VOV4.Jarai - Ngă tui bruă mă hăng gơgrong mơng sang prăk sĭ mơdrô ba jơlan hlâo amăng ngă tui hơdră bruă prăk kak, tuh pơplai bruă đang hmua, plơi pla mmơng thun 2020 truh ră anai, Agribank hmâo pioh lui laih rơbêh kơ 1.000 klai prăk kơmlai kiăng pơhrŏ trun kơmlai djru mơnuih čan yak rơgao klin Covid-19, hrom hăng anun pok pơhai lu jơlan hơdră brơi čan djru kơmlai, mrô kơmlai ƀiă hloh mơng 2% truh kơ 2,5% bơhmu hăng tơđar hăng mrô prăk čan rơbêh kơ 300.000 klai prăk pioh kơ anom bơwih ƀong găp ƀrô hăng anet, mơnuih čan lu, mơnuih hăng anom bơwih ƀong FDI.

Ƀơi anăp ngă tơnap mơng klin Covid-19 bơbečh truh prong djop mơta tơlơi hơdip mơda, bơwih ƀong, mơnuih mơnam; kiăng hmao djru kơ mơnuih čan tañ hơđong bruă bơwih ƀong sĭ mơdrô, yak rơgao tơlơi tơnap, Agribank gơgrong hlâo hrŏ trun dong prăk kơmlai kơ abih bang mơnuih hăng khul grŭp čan hăng prăk Việt Nam ƀơi Agribank.

Rơđah biă ñu, hăng prăk čan mơng lơ 15/7/2021, Agribank pơhrŏ trun dong 10% bơhmu hăng kơmlai brơi čan mă yua hăng prăk čan ƀiă hrơi hmâo kơmlai mơng 5% sa thun hăng lu hloh hăng prăk čan hrơi pơkă găp ƀrô, sui hrơi hmâo kơmlai mơng 7% sa thun hăng lu hloh. Him lăng, hăng bruă pơhrŏ trun dong kơmlai tal anai, Agribank pioh năng ai ñu 5.500 klai prăk pioh djru mơnuih čan.

Hrom hăng anun, Agribank ăt pơtlaih klă mơn tơlơi tơnap kơ mơnuih čan amăng ngă tui tơpă, ba glăi bôh tơhnal hơdôm jơlan gah djru kah hăng: Hơdră pơkă prăk čan hăng prăk kơmlai; Mơ-ĭt prăk ƀu rơngiă prăk apah amăng lŏn ia ta hăng djru rơbêh kơ 130 klai prăk kơ bruă pơgang, pơgăn klin Covid-19;... Tui anun, hăng bruă pơhrŏ trun dong kơmlai brơi čan, tal 5 tô̆ tui hmâo pơdah laih bruă ba jơlan hlâo, ngă tui khop mơng Agribank amăng bruă gum tơngan hrom Ping gah, Kơnuk kơna, Gong gai ngă tui “2 mơta bruă”: Pơtrut kơdun klin ruă hăng pơđĭ kyar bơwih ƀong. Jơlan hơdră pơhrŏ trun prăk kơmlai dưi pơkă truh abih lơ 31/12/2021 hăng dưi mă yua ƀơi 2.300 bôh anih mă bruă mơng Sang prăk Agribank amăng đơ đam dêh čar ta./.

Siu H’ Prăk: Pô pơblang