Mrâo anei, ti ƀuôn prŏng Đà Lạt, Êpul bruă hđeh êdam êra Cộng sản Hồ Chí Minh gưl dlông bi mguôp hŏng bruă Đảng čar, bruă sang čư êa čar Lâm Đồng mkŏ mjing knăm mđup brei klei pah mni Lương Định Của tal 17 leh anăn klei pah mni klei bi lông hdră čô kơ bruă bruă hdeh êdam êra krĭng ƀuôn sang thŭn 2022. Găn 17 thŭn mkŏ mjing, klei pah mni Lương Định Của dưi pah mni 2.050 “ƀĭng ngă lŏ hma kdlưn hĭn”. Leh anăn thŭn anei, klei pah mni anei dưi mđup brei kơ 32 čô hđeh êdam êra kdlưn hĭn hŏng klei mĭn gĭr ktưn kpưn đĭ kơ mdrŏng leh anăn mâo boh tŭ dưn hlăm kluôm ala.

Blŭ hlăm knăm anăn, Trần Tuấn Anh, khua hlăm Phŭn bruă kđi čar, Khua êpul bruă duh mkra gưl dlông bi êdah klei hơ̆k mơak kơ klei ƀrư̆ hruê ƀrư̆ mâo lu knơ̆ng bruă, Êpul hgŭm bruă, đang war mrâo mơ̆ng phung mda asei, dŭm klei bi hmô bi mguôp mđĭ kyar bruă duh mkra hlăm bruă lŏ hma, krĭng ƀuôn sang dưi hmar jing dŭm klei bi hmô jăk hĭn hlăm alŭ wăl leh anăn tar rŏng lăn. Hlăm dŭm čô mâo mă klei pah mni Lương Định Của thŭn 2022, lu phung mda asei mâo hnư hrui wĭt êbeh 30 êklăk prăk leh anăn mâo pô truh kơ 706 êklai prăk, prăk mnga dŭm êklai hlăm sa thŭn. Boh nik, lu phung hđeh êdam êra jing mnuih djuê ƀiă ti dŭm alŭ wăl dôk mâo lu klei dleh dlan ƀiădah hŏng klei mĭn leh anăn klei gĭr dưi kpưn đĭ kơ mdrŏng, jing phung mdrŏng sah mda asei. Anei jing dŭm mta phŭn hlăm hdră bruă hđeh êdam êra bi lông ngă bruă mkra mjing, mnia mblei, hlăk thŭn mdah hrăm mbĭt mkŏ mkra krĭng ƀuôn sang mrâo ti alŭ wăl. Hŏng dŭm klei bi hmô, bruă ngă klă klơ̆ng dưi mđĭ ai dŭm gưl phung hđeh êdam êra krĭng ƀuôn sang dưi mâo lu boh tŭ dưn mơ̆ng klei mă bruă knuă. Trần Tuấn Anh brei thâo:

“Drei mkŏ mjing klei pah mni phung ƀĭng ngă lŏ hma mda asei kdlưn hĭn, diñu jing dŭm knuh mnga siam hĭn hlăm dŭm êklăk čô mda asei dôk đru mguôp ai tiê, klei thâo, klei jhŏng, klei kreh kriăng kơ klei mđĭ kyar bruă lŏ hma, mkŏ  mkra krĭng ƀuôn sang mrâo. Kâo mâo klei đăo knang, hŏng klei khăp čiăng, hing ang mơ̆ng grăp čô mda asei dưi mâo mă klei pah mni hruê anei, srăng lŏ dưi ba lar truh kơ phung đoàn viên, hđeh êdam êra hlăm grăp alŭ wăl, anôk bruă, đru mtrŭt mđĭ hdră bi lông mkra mjing, mnia mblei, mkŏ mkra krĭng ƀuôn sang mrâo mâo lu klei đĭ kyar hĭn hlăm wưng kơ anăp.”

Trần Tuấn Anh ăt mñă kơ dŭm gưl bruă Đảng nah gŭ, bruă sang čư êa, dŭm phŭn, dhar bruă čiăng uêñ mĭn lu hĭn kơ phung hđeh êdam êra, sa ai leh anăn mkŏ mjing klei găl hĭn čiăng kơ phung mda asei kluôm ala, hlăm anăn mâo phung hđeh êda êra krĭng ƀuôn sang đru mguôp ai tiê, klei thâo, nao êlâo hlăm bruă mđĭ kyar bruă duh mkra – ala ƀuôn, hluê ngă tŭ jing hdră bi mrâo mrang ala čar leh anăn mrâo mrang bruă lŏ hma, krĭng ƀuôn sang.

       Hlăm knăm anăn, 32 čô hđeh êdam êra kdlưn hĭn dưi hrŏng mă mơ̆ng 81 hră mơar hrŏng ruah mơ̆ng 45 čar, ƀuôn prŏng hlăm kluôm ala mâo mă klei pah mni Lương Định Của thŭn 2022. Êpul mkŏ mjing mđup brei leh klei pah mni kơ 9 hdră kdlưn hĭn (mâo 1 klei pah mni mrô 1, 2 klei pah mni mrô 2, 3 klei pah mni mrô 3 leh anăn 3 klei pah mni mđĭ ai), holăm ênoh 31 hdră nao hlăm klei bi lông knhal tuč klei bi lông Hdră čô̆ kơ bruă mơ̆ng hđeh êdam êra krĭng ƀuôn sang thŭn 2022.

Ăt djŏ tuôm hŏng klei čô̆ kơ bruă mơ̆ng phung hđeh êđam êra krĭng ƀuôn sang, hlăm hruê kăm êgao, Êpul hgŭm phung hđeh êdam êra čar Dak Lak mkŏ mjing leh hdră mtô bi hriăm mđĭ hĭn klei thâo, dưn yua klei kreh knhâo mrâo mrang hlăm klei ngă bruă lŏ hma leh anăn ba čhĭ mnơ̆ng dhơ̆ng kơ phung hđeh êdam êra jing mnuih djuê ƀiă. Nao hgŭm hlăm adŭ hriăm mâo êbeh 100 hđeh êdam êra jing mnuih djuê ƀiă dôk mkra mjing, mnia mblei hlăm bruă lŏ hma leh anăn phung knuă druh Êpul hgŭm bruă hđeh êdam êra ti alŭ ƀuôn sang hlăm čar.

Phung nao hriăm dưi mâo klei mtô klei thâo boh tŭ kơ jih jang bruă, klei bi mguôp, klei ngă bruă hlăm bruă dưn yua boh tŭ kơ jih jang hlăm bruă mkra mjing leh anăn ba čhĭ mnơ̆ng dhơ̆ng, klei thâo rang mdah leh anăn čhĭ mnơ̆ng dhơ̆ng. Hluê ngă hŏn êpul kơ boh tŭ jih jang bruă, mkŏ mjing mblah internet điện tử leh anăn čhĭ mnơ̆ng online. Ayŏng Lê Pas Tơr, Khua kiă kriê Êpul hgŭm hđeh êdam êra čar Dak Lak brei thâo, anei jing bruă ngă hluê si hdră mơ̆ng Êpul bruă hđeh êdam êra gưl dlông Việt Nam kñăm đru kơ phung hđeh êdam êra jing mnuih djuê ƀiă ti alŭ wăl čar dưi mâo thiăm klei thâo, klei hriăm, klei kreh knhâo, hdră mnêč ngă bruă hlăm bruă lŏ hma, đru mđĭ kyar bruă duh mkra ala ƀuôn.

“Hlăm wưng klei ngă bruă lŏ hma mơ̆ng hđeh êdam êra čar Dak lak mâo hnơ̆ng klei kreh knhâo mrâo mrang ăt msĕ hŏng bruă dưn yua klei kreh knhâo mrâo mrang hlăm bruă mkra mjing ăt dôk mâo lu klei dleh dlan. Bruă mtô mjuăt kơ klei dưn yua klei kreh knhâo mrâo mrang hlăm klei ngă bruă kơ phung hđeh êđam êra jing bruă tal êlâo hĭn. Êpul bruă đoàn, hội hrăm mbĭt nao hgŭm hŏng hdră kơ klei čô̆ kơ bruă, boh nik jing klei hrăm mbĭt hŏng phung hđeh êdam êra mkŏ mjing bruă mă, čô̆ kơ bruă.