Truh ară anei, Êpul bruă mniê kdriêk Lâm Hà bi hgŭm hŏng Knơ̆ng prăk đru ba yang ƀuôn, Knơ̆ng prăk Lŏ hma mđĭ kyar krĭng ƀuôn sang đru kơ phung mniê dưi čan prăk ba wĭt klei tŭ. Mơ̆ng anăn, mâo êbeh 5 êbâo čô mniê dưi čan hŏng êbeh 140 êklai prăk, krơ̆ng kjăp 107 êpul mkiêt mkriêm lehanăn čan prăk êbeh 4.000 čô hŏng êbeh 9 êklai prăk.

Bruă ba yua prăk tŭ dưn đru leh kơ 480 gŏ sang ƀun mâo phung mniê ngă khua gŏ sang tlaih kơ ƀun. Aduôn K’Soanh, khua êpul bruă mniê să Phi Tô, kdriêk Lâm Hà brei thâo: “Hlăm hdră mđĭ kyar bruă duh mkra ti alŭ wăl ăt mâo gru bi hmô jăk hlăm hdră duh mkra gŏ sang, klei hdĭp đĭ kyar hĭn mkă hŏng gŏ sang mkăn. Êngao anăn, mnuih hlăm êpul lŏ hluê ngă kjăp hdră ƀă kkiêng anak, ba yua kdrăp mrâo hlăm bruă lŏ hma, msĕ si gru hmô sang ñuăl, sang ală kĭng…ba wĭt klei tŭ dưn”.