar, kyuanăn mâo wưng hlăm ƀuôn amâo mâo ôh sa gŏ sang dưi tlaih mơ̆ng klei ƀun ƀin. Čiăng dưi mâo klei siam msĕ hruê anei jing sa klei yăl dliê dlông kơ klei gĭr mơ̆ng gưl bruă Đảng nah gŭ, bruă sang čư êa, jing klei uêñ mĭn, răng kriê mơ̆ng Đảng leh anăn knŭk kna hŏng dŭm hdră êlan mkăp kơ mnuih ƀuôn sang jing mnuih djuê ƀiă leh anăn yuôm hĭn jing klei hrăm mbĭt, sa ai mơ̆ng mnuih ƀuôn sang. Lò Văn Pau, khua Ƀuôn Huổi Lẹ, să Nậm Giôn, kdriêk Mường La, čar Sơn La brei thâo:

Truh kơ ară anei mâo leh klei hơĭt, mâo êlan dưi găn jih 4 yan kyâo mâo êlan gŭ drŏng truh kơ ƀuôn, truh kơ să, klei êrô êbat ngă bruă mơ̆ng mnuih ƀuôn sang mâo klei găl êdi. Êlan êlâo dih ăt mâo mơh ƀiădah kdlưh hroh jih kyua yan adiê, ƀiădah mâo Đảng leh anăn knŭk kna uêñ mĭn duh bi liê, kyuanăn ară anei mâo klei hơĭt.

Đảng viên Lò Văn Phương thŭn anei 60 thŭn leh, dưi thâo kơ ñu jing sa čô mâo klei đăo knang leh anăn jing pô mâo klei bi hmô nao êlâo hlăm bruă mđĭ kyar klei hdĭp mda, gĭr ktưn lăm lui klei ư̆ êpa, bi hrŏ klei ƀun ƀin. Thŭn 2016, gŏ sang Lò Văn Phương mbĭt hŏng 60 gŏ snag ti ƀuôn Huổi Lẹ dưi mâo êmô mjeh, bê mjeh leh anăn ana ƀơ̆ng boh hluê si hdră đru mđĭ kyar bruă duh mkra ala ƀuôn dŭm djuê ana mnuih djuê ƀiă, wưng thŭn 2016 – 2025 mơ̆ng knŭk kna, ñu bi klă nao hlăm alŭ mtô bi hriăm, ba jao klei kreh knhâo – hdră mnêč, kriê dlăng ana pla mjing, mnơ̆ng rông leh anăn dưi nao čuă dlăng, tui hriăm čiăng dưn yua hlăm klei ngă bruă, kyuanăn dưi ba wĭt boh tŭ dưn kơ bruă duh mkra. Ară anei, gŏ sang ñu mâo êbeh 1ha pla boh soai, giăm 20 drei êmô kbao leh anăn 30 drei bê, grăp thŭn ba wĭt êbeh 150 êklăk prăk, ñu ăt jing sa čô mnuih djuê ana La ha êdah êdi ti čar Sơn La dưi mâo mă hră pah mni mơ̆ng Khua knŭk kna kyua mâo boh tŭ kdlưn hĭn hlăm bruă mkŏ mjing klei bi mguôp djuê ana leh anăn mđĭ kyar bruă duh mkra ala ƀuôn krĭng mnuih djuê ƀiă. Lò Văn Phương brei thâo:

Êlâo dih, klei hdĭp mnuih ƀuôn sang La Ha hmei dleh dlan êdi, klei hdĭp mda knŏng čŏng pô đuč, grăp gŏ sang jing gŏ sang ƀun ƀin sơăi. Kyua mâo Đảng, knŭk kna đru brei mjeh mnơ̆ng rông, ana pla mjing, mtô kơ mnuih ƀuôn sang hdră čoh bruă ngă hma, mđĭ kyar klei hdĭp mda, kyuanăn ară anei klei hdĭp gŏ sang kâo leh anăn mnuih ƀuôn sang ƀuôn Huổi Lẹ mâo leh klei mlih hlăm lu mta, grăp sang mâo tivi, anak čô dưi nao sang hră mơar, mnuih ƀuôn sang La Ha hmei srăng bi mguôp nanao, hluê ngă djŏ hdră êlan mơ̆ng Đảng, gĭr ktưn čoh bruă ngă hma, mđĭ kyar klei hdĭp mda, mkŏ mjing ƀuôn sang Nậm Giôn ƀrư̆ hruê ƀrư̆ trei mđao, đĭ kyar.

Kdriê Mường La mâo 822 gŏ sang mnuih La Ha hdĭp mda ti 18 ƀuôn, hlăm 10 să, dŭm să kbưi hŏng wăl krah, hnơ̆ng gŏ sang ƀun ƀin dôk lu êdi, hnơ̆ng tŭ jăk klei hdĭp mnuih ƀuôn sang dôk ti hnơ̆ng ƀiă. Mơ̆ng thŭn 2019 truh kơ ară anei, kdriêk mkăp leh 18 êklai prăk čiăng đru kơ mnuih ƀuôn sang ti dŭm ƀuôn blei masin, kdrăp yua, đru brei 122 drei bê mjeh. 654 drei êmô mjeh kơ 776 gŏ sang mnuih djuê ana La Ha, mkŏ mjing hdră duh ƀơ̆ng đru kơ mnuih ƀuôn sang mđĭ kyar leh anăn bi hơĭt klei hdĭp mda. Mbĭt anăn mkŏ mjing 3 adŭ mtô mjuăt bi hriăm kơ 209 čô knuă druh jing mnuih djuê ƀiă, đru mđĭ hĭn boh tŭ bruă čung ba mnuih ƀuôn sang ti gưl nah gŭ. Nguyễn Trọng Hiệp, Khua adŭ bruă djuê ana kdriêk Mường La brei thâo:

Bi hŏng mnuih ƀuôn sang dŭm djuê ana ti kdriêk Mường La, bruă sang čư êa čar Sơn La mâo leh klei bi klă mrô 2407 kơ hdră đru mđĭ kyar bruă duh mkra ala ƀuôn kơ mnuih ƀuôn sang djuê ana La ha. Anei jing hdră êlan hjăn leh anăn đru kơ mnuih djuê ana La Ha mđĭ kyar kluôm ênŭm leh anăn mđĭ hĭn khưm djuê ana, lăm lui klei ư̆ êpa, bi hrŏ klei ƀun ƀin leh anăn mđĭ hnơ̆ng klei hdĭp, bi hrŏ ƀun hŏng klei kjăp.

Hŏng dŭm hdră êlan đru kluôm ênŭm, duh bi liê hrăm mbĭt mơ̆ng Đang leh anăn knŭk kna, klei hdĭp mnuih ƀuôn sang djuê ana La Ha ti kdriêk Mường La dôk mâo dŭm klei mlih jăk, rup krĭng ƀuôn sang ƀrư̆ ƀrư̆ dơ̆ng jing leh ti dŭm ƀuôn êlan krĭng čư̆ čhiăng, mnuih ƀuôn sang ƀrư̆ ƀrư̆ mâo klei mlih hlăm hdră duh ƀơ̆ng, mđĭ kyar klei hdĭp mda, bi mguôp kriê pioh leh anăn bi lar knhuah dhar kreh, sa ai đăo kang hluê Đảng, hrăm mbĭt hŏng bruă Đảng nah gŭ, bruă sang čư êa bi mdrŏng ƀuôn sang.