VOV4.Jarai -  Lơ 6/9, Grŭp črâo ba bruă pơgang, pơgăn klin Covid-19 tơring čar Lâm Đồng hmâo laih hră pơ-ar kơ bruă pơdơi ngă tui dô̆ čơlah mơnuih mơnam tui Tơlơi črâo ba 16 hăng 2 bôh să mơng plơi prong Đà Lạt tơdơi kơ anih klin ngă mơng Sang bruă pơkra mrai Đà Lạt dưi wai lăng.

Hlâo kơ anun, tơring čar Lâm Đồng čih hmâo 2 čô mơnuih ƀă klin Covid-19 lĕ mơnuih mă bruă ƀơi Sang bruă pơkra mrai Đà Lạt ƀơi să Trạm Hành, tơdơi kơ anun klin gluh đĭ kơtang tơbiă gah rơngiao. Tơring čar Lâm Đồng hmâo ba tơbiă tañ laih tơlơi pơsit ngă tui dô̆ čơlah mơnuih mơnam tui Tơlơi črâo ba 16 hăng 2 bôh să Xuân Trường hăng Trạm Hành mơng Đà Lạt, hrom hăng anun đing nao djop ngăn rơnoh kơ bruă hyu huĕt mă, ruah mă, dô̆ čơlah, pơgăn klin ruă. Tơdơi kơ rơbêh kơ 1 blan pok pơhai klă lu bruă mă, truh ră anai anih klin ngă anai dưi pơgăn laih, hăng abih bang rơbêh kơ 150 čô mơnuih bơdjơ̆ nao dưi pơsit ƀă kơman klin. Yap truh yang hrơi dŏng lơ 6/9, Lâm Đồng hmâo 258 čô mơnuih ƀă kơman klin Covid-19, amăng anun ba jơlan hlâo lĕ plơi prong Đà Lạt hăng abih bang 157 čô mơnuih./.

Siu H’ Prăk: Pô pơblang