VOV4.Jarai -  Hrơi blung a rơwang hrơi tơjuh anai, Ding jum khul ling tơhan dêh čar ta hmâo pơphun ngă Lơphet bruă bơkơtưn pha ra hăng anăn ñu “Khul ling tơhan gum hrom đơ đam lŏn ia gum pran hrom, ha pran jua bơkơtưn pơgang, pơgăn hăng dưi pơgăn klin Covid-19”. Anăp nao ngă lơphet pơphun, mơnuih apăn bruă tơhan, ling tơhan ƀơi lu anom bruă amăng đơ đam dêh čar ta hmâo tui tơlơi pơtrun ba khul ơi ia jrao ling tơhan nao pơ̆ hơdôm bôh tơring čar kual Dơnung dêh čar ngă tui bruă jao pơgang pơgăn klin Covid-19.

Pơ ala kơ Ping gah Khul ling tơhan dêh čar ta, Ding jum Khul ling tơhan, Khul wai lăng bruă bơkơtưn hăng apah bơni Ding jum khul ling tơhan pơphun bruă bơkơtưn, Đại tướng Lương Cường Khua Anom apăn bruă kơđi čar Khul ling tơhan dêh čar lăi rơđah bruă bơkơtưn pha ra “Khul ling tơhan hrom hăng đơ đam dêh čar gum pran hrom, sa jua bơkơtưn pơgang, pơgăn hăng dưi pơgăn klin Covid-19”, ngă brơi rim mơnuih apăn bruă tơhan, ling tơhan thâo dơlăm pran jua “pơgăn klin kah hăng kơdŏng ayăt”, “jai tơnap lĕ jai kiăng bơkơtưn”, “hmâo gir run laih jai gir run hloh dong; hmâo gum hrom hơbit laih jai gum hrom hloh dong; hmâo pơsit pran laih jai pơsit pran jua hloh dong”, lăng yôm bruă gơgrong yua kơ mơnuih ƀôn sang, yua kơ lŏn ia, tơlơi pơmin gơgrong pô, yak rơgao tơlơi tơnap, tơlơi gun, prăp lui ba jơlan hlâo amăng pơgang, pơgăn klin, ngă giong prong bruă kơđi čar yôm phăn, lăng anun lĕ bruă jao blah mơng khul ling tơhan amăng rơnuk anai. Abih bang khul mơnuih apăn bruă tơhan, ling tơhan abih bang khul ƀơi hơdôm bôh tơring čar ƀôn prong leng kơtưn hơdôm bruă gum hrom, djru gưl ping gah, gong gai plơi pla pơsir tơlơi tơnap, djru pơhrui glăi hăng sĭ gơnam mă mơng đang hmua, djru gơnam kiăng yua kơ tơlơi hơdip hăng bơwih brơi tơlơi suaih pral kơ mơnuih ƀôn sang; prăp lui jơlan gah pơgang, pơgăn klin ƀơi rơnoh prong hloh kiăng hmao bŏng glăi, pơsir, ƀu pioh pơđar kah ngă, lom hmâo kah ngă hăng amăng djop bruă.

Đại tướng Lương Cường lăi rơđah abih bang khul ling tơhan đing nao bơkơtưn, pơdah tơlơi pơmin pơsit truh kih, gơgrong hlâo, klă, ba jơlan hlâo amăng gum hrom hăng ngă giong prong bruă pơgang pơgăn klin:

“Tô̆ tui lăng kơjăp tơlơi ƀơi plơi pla hăng tơlơi pơplih mơng klin kheng, biă ñu lĕ hơdôm anih anom phun kiăng hmao pơphô brơi hăng Ping gah khul ling tơhan, Ding jum khul ling tơhan, Grŭp mơnuih hyu mă bruă pha ra mơng Kơnuk kơna ƀơi kual Dơnung dêh čar, khua git gai, črâo bruă hăng Grŭp črâo ba bruă pơgang, pơgăn klin hơdôm gưl črâo ba ba glăi bôh tơhnal bruă pơgang, pơgăn klin. Gum hrom kơjăp na nao hăng gưl ping gah, gong gai hăng khul ling tơhan ƀơi plơi pla djă pioh kơjăp bruă mă mơng hơdôm grŭp, anih gak ƀơi guai lŏn ia, khom pơgăn khut khăt mut rai ča amăng lŏn ia. Pơphun klă hơdôm kual dô̆ čơlah, sang ia jrao yua pơgang pơgăn klin, gum hrom klă pơčrang lăng kơman hăng tlâ̆o vaccine pơgang klin kơ mơnuih ƀôn sang, pơjrao brơi mơnuih ruă, biă ñu mơnuih ruă kraih ƀơi hơdôm bôh sang ia jrao amăng hăng gah rơngiao kơ khul ling tơhan...”

Amăng mông ngă lơphet pơphun 220 bôh anom tô nao rai amăng abih bang khul ling tơhan anăp nao kơtang tơlơi pơphun bruă bơkơtưn pha ra hăng pơdah pran pơsit, pran jua, bruă gơgrong hăng hơdôm bruă mă sit nik amăng pơgang, pơgăn klin. Pơdŏng puih kơđông ƀơi hơdôm bôh tơring čar kual Dơnung dêh čar glăk hmâo tơlơi pơplih klin ngă tơnap, amăng anun hmâo ƀôn prong Hồ Chí Minh, Thiếu tướng Nguyễn Trường Thắng, Khua pơtrun bruă Quân khu 7 brơi thâo khă amăng tơlơi hơpă khul ling tơhan quân khu amra ba jơlan hlâo amăng pơgang, pơgăn klin:

“Abih bang khul ling tơhan pok tal bơkơtưn prong kơdŏng klin djru mơnuih ƀôn sang, gum hrom kơjăp hăng gưl ping gah, gong gai, khul grŭp hăng mơnuih ƀôn sang, hơdôm khul apăn bruă pok pơhai khop ha amăng plĕ, ngă tui tơpă hơdôm bruă pơgang, pơgăn klin, pok prong kual klă hiam, ngă ƀiă hĭ kual ƀu klă, anăp nao kual klă hiam pơplih mơng kual ƀu klă. Hrom hăng anun gum hrom ba glăi bôh tơhnal bruă djru pơtlaih rơpa, pơtlaih ruă, khut khăt ƀu pioh mơnuih ƀôn sang rơpa, kơƀah hăng tơnap tap”.

Hăng Khul ling tơhan pơgang guai lŏn ia, Ƀirô git gai Khul ling tơhan pơgang guai lŏn ia hơdôm bôh tơring čar kual Pơngŏ dêh čar hăng Pơngŏ kual Tŏng krah ruah mă 58 čô mơnuih apăn bruă ia jrao ling tơhan thâo bruă, hmâo lu tơlơi găn rơgao nao pơhrăm pơtô brơi mơng hơdôm nai pơtô, ơi ia jrao Sang hră pơtô bruă ia jrao pơhlôm hlâo khul ling tơhan hăng mơnuih apăn bruă anom ia jrao ling tơhan pơgang guai lŏn ia. Ƀing mơnuih nao hrăm dưi pơhrăm bruă mă, bôh thâo ngă tui pơgang, pơgăn klin Covid-19, prăp lui nao gum hrom hăng khul ling tơhan plơi kual Dơnung, prăp lui tŏng ten tum djop kiăng tañ dưi gum hrom pok pơhai hơdôm bruă mă, hrưn đĭ djru hrom hơdôm khul ling tơhan pơgang klin tañ pơgăn, ngă kơdun hăng pơgăn klin truh kih tui pran jua črâo ba mơng Khua dêh čar. Amăng mông ngă lơphet pơphun, Trung tướng Đỗ Danh Vượng khua apăn bruă ping gah, Ling tơhan pơgang guai lŏn ia lăi rơđah:

“Pơ ala kơ Ping gah, Khua pơtrun bruă kâo jao bruă mă kơ adơi ayong, čang rơmang mơng Ping gah, Khua pơtrun bruă, blung hlâo lĕ adơi ayong thâo rơđah anô̆ hŭi rơhyưt, tơlơi kiăng ječ mơng bruă pơgang, pơgăn hăng tơlơi pơmin tum djop bruă gơgrong, bruă mă ư-ang mơng khul ling tơhan lăi hrom, mơng bruă pơgang guai lŏn ia lăi ha jăn hăng biă ñu lĕ khul ơi ia jrao ling tơhan pơgang guai lŏn ia amăng bruă mă anai; ƀuh rơđah tơlơi ư-ang bruă gơgrong, hluai tui anun pơsit rơđah pran jua, tơlơi pơmin mơng pô gum hrom hăng abih bang khul ling tơhan, abih bang mơnuih ƀôn sang pơgang, pơgăn klin khom dưi. Ăt gơgrong čơkă mă mơn hơdôm bruă hơpă tui tơlơi rơkâo mơng rim ƀirô, anom bruă lom pô dưi iâu nao mă bruă, kiăng ngă hiưm hơpă ƀing ta pơgang pơgăn klă hloh hăng dưi pơgăn tañ hloh hăng klin Covid-19, pơhlôm tơlơi suaih pral, pơhlôm tơlơi hơdip kơ mơnuih ƀôn sang đơ đam dêh čar ta”.

Djơ̆ mơng lăi lĕ giăm hmâo 2 thun rơgao, ling tơhan pơgang guai lŏn ia jing khul ling tơhan ba jơlan hlâo mơng bruă pơgang, pơgăn klin, pơdŏng kual guai pơsơi ƀơi guai dêh čar hăng 1.974 grŭp dô̆ gak, rơbêh kơ 8221 čô mơnuih apăn bruă tơhan, ling tơhan pơgang guai lŏn ia gum hrom pơgăn tơlơi mut tơbiă ƀu djơ̆ phiăn hăng pơgang, pơgăn klin; pơphun bruă abih bang mơnuih ƀôn sang gum hrom pơgang, pơgăn klin Covid-19 hăng tơlơi mut tơbiă ƀu djơ̆ phiăn ƀơi djop anih glông guai lŏn ia hăng hmâo tơlơi pơčeh phrâo pơpha jơlan wai lăng bruă mut tơbiă ba glăi bôh tơhal, pơhlôm pơgang, pơgăn klin ƀơi hơdôm bah amăng guai lŏn ia; ƀu huĭ kơ tơnap, tơhnal lar hyu klin kiăng gum hrom djru mơnuih ƀôn sang ƀơi hơdôm kual dô̆ čơlah, kual guang dar. Mông ngă lơphet pơphun bruă tal anai jing pơdah rơđah pran jua prăp lui gum djru hơdôm anih klin ngă kơtang “nao pơ̆ anih hơpă, mă bruă hơget lom lŏn ia kiăng” mơng ling tơhan./.

Siu H’ Prăk: Pô pơblang