Hlăm klei kƀĭn anei, Phŭn bruă kđi čar tŭ ư ba mdah hdră mtrŭn kơ hdră tă, bruă klam mđĭ kyar ƀuôn prŏng Hồ Chí Minh hŏng mta kñăm truh ti thŭn 2030 jing ƀuôn prŏng bruă tuh tia mrâo mrang, ba anăp hlăm bruă duh mkra mrô, yang ƀuôn mrô, jing krĭng phŭn bruă duh mkra, ngăn prăk, bruă mnia mblei, kreh knhâo mrâo mrang, dhar kreh ti alŭ wăl Ngŏ Dhŭng Asi, ñŭ kma hŏng tar rŏng lăn.

Truh ti thŭn 2045, jing anôk phŭn bruă duh mkra, ngăn prăk, mnia mlei Asi, jing anôk dưi iêo mthưr tar rŏng lăn, bruă duh mkra, dhar kreh đĭ kyar jăk, hnơ̆ng tŭ jăk klei hdĭp, jing ƀuôn prŏng đĭ kyar knar hŏng dŭm ƀuôn prŏng dlông rŏng lăn. Phŭn bruă kđi čar mtă kơ ƀuôn prŏng Hồ Chí Minh lŏ dơ̆ng bi lar knhuah gru cách mạng, bi mguôp kjăp hŏng dŭm anôk bruă leh anăn dŭm alŭ wăl hluê ngă tŭ dưn hdră mtrŭn. Mđĭ kyar bruă duh mkra hmar, kjăp, mđĭ hnơ̆ng tŭ jăk, boh tŭ dưn leh anăn ai dưi bi ktưn tar rŏng lăn, mđĭ hĭn klei bi mguôp krĭng, mtrŭt mđĭ bruă mkŏ mkra, rơ̆ng kơ bruă mkŏ mkra nao êlâo sa knhuang.