VOV4.Jarai - Tui hăng Anom bruă tơhan pôlih wai lăng jơlan nao rai (Ding jum kông ang), 3 hrơi pơdơi Čơkă thun phrâo (mơng lơ 1/1 truh lơ 3/1), đơ đam dêh čar ta hơmâo 64 wơ̆t tơlơi truh rơdêh pơjrom, pơtlă, ngă kơ 38 čô mơnuih djai, 35 čô mơnuih ruă. Amăng mrô anai, ƀơi jơlan nao rai hơmâo 63 wơ̆t, ngă djai 37 čô, 35 čô mơnuih ruă. Ngă tui bruă wai lăng jơlan nao rai amăng hơdôm hrơi rơnuč thun, Hrơi čơkă thun phrâo, hrơi Tê̆t ngă yang thun phrâo Nhâm Dần hăng hơdôm tơlơi jơnum ngui čơkă bơyan bơnga thun 2022, amăng 3 hrơi rơgao, Tơhan kông ang wai lăng jơlan nao rai hơmâo hyu tir, bơtơhmal rơbêh 19.200 wơ̆t arăng ngă soh; đŭ prăk hơmâo 22,65 klai prăk; mă pơkŏng lui rơbêh 1.200 pok hră mơgat rơdêh, amăng anun hơmâo bơtơhmal 812 čô mơnuih mơgat rơdêh lơ̆m mơñum tơpai, 4 čô mơgat rơdêh lơ̆m yua jrao ma tuý.

Siu H’Mai: Pơblang