Amai Nay H'Tó ti să Ia Rtô, wăl krah Ayun Pa, čar Gia Lai hŏng anăn knăl “Kpiê čeh Jarai" djăp leh ênoh čuăn OCOP 3 mtŭ – jing mnơ̆ng OCOP tal êlâo hlăm să, ñu jhŏng mkŏ mjing hla pŏk facebook, zalo lehanăn fanpage "kpiê čeh Jarai Ayun Pa" čiăng hưn mdah mnơ̆ng pô čhĭ mnia. Amai Nay H’Tó brei thâo, klei ngă livestream hưn kơ klei mkra mjing, čiăng kơ phung tue thâo klă kơ bruă pô ngă, mơ̆ng anăn ênoh čhĭ mnia đĭ hin:

 “Leh djăp ênoh čuăn Ocop 3 mtŭ mơ̆ng wăl krah, snăn mâo mtam klei myun, mâo lu tue hrie tui duah. Mâo hĕ ocop leh snăn mnuih hriê blei đĭ hĭn truh kơ dua blư̆, mâo đa đa tue hrie mơ̆ng Hà Nội, ƀuôn prŏng Hồ Chí Minh. Pô ngă klei kuôl kă hŏng shipper, pô đŭn mnơ̆ng lehanăn iêo diñu ba yơh”.

Ăt msĕ hŏng amai Nay H’Tó, wưng leh êgao, mâo lu phung mniê mơ̆ng ƀuôn prŏng truh hlăm krĭng ƀuôn sang, krĭng mnuih djuê ƀiă hdĭp hlăm čar Gia Lai kreh kriăng bi hriăm êmuh, pai mă klei bi mlih mrô ba yua kdrăp mrâo mrang, jing hla pŏk yang ƀuôn pioh hưn mdah kơ mnơ̆ng dhơ̆ng pô mâo truh hŏng lu mnuih blei yua. Amai   Hoàng Thị Hồng Hà dôk ti alŭ Quý Đức, să Ia Trok, tnao hlăm klei rang mdah mnơ̆ng hŏng elektronik hlăm fanpage mơ̆ng Êpul hgŭm bruă mniê kdriêk Ia Pa jing ya-ua jing êa ksâo msăm hŏng diŏ kuêñ. Mmông ngă livestream mâo êbeh kơ 3.300 gưl čô mnuih dlăng, lehanăn mâo mtam dŭm êtuh čô mâo klei akâo blei:

Hlăm klei čhĭ Ya-ua anei mâo leh lu mnuih blei lehanăn đăo knang kơ mnơ̆ng pô lehanăn blei lu. Êpul hgŭm bruă mniê nao čuă dlăng, bi mguôp lehanăn ktrâo atăt kơ kâo bi mưng hŏng klei ba yua facebook, zalo mbĭt hŏng tik tok čiăng hưn mdah kơ mnơ̆ng dhơ̆ng pô čhĭ mnia. Kyua mâo êpul hgŭm bruă mniê snăn mnơ̆ng dhơ̆ng pô čhĭ đĭ lar hĭn, hưn mdah truh hŏng mnuih blei pral hĭn, hưn mdah kơ mnơ̆ng pô čhĭ jing jăk hĭn”.

Ară anei êpul hgŭm bruă mniê kdriêk Ia Pa mâo mkŏ mjing leh 5 klei bi hmô hlăm hdră ba yua kdrăp mrâo mrang, dưi ba wĭt leh klei tŭ dưn jăk. Anăn jing klei bi hưn mdah “Grăp mlan sa gru bi hmô kdlưn hĭn”, “Grăp hrue ngă sa bruă jăk”, “Grăp hrue kăm mâo sa mnơ̆ng jăk nao hlăm klei bi mnia mblei hŏng elektronik” hlăm hla pŏk yang ƀuôn; klei bi hmô Kiă kriê ƀĭng hgŭm amâo mâo hŏng hdră mơar ôh”, kdrêč “Mđing hmư̆ klei blŭ mơ̆ng ƀĭng hgŭm mniê’. Jih jang hdră bi hmô anei mâo đru mguôp leh kơ phung amai adei mniê alŭ wăl pral thâo bi djă yua kdrăp mrâo mrang, dưi hưn mdah leh djăp mta mnơ̆ng pô ciăng čhĭ mnia truh hŏng mnuih blei. Huỳnh Thị Ngọc Lan – Khua êpul hgŭm bruă mniê kdriêk Ia Pa lŏ brei thâo:

 “Hmei ƀuh jăk êdi hŏng dŭm bruă bi hmô anei “Grăp hrue kăm sa mta mnơ̆ng ba čhĭ hŏng elektronik”. Êlâo kơ hmei mkŏ mjign hdră êlan mă bruă msĕ snei, mâo mkŏ mjing leh dŭm klei ktrâo atăt kơ amai adei thâo ngă livestream hlăm hla pŏk yang ƀuôn facebook, zalo... Mơ̆ng klei bi mnia mblei hlăm elektronik, snăn lu phung amai adei  mâo leh klei găl dưi hưn mdah mnơ̆ng pô hlăm hla pŏk yang ƀuôn hŏng klei lar bra pral êdi”.

Hlăm kluôm čar Gia Lai, êpul hgŭm dŭm gưl mâo ngă leh truh 65 hdră bi hmô "Êpul mniê thâo ba yua kdrăp mrâo 4.0" lehanăn "Phung mniê ngă bruă hŏng klei bi mlih mrô” mâo leh dŭm êbâo čô amai adei hgŭm, bi mkŏ mjing êpul hŏng zalo, facebook, tiktok, lehanăn youtube….Tui si Rơ Chăm H’Hồng – Khua êpul hgŭm bruă mniê čar Gia Lai, bruă ba yua kdrăp mrâo đru leh kơ phung amai adei ƀrư̆ ƀrư̆ bi mlih hdră êlan duh ƀơ̆ng, lehanăn đru ba wĭt boh tŭ dưn hlăm êpul hgŭm ngă bruă, lehanăn mđĭ kyả klei hdĭp mda:

“Hmei lŏ dơ̆ng dưn yua jih hnơ̆ng klei hâo hưn hlăm êpul mâo mkŏ mjing leh mơ̆ng êpul hgŭm, hlăm website, mbah hâo hưn hŏng elektronik êpul hgŭm, hlăm zalo, facebook... mâo ngă hŏng klei pral truh hŏng jih jang ƀĭng hgŭm, thâo kơ dŭm hdră êlan mơ̆gn Êpul hgŭm, dŭm hdră mtrŭn mơ̆ng Đảng, mơ̆ng dŭm bruă hgŭm mkăn hlăm dŭm klei bi kƀĭn hŏng klei pral hĭn”./.