VOV4.Jarai - Sang bruă prăk Pơđĭ kyar kual ASIA (ADB) phrâo pơsit brơi prăk čan hơmâo 58 klăk dolar Mi hăng prăk djru ƀu kiăng brơi glăi 2 klăk dolar Mi đah mơng dưi hơdip hrŏm hăng tơlơi pơplih ayuh hyiăng, jơlan nao rai hăng brơi ia yua kơ hơdôm boh tơring čar ter hang ia rơsĭ Nam Trung Bộ mơng dêh čar Việt Nam lĕ Bình Định hăng Quảng Nam, biă ñu lĕ hơdôm boh tơring glông gah kual čư̆ siăng, kual ataih yaih, anih hơmâo lu mơnuih ƀon sang djuai ƀiă. Kơčăo bruă man pơkra anih anom djơ̆ hăng tơlơi pơplih ayuh hyiăng kơ mơnuih ƀon sang djuai ƀiă tal 1 amra pơkra hơmâo 121,8 km jơlan kiăo tui gru kač rup hlâo, dưi pơgăn glăi ayuh hyiăng ƀu lăp ngă, man pơkra 115 km đing pơđoh ia yua, hăng djru lăi pơthâo hmao tlôn, djơ̆ sit kơ ayuh hyiăng lŏn adai laih anun prăk pioh pơkra jing djơ̆ rơ-ua. Him lăng năng 243.000 čô mơnuih, amăng anun hơmâo 126.300 čô mơnuih ƀon sang amăng grup djuai ƀiă, amra hơmâo mă tơlơi gêh gal mơng kơčăo bruă anai ba glăi.

Siu H’Mai: Pơblang