VOV4.Êđê- Mrâo êgao, Êpul êdam êra Cộng sản Hồ Chí Minh dŭm čar hlăm krĭng Lăn Dap Kngư mkŏ mjing leh Klei bi kƀĭn wưng thŭn 2022-2027. Mơ̆ng anăn brei ƀuh, hlăm wưng êgao, bruă êdam êra leh anăn hdră phung êdam êra hđeh điêt hlăm krĭng mâo lu klei jăk siam, hŏng lu hdră bruă klă sĭt ti grăp alŭ wăl.

Hluê si klei hưn ti Anôk bi kƀĭn bruă Đoàn Êdam êra Cộng sản Hồ Chí Minh čar Gia Lai tal XV, wưng êgao, phung êdam êra alŭ wăl pŏk leh lu hdră bruă klă sĭt. Anăn jing hdră “Phung êdam êra ba anăp yan mdei prŏng”, “Bi mlih klei mĭn, bruă ngă hlăm krĭng mnuih djuê ƀiă čiăng ƀrư̆ gĭr ktưn kpưn đĭ tlaih kơ ƀun h’ĭt kjăp”, “Phung êdam êra Gia Lai hgŭm kngan hgao klei ruă tưp”. Mơ̆ng anăn, mđĭ lar ai tiê ba anăp mơ̆ng phung đoàn viên, êdam êra.

 Ƀri gưl anei, Anôk kiă kriê bruă Đoàn čar Gia Lai mkŏ mjing leh Hdră bi mni kơ dŭm êpul, mnuih mâo boh tŭ kdlưn hĭn hlăm hdră bruă Đoàn lehanăn êdam êra wưng thŭn 2017 – 2022. Klă klơ̆ng, mâo 27 čô lehanăn 28 êpul; Khua anôk bruă sang čư̆ êa čar Gia Lai mđup brei leh Hră pah mni kơ 5 êpul lehanăn 10 čô mnuih, mâo boh tŭ kdlưn hĭn hlăm hdră bruă Đoàn lehanăn êdam êra. Ayŏng Lê Thế Đô, Khua bruă Đoàn kdriêk Čư̆ Prŏng mâo Anôk bruă sang čư̆ êa Gia Lai pah brei klei pah mni brei thâo:

“ Hlăm wưng thŭn 2017 – 2022 mâo lu klei dleh dlan, boh nik klei ruă tưp, ƀiădah hŏng klei gĭr mơ̆ng phung êdam êra Gia Lai dưi mâo leh boh tŭ dưn klă sĭt hlăm bruă đoàn lehanăn êdam êra. Hruê anei, kâo m’ak jing knuă druh đoàn dưi brei klei pah mni lehanăn dlăng anei jing boh kdrŭt čiăng kơ kâo lŏ gĭr hĭn, đru myơr klei thâo pô kơ bruă đoàn lehanăn bruă êdam êra ti čar pô đĭ kyar hĭn”.

Hŏng pruê̆ blŭ “Hgŭm mguôp – Ba anăp – Pral kdal – mĭn mrâo”, Klei kƀĭn bruă Đoàn êdam êra Cộng sản Hồ Chí Minh čar Gia Lai tal XV tă leh 13 hnơ̆ng čuăn phŭn hlăm wưng 2022 – 2027. Sa hlăm dŭm bruă phŭn jing hluê ngă tŭ jing dŭm gru hmô, hdră msir đru kơ phung êdam êra, hluê ngă jăk hdră đru kơ mnuih knap mñai, hdră ba anăp čiăng đru mguôp hlăm hdră msir klei ư̆ êpa, mkŏ mkra krĭng ƀuôn sang mrâo ti alŭ wăl. Ayŏng Lê Trọng Phúc, Khua bruă Đoàn kdriêk Đức Cơ lač:

“ Čang hmăng dŭm bruă mâo mtrŭt mjhar hlăm phung êdam êra, hrăm mbĭt hŏng êdam êra, boh nik hdră mphŭn čô̆ kơ bruă kñăm mjing klei găl kơ phung êdam êra gĭr ktưn kpưn đĭ. Čang hmăng phung bi ala kdlưn hĭn mâo djăp klei thâo, hur har kơ bruă ba hdră đoàn lehanăn hdră êdam êra mơ̆ng čar đĭ kyar hĭn”.

Anôk bi kƀĭn bruă Đoàn Êdam êra Cộng sản Hồ Chí Minh čar Gia Lai tal XV

Msĕ snăn, hruê kăm êgao, bruă Đoàn êdam êra Cộng sản Hồ Chí Minh čar Dak Lak mkŏ mjing leh Klei kƀĭn tal 12, wưng thŭn 2022 – 2027. Gru kruăk hlăm 5 thŭn êgao mơ̆ng phung êdam êra Dak Lak jing hluê ngă êbeh 6 êbâo hdră bruă êdam êra hŏng ênoh prăk giăm 97,5 êklai prăk. Êpul knuă druh Đoàn dŭm gưl mđĭ lar nanao ai tiê đua klam, ba anăp, hur har hŏng bruă êdam êra, jing pô phŭn atăt gai hdră bi ktưn khăp kơ ala čar hlăm phung êdam êra. Ƀri gưl anei, bruă Đoàn čar Dak Lak bi mni leh 25 hdră bruă êdam êra lehanăn 34 čô knuă druh Đoàn êdah êdi wưng thŭn 2017 – 2022. Amai Lương Thị Nga, Khua bruă Đoàn să Ia Rvê, kdriêk Êa Sup mâo bi mni gư anei, brei thâo:

      “Kâo m’ak êdi yơh. Tal dua kâo ƀuh ktưn hưn jing pô mâo klei pah mni lehanăn čang hmăng hlăm wưng ti anăp kâo srăng gĭr hĭn čiăng năng hŏng anăn knăl pô mâo pah mni leh, dưi jak iêu lu phung đoàn viên êdam êra mŭt hlăm anôk bruă đoàn. Anei jing sa klei gĭr amâo djŏ mơ̆ng sa anôk bruă đoàn ƀiădah jih jang êpul bruă đoàn dưi bi hgŭm mbĭt, đru mtô mblang kơ phung đoàn viên, êdam êra”.

Dak Lak bi mni kơ 25 hdră bruă êdam êra lehanăn 34 čô knuă druh Đoàn êdah êdi

Êlâo anăn, Đoàn êdam êra Cộng sản Hồ Chí Minh čar Dak Nông jing êpul ba akŏ krĭng lăn dap kngư mkŏ mjing Klei bi kƀĭn wưng thŭn 2022 – 2027. Sa hlăm dŭm hdră êdah êdi mơ̆ng phung êdam êra Dak Nông jing nao hgŭm mkŏ mkra krĭng ƀuôn sang mrâo. Dŭm gưl bruă Đoàn pŏk leh giăm 7 êbâo hdră bruă êdam êra hŏng êbeh 38 êklai prăk. Phung êdam êra Dak Nông ăt pla mrâo êbeh 700 êbâo phŭn kyâo, mkra 127 anôk mjĕ mjuk, hlăp lêñ kơ phung hđeh, mkŏ mjing lu hdră đru kơ phung hđeh dleh dlan hŏng êbeh 15 êklai prăk.

Hŏng pruê̆ blŭ “Phung êdam êra Dak Nông ba anăp, čang hmăng, mĭn mrâo, đĭ kyar”, Klei kƀĭn bruă Đoàn êdam êra Cộng sản Hồ Chí Minh čar Dak Nông tal IV, wưng 2022 – 2027 mâo 12 êpul hnơ̆ng čuăn, 8 hdră bruă phŭn kñăm ngă bruă ba wĭt boh tŭ klă sĭt. Năng mđing, dŭm mta kñăm: Pla grăp thŭn 250 êbâo phŭn kyâo, đru 10 alŭ, ƀuôn dleh dlan bi leh hnơ̆ng čuăn mkŏ mkra krĭng ƀuôn sang mrâo, đru 200 êklai prăk kơ phung êdam êra čan mphŭn čô̆ kơ bruă; kah knar grăp thŭn hro êbeh 6% ênoh gŏ êsei ƀun phung êdam êra mnuih djuê ƀiă./.

VOV Tây Nguyên/Pô mblang H’Nêč Êñuôl