Aê mdrao Nguyễn Thị Mới, Khua Adŭ mdrao klei ruă krĭng hlơr, Sang êa drao mdrao klei ruă hlăm phung hđeh čar Gia Lai brei thâo, Adŭ mdrao mâo 40 boh jhưng đih ƀiădah hlăm dŭm hruê êgao, ênoh mnuih ruă mƀlĕ sruê đĭ lu, mâo hruê êbeh 100 čô hđeh ruă mƀĕ sruê dôk dŏng mdrao ngă kơ kơ adŭ mdrao bŏ mnuih ruă. Ênoh hđeh mƀlĕ sruê đĭ sa kdrêč kyua anei jing yan kreh mâo klei ruă anei mbĭt anăn mâo lu phung hđeh ka tlŏ mgang vaccine amâo dah tlŏ ka ênŭm ngă mđĭ ênoh hđeh mâo klei ruă lehanăn ngă kơ hđeh djŏ klei ruă anei đĭ kơ kjham pral hĭn mkă hŏng phung hđeh mkăn.

 “Klei ruă mƀlĕ sruê hlăm brô 3 mlan hŏng anei mâo klei bi êdah đĭ, kah knar ti adŭ mdrao mâo hlăm brô 100 čô ruă, mâo hruê dôk đih sa jhưng dua čô ruă, lŏ dưm jhưng, phung aê mdrao mđĭ hnơ̆ng ngă bruă truh dua bl mkă hŏng yang đar, boh nik hlăm wưng Têt suaĭ êdi” – Aê mdrao Nguyễn Thị Mới, brei thâo.

Dôk dlăng kriê anak 14 mlan dôk mdrao ti Adŭ mdrao klei ruă krĭng hlơr, amai Rơ Lan Tuyếr, ƀuôn T’nung, să H’Bông, kdriêk Čư̆ Sê brei thâo, ĕ ka tlŏ vaccine gang mkhư̆ klei ruă mƀlĕ sruê kyua anăn leh djŏ klei ruă anei ĕ đĭ kơ ktrŏ pral hĭn mkă hŏng phung hđeh mkăn. Truh kơ ară anei, ĕ dưi dŏng mdrao 3 hruê leh, ƀuh suaih ƀiă leh.

 “Anak kâo ruă ti sang 7 hruê êngoh amâo dul ôh kyua anăn kâo nao ti sang êa drao kdriêk, dôk mdrao tinei 7 hruê mơh lehkơnăn ba ti sang êa drao prŏng anei. Ară anei, ĕ suaih ƀiă leh, huă ƀơ̆ng, mem dưi mơh, bi êwa jăk ƀiă mơh, ăt dôk mtŭk mơh ƀiă, bi ruă tian eh mơêa jih leh.

Năng huĭ hyưt jing klei bi mtưp klei ruă hlăm phung hđeh ti dŭm anôk bruă mdrao mgŭn. Amai Yao, dôk ti alŭ 8, wăl krah Đăk Đoa, kdriêk Đăk Đoa mâo anak mrâo 5 mlan mâo klei truh amâo jăk hlăk ksŏ yăl dliê.

Ĕ dôk đih mdrao tinei dơ̆ng mơ̆ng hruê 2 Têt, êlâo anăn ĕ ruă ksŏ dưi dŏng mdrao ti kdriêk Đăk Đoa hlăm 1 hruê kăm. Kyua hlăm kdriêk mâo hđeh ruă mƀlĕ sruê snăn leh dôk đih hlăm adŭ mdrao mbĭt ĕ kâo hlŏng tưp klei ruă anei mơh.

Mơ̆ng akŏ thŭn truh kơ ară anei, Sang êa drao mdrao klei ruă hlăm phung hđeh dŏng mdrao leh kơ giăm 500 čô hđeh mâo klei ruă mƀlĕ sruê, đĭ lu êdi mkă hŏng thŭn 2024. Aê mdrao Từ Mai Linh, Kơiăng khua Sang êa drao brei thâo, mơ̆ng klei mtă mơ̆ng Phŭn bruă mdrao mgŭn, sang êa drao mprăp leh mnuih mă bruă, kdrăp mnơ̆ng, adŭ bi ktlah ti dŭm adŭ mdrao čiăng pral hmao ƀuh mnuih mâo klei ruă mƀlĕ sruê lehanăn dŏng mdrao.

Sang êa drao ăt mkŏ dăp anôk ksiêm mkă dlăng, adŭ đih mdrao kñăm bi hrŏ klei bi tưp. Mđĭ ênoh mnuih mă bruă, mprăp ênŭm kdrăp mnơ̆ng, masin bi êwa, Cpap čiăng mdrao kơ mnuih ruă jăk hĭn. Tơdah ƀuh hđeh êngoh, mtŭk, hdrak, ƀlĕ sruê djŏ tuôm kơ klei ruă mƀlĕ sruê brei gŏ sang ba nao mtam ti anôk bruă mdrao mgŭn čiăng ksiêm mkă dlăng, mdrao djŏ hdră, bruă tlŏ vaccine gang mkhư̆ klei ruă mƀlĕ sruê ăt yuôm bhăn snăk lehanăn brei hđeh mphŭn tlŏ mơ̆ng 9 mlan, tlŏ djŏ, tlŏ ênŭm hluê si klei kčah mtrŭn mơ̆ng Phŭn bruă mdrao mgŭn./.