Ti krĭng knông lăn čar Dak Lak, Anôk bruă pui kmlă Êa Sup dôk kriê dlăng êbeh 21 êbâo čô tuê ba yua pui hŏng ênoh hrui wĭt grăp mlan hlăm brô 12 êklai prăk. Boh nik, êpul lŏ mkăp pui kơ 9 kđông kahan răng mgang knông lăn mơ̆ng Việt Nam lehanăn Campuchia. Hŏng krĭng lăn ala čư̆ čhiăng prŏng, mnuih ƀuôn sang hdĭp rah rưng, găn êrô dleh dlan.

Anôk bruă pui kmlă Êa Sup pral hluê ngă dŭm hdră msir rơ̆ng mkăp pui kmlă êđăp ênang, hơĭt kjăp.  Knuă druh, mnuih mă bruă ti anôk bruă pui kmlă ăt mkŏ mjing klei bi kƀĭn hŏng dŭm alŭ, ƀuôn, blŭ hrăm hŏng mnuih ƀuôn sang, kah mbha klei thâo hlăm hdră ba yua pui êđăp ênang, mblang dŭm mta klei djŏ tuôm kơ bryă pui kmlă.Êpul ăt bi mlih hdră hrui mă prăk pui djŏ guôp hŏng klei găl mâo mơ̆ng mnuih ƀuôn sang krĭng knông lăn, đru kơ mnuih ƀuôn sang dưi dưn dŭm hdră jăk găl mơ̆ng anôk bruă./.