Alŭ 17 ară anei dưi mkŏ hŏng wăl krah să Ea Ning, truh kơ kdriêk Čư̆ Kuiñ hŏng êlan bê tông prŏng, mâo pui mtrang mngač hlăm mlam. Hlue si Nguyễn Văn Bá, sa čô mnuih ƀuôn sang ti alŭ 17, ktuê êlan anei dưi mkŏ mjing mơ̆ng klei hrăm mbĭt đru mguôp mơ̆ng grăp čô mnuih kơ prăk kăk, myơr lăn leh anăn lu hruê ai mă bruă. Klei hrăm mbĭt, sa ai tiê mnuih ƀuôn sang alŭ 17 ăt đru kơ klei êđăp ênang alŭ wăl dưi krơ̆ng kjăp, klei khăp ƀuôn sang dưi hyuă kjăp, klei tlĕ dăp mnơ̆ng dhơ̆ng lŏ hma bi rai mnơ̆ng pla mjing amâo lŏ mâo. Nguyễn Văn Bá brei thâo, mnuih ƀuôn sang hlăm alŭ ară anei hơĭt ai tiê mă bruă.

Êlâo dih, anei jing alŭ wăl dleh dlan, phung ngă soh truh kơ phung tlĕ dăp, yua ma tuĭ, hiu tlĕ ăt mâo. Ƀiădah mơ̆ng leh pŏk ngă jih jang mnuih ƀuôn sang ngă jăk bruă klei êđăp ênang leh anăn răng mgang alŭ, ƀuôn, klei êđăp ênang čar kwar snăn mâo klei nao ai mơ̆ng jih jang ƀuôn sang, snăn hmei dưi msưh kdĭn klei amâo jăk hlăm krĭng anei ƀrư̆ dưi hrŏ. Êdah kdlưn jing khua ƀuôn Mao, ñu mâo ai tiê đua klam hlăm bruă knuă, mâo klei thâo, klei kriê dlăng, mkŏ mjing hdră truh kơ klei pŏk ngă hdră êđăp ênang hlăm alŭ, ƀuôn ti grăp ƀuôn sang.

 Pô mâo anăn Mao mơ̆ng Nguyễn Văn Bá lač jing Lê Xuân Mao, khua alŭ 17 mơ̆ng thŭn 2014, hlăk kahan ksiêm ruah anei jing anôk ngă gru hmô “Wăl mnuih ƀuôn sang êđăp ênang, amâo mâo phung ngă leh anăn klei amâo jăk hlăm ala ƀuôn”. Čiăng kơ bruă mkŏ mjing gru hmô hnưm dưi mâo klei tŭ dưn klă sĭt, Lê Xuân Mao kčĕ kơ gưl bruă Đảng, bruă sang čư̆ êa alŭ wăl mkŏ mjing dŭm hruê hâo hưn, blŭ hrăm hŏng mnuih ƀuôn sang, bi grăng klei amâo thâo bi djŏ, mđĭ klei bi hgŭm, mđĭ klei khăp, bi mjum phung ngă soh. Lê Xuân Mao lŏ hdơr:

Hmei mkŏ mjing gru hmô wăl mnuih ƀuôn sang êđăp ênang, amâo mâo phung ngă soh leh anăn klei amâo jăk hlăm ala ƀuôn, truh ară anei mâo 8 thŭn leh. Hmei khăng mkŏ mjing klei bi kƀĭn, hâo hưn kơ mnuih ƀuôn sang kơ klei răng mgang klei êđăp ênang čar kwar, jing grăp čô mnuih ƀuôn sang jing lĭng kahan. Tal dua mâo 5 êpul bi hgŭm hlăm alŭ snăn grăp alŭ jing sa êpul gang mkhư̆ phung ngă soh. Hmei hâo hưn, mkŏ mjing akŏ kơ bruă răng mgang klei êđăp ênang, leh anăn mđĭ klei thâo săng mnuih ƀuôn sang čiăng hdĭp mbĭt hĭn leh anăn ngă jăk hĭn čiăng rơ̆ng klei êđăp ênang.

Êlan bêtông mkŏ alŭ 17 hŏng wăl krah să jing boh tŭ klei mnuih ƀuôn sang bi hgŭm, sa ai tiê

 Mơ̆ng klei hâo hưn, pŏk ngă, truh ară anei, mnuih ƀuôn sang alŭ 17 jao leh 5 ƀĕ phao čŏng mkra mjing, đru mđĭ ai 12 čô êdam êra khăng ngă soh hdră bhiăn leh anăn ƀuăn rơ̆ng amâo lŏ ngă soh. Êpul čŏng kriê dlăng alŭ ksiêm dlăng, thâo ƀuh leh anăn hgŭm gang mkhư̆ 34 klei phung êdam êra bi čik bi čăm, ruh mgaih 23 êpul êdam êra kƀĭn êgao mmông kčah ngă luič klei êđăp ênang, mơ̆ng gŏ sang čiăng iêô jak mnuih ƀuôn sang đru mñă leh anăn kriê dlăng phung êdam êra amâo ngă soh hdră bhiăn.

 Mao ăt bi hgŭm hŏng êpul kahan ksiêm să msir mgaih 14 klei bi čik bi čăm, bi grăng 20 klei bi ngă hlăm yang ƀuôn, đru thâo ƀuh, kčŭt 5 klei in jin, mkăp kơ kahan ksiêm să 12 klei hâo hưn mâo ênoh yuôm pioh kơ hdră ksiêm dlăng.

 Kyua anăn, mơ̆ng alŭ wăl mâo klei êđăp ênang dleh ktuê dlăng, truh ară anei, alŭ 17 ƀrư̆ jing krĭng êđăp ênang, amâo mâo phung ngă soh. Đại úy Bùi Văn Trọng, Khua kahan ksiêm să Ea Ning, kdriêk Čư̆ Kuiñ lač, gru hmô wăl mnuih ƀuôn sang êđăp ênang, amâo mâo phung ngă soh leh anăn klei amâo jăk hlăm ala ƀuôn ti alŭ 17 mđĭ lar leh klei tŭ dưn hlăm bruă răng mgang klei êđăp ênang, hơĭt klei hdĭp mda mnuih ƀuôn sang ti alŭ wăl să.

Hŏng klei tŭ dưn mơ̆ng gru hmô anăn snăn ăt jing klei ksiêm dlăng bruă klam mơ̆ng Lê Xuân Mao, Khua anôk bruă gru hmô, snăn mđĭ ai tiê đua klam hlăm bruă rơ̆ng klei êđăp ênang ti alŭ 17 ăt msĕ mơh ti kluôm să. Ñu hur har, jih ai tiê hlăm bruă kriê dlăng, đru mguôp prŏng snăk kơ kahan ksiêm să ăt msĕ bruă sang čư̆ êa alŭ wăl hlăm hdră rơ̆ng klei êđăp ênang. Mơ̆ng klei tŭ dưn dưi mâo ti gru hmô alŭ 17 snăn kahan ksiêm să ăt bi lar 2 gru hmô ti alŭ 24 leh anăn alŭ 22 ti să Ea Ning.

Lê Xuân Mao (nah điâo) pioh mnĭt mmông blŭ hrăm hŏng mnuih ƀuôn sang hlăm alŭ

 Mơ̆ng knhal jih thŭn 2021, Mao mdei ngă khua ƀuôn alŭ 17, ngă Khua Êpul hgŭm phung khua thŭn leh anăn Êpul hgŭm phung djŏ êa drao ruă đioxin să Ea Ning. Ñu ăt jing pô bi ala êpul gơ̆ng bruă ƀuôn sang gưl kdriêk leh anăn Knơ̆ng bruă čar kwar Việt Nam kdriêk čư̆ Kuiñ.  65 thŭn, ñu ăt siă suôr hŏng mnuih ƀuôn sang hlăm alŭ, pioh lu mmông êmuh hrăm, mđĭ ai phung hlue ngă klei phat kđi leh anăn lŏ wĭt ñŭ kma hŏng êpul êya, mđĭ ai digơ̆ kriăng mă bruă, amâo lŏ êbuh.

 Hŏng klei đru mguôp anăn, Lê Xuân Mao dưi mâo mnuih ƀuôn sang đăo knang, khăp hơêng dưi mâo hră pah mni mơ̆ng Knơ̆ng bruă sang êa čar leh anăn Khua knơ̆ng bruă kahan ksiêm čar Dak Lak. Mrâo anei, Mao ktưn hưn jing sa hlăm 15 čô êdah kdlưn kluôm ala mâo Khua Phŭn bruă kahan ksiêm mđup brei Hră pah mni kyua mâo klei đru mguôp kơ hdră gang mkhư̆ phung ngă soh leh anăn hdră jih jang mnuih ƀuôn sang răng mgang klei êđăp ênang čar kwar thŭn 2022.