Tinei, lu knuă druh anôk bruă mdrao mgŭn hưn mdah leh klei gun kpăk brei pral dưi ruh mtlaih. Sa hlăm dŭm bruă mjêč ară anei anăn jing êmưt tĭng tla prăk ksiêm mkă dlăng mdrao klei ruă hluê ênua mdrao mgŭn êgao hdră đăo tĭng.

Nguyễn Đăng Giáp, Khua knơ̆ng sang êa drao prŏng krĭng Lăn dap kngư brei thâo, sang êa drao êgao leh ênoh đăo tĭng êbeh 54 êklai prăk ƀiădah truh kơ ară anei ka dưi tĭng tla, ba leh lu klei dleh dlan. Ñu akâo brei mâo hdră bi mlih klei anei amâo dah mkăp prăk êlâo. Êngao anăn, mâo lu klei blŭ bi êdah klei mđing uêñ hlăm bruă bi mŭt să, kdriêk srăng hmăi truh kơ hdră mă bruă mơ̆ng anôk bruă mdrao mgŭn, boh nik ti krĭng taih kbưi. Phung bi ala brei mâo hdră msir djŏ guôp hŏng klei găl mâo mơ̆ng grăp alŭ wăl. Mbĭt anăn ăt mâo lu klei blŭ hưn mdah klei dleh dlan hlăm bruă blei êa drao, kƀah mnuih ngă bruă, hdră mtrŭn jăk găl ƀiă lehanăn klei hưn mthâo kơ boh tŭ mnơ̆ng đru mdrao klei ruă mâo lu klei soh čhuai dôk mâo mtŭk mtŭl. Êpul bi ala anôk bruă kƀĭn ala ƀuăn srăng tŭ mă, bi mklin jih klei blŭ ba mdah kơ dŭm phŭn, dhar bruă ti Anôk bi kƀĭn kơ anăp./.