Hruê mbruê 17/7, Khua bruă kƀĭn ala Vương Đình Huệ mbĭt hŏng êpul ngă bruă mâo leh klei mă bruă hŏng Êpul khua bruă Đảng čar Quảng Trị. Leh 34 thŭn mkŏ mjing čar, Quảng Trị dôk ƀrư̆ ƀrư̆ mlih mrâo leh anăn đĭ kyar. Quảng Trị ƀrư̆ hruê ƀrư̆ gĭr ktưn, hnơ̆ng bruă duh mkra ƀrư̆ hruê ƀrư̆ pŏk mlar, đru mguôp hlăm klei đĭ kyar mbĭt mơ̆ng ala čar. Hnơ̆ng đĭ kyar mnơ̆ng dhơ̆ng hlăm alŭ wăl (GRDP) kah knar wưng thŭn 2021 – 2022 mâo 6,9% hlăm sa thŭn, 6 mlan akŏ thŭn 2023 đĭ 6,52%. Hnư knŭk kna hrui wĭt thŭn 2021 mâo 160% klei tĭng mkă leh anăn thŭn 2022 mâo 113% klei tĭng mkă.

Bi kơ bruă hluê ngă hdră mtrŭn mrô 43 mơ̆ng Bruă kƀĭn ala kơ hdră êlan ngăn prăk đru kơ Hdră krŭ wĭt leh anăn mđĭ kyar bruă duh mkra ala ƀuôn leh anăn hdră mtrŭn mrô 11 mơ̆ng knŭk kna kơ bruă krŭ wĭt leh anăn mđĭ kyar bruă duh mkra ala ƀuôn dưl hluê ngă jăk. Blŭ bi klă hlăm mmông mă bruă, Khua bruă kƀĭn ala Vương Đình Huệ mtă kơ bruă Đảng čar mjêč bi leh hră mơar čuăl mkra čar Quảng Trị wưng thŭn 2021 – 2030 čiăng ba yua, bi lar klei găl mơ̆ng čar. Mñă klă kơ mta phŭn klei hmăng hmưi êđăp ênang ti Quảng Trị, Khua bruă kƀĭn ala Vương Đình Huệ lač, jing krĭng lăn tŭ lu klei jhat mơ̆ng boh ƀom, boh mtuh hlăm 2 klei bi blah mơ̆ng djuê ana, Quảng Trị jing anôk găl čiăng bi êdah klei hmăng hmưi kơ klei êđăp ênang.