Bi ala Đảng, Knŭk kna, Khua knŭk kna m’ĭt leh asăp čuă êmuh jăk siam truh kơ di aduôn, di amĭ, phung amai adei mniê Việt Nam. Khua knŭk kna mñă, phung mniê Việt Nam mơ̆ng dŭm ênuk gưl mâo bruă klam yuôm, đru mguôp hlăm hdră mkŏ mkra, răng mgang lehanăn mđĭ kyar lăn čar. Đảng lehanăn Knŭk kna mđing nanao kơ klei mtăp mđơr êkei mniê lehanăn klei đĭ kyar mơ̆ng phung mniê hŏng lu hdră êlan mtrŭn kñăm mjuăt bi hriăm, dlăng kriê klei suaih pral, đru kơ phung mniê mphŭn čô̆ kơ bruă… Hŏng hdră mtrŭn anei, Việt Nam dưi mjing leh wăl anôk jăk, găl čiăng phung mniê dưi bi mklă k’hưm, bruă klam lehanăn mâo lu klei găl đru mguôp kơ gŏ sang, bruă mă lehanăn yang ƀuôn. Khă snăn, hluê Khua knŭk kna, drei dôk lu bruă čiăng ngă kñăm ba wĭt klei hdĭp jăk hĭn kơ phung mniê, čiăng digơ̆ dưi đru mguôp kơ yang ƀuôn, kơ lăn čar, amâo lui hlei pô dôk ti tluôn. Khua knŭk kna mñă klă: “Klei blŭ hrăm kñăm mđing hmư̆, bi msir mghaih lehanăn mâo klei đua klam hĭn hlăm bruă hluê ngă klei mtăp mđơr êkei mniê lehanăn klei đĭ kyar mơ̆ng phung mniê ti 3 mta bruă phŭn: Phung mniê hŏng hdră mđĭ kyar bruă duh mkra, Phung mniê lehanăn dŭm hdră đru kơ yang ƀuôn, mtăp mđơr êkei mniê, Phung mniê lehanăn ênuk gưl êdei. Brei drei dlăng wĭt dŭm bruă dưi ngă, ka dưi ngă čiăng mâo hdră hluê ngă, mjing boh kdrŭt mă bruă, ba myơr klei thâo mơ̆ng phung amai adei mniê. Klei blŭ hrăm amâo dưi msir mghaih jih boh klei ƀiădah drei brei thâo săng, gĭr msir mghaih klei dleh kpăk, gĭr ktưn kpưn đĭ lu hĭn”.

Hŏng ai tiê ngă phŭn mil pô, klă mngač, phung bi ala mâo leh klei êmuh, bi êdah klei mĭn čiăng, klei dleh dlan, gun kpăk. Khua knŭk kna mbĭt hŏng dŭm Phŭn, dhar bruă wĭt lač leh klei dôk mđing mĭn mơ̆ng phung mniê kluôm ala. Boh nik, bruă phung mniê dưi mă čan prăk duh bi liê găl ênưih hĭn. Aduôn Đỗ Thị Ninh thuộc hlăm Êpul mă ngăn prăk Tình Thương ti Nghi Lộc, čar Nghệ An brei thâo: “Čiăng ngăn prăk brei čan jing kdrăp mnơ̆ng ba yua tŭ dưn đru hluê ngă Hdră mtrŭn mơ̆ng knŭk kna hlăm bruă bi hrŏ klei čan prăk hŏng ênoh prăk mnga ktrŏ, bi hrŏ ƀun h’ĭt kjăp; akâo kơ Knŭk kna mâo hdră msir pŏk mlar êpul mnuih dưi čan lehanăn mkăp prăk brei čan kơ dŭm êpul bruă ngăn prăk mbĭt anăn mđing mjing klei găl dŭm hdră tĭng tla prăk mơ̆ng dŭm anôk bruă ngăn prăk.

Hluê si Khua knŭk kna Phạm Minh Chính – Knơ̆ng prăk knŭk kna brei mâo hdră đru kơ dŭm êpul bruă ngăn prăk hlăm hdră mă bruă lehanăn pŏk mlar êpul mnuih dưi čan kñăm bi hrŏ klei čan prăk hŏng ênoh prăk mnga ktrŏ. “Dŭm êpul mnuih mă čan prăk anei dôk ƀiă snăn Knơ̆ng prăk si srăng ngă čiăng pŏk mlar ênoh čan, wưng čan bi djŏ guôp, snăn kơh dưi mjing klei găl, leh pŏk mlar brei mâo hdră kčah rơ̆ng dưi mkăp djăp ênŭm prăk čan snăn kơh dưi mkhư̆ klei čan prăk hŏng ênoh prăk mnga ktrŏ. Ară anei, čiăng bi hrŏ klei čan prăk hŏng ênoh prăk mnga ktrŏ brei mâo lu anôk bruă hrăm mbĭt ngă bruă, bi knơ̆ng prăk si srăng ngă čiăng phung amai adei dưi čan prăk hŏng klei găl ênưih, rơ̆ng klei čiăng čan ƀiădah brei rơ̆ng mâo djăp klei găl dưi tla nư”.

Mbĭt anăn, mâo lu phung bi ala mniê mâo klei êmuh djŏ tuôm kơ hdră msir čiăng phung mniê krĭng ƀuôn sang nao hgŭm lehanăn mâo lu klei đru mguôp hŏng hdră mkŏ mkra krĭng ƀuôn sang mrâo, hdră msir mtrŭt mđĭ klei mtăp mđơr hlăm bruă ksiêm hriăm kdrăp kreh knhâo, mrâo mrang; akâo kơ Khua knŭk kna gĭt gai anôk bruă djŏ tuôm ngă hră m’ar čiăng tŭ yap lehanăn bi mklă Ao dai Việt Nam hlăm anăn knhuah dhar kreh amâo êdah klă ala čar./.