ŏng klei hưn “Mkŏ êrah Việt Nam”, thŭn anei, hdră anei dưi mkŏ mjing hlăm wang 2 mlan ti 48 čar, ƀuôn prŏng hlăm kluôm ala. Ti čar Dak Lak, anei jing thŭn tal 10 mkŏ mjing hdră hŏng mta kñăm mâo mă ƀiă êdi 500 hnơ̆ng êrah, mbĭt anăn hâo hưn kơ phung mda asei kơ klei ruă mčah êrah mơ̆ng tian amĭ ăt msĕ hŏng klei ksiêm dlăng gang mkhư̆ klei ruă anei.

Hdră anei ti čar Dak Lak mâo mă klei sa ai, nao hgŭm mơ̆ng lu mnuih ƀuôn sang, amâodjŏ knŏng ti ƀuôn prŏng ƀiădah wăt kơ krĭng taih kbưi. Hluê anăn dưi hmao mkăp brei êrah đru kơ klei dŏng mdrao leh anăn mdrao mgŭn, mgaih msir klei kƀah hin êrah hlăm wưng yan hjan leh anăn dŭm hruê knăm, thŭn mrâo. Hŏng bruă anei kñăm hâo hưn kơ mnuih ƀuôn sang thâo săng klă kơ bruă myơr êrah. Hluê anăn, mkŏ mjing êpul čŏng ngă bruă, mtrŭt mjhar mnuih ƀuôn sang myơr êrah dŏng mnuih.