VOV4.Jarai - Ding jum ia jrao jao kơ hơdôm boh sang ia jrao gưl prong akŏ pơdong 3.000 boh sưng đih pơjrao mơnuih ruă kơtang ƀơi ƀon prong Hồ Chí Minh. Anun lĕ tơlơi pơsit mơng Khua ding jum ia jrao Nguyễn Thanh Long ƀơi mông ngă bruă hăng Ping gah ƀon prong, Jơnum min mơnuih ƀon sang ƀon prong Hồ Chí Minh kơ bruă pơgang klin ƀơi anai amăng mơguah lơ 29/7.

Rơngiao kơ sang ia jrao pơjrao tơlơi ruă kơtang 1.000 boh sưng đih, ƀon prong HCM amra hơmâo 3 anih pơjrao pơkŏn dong yua hơdôm boh sang ia jrao gơnong dlông gơgrong bruă.

Khua ding jum ia jrao ơi Nguyễn Thanh Long lăi, bruă kiăng lăp đing nao hloh mơng ƀon prong Hồ Chí Minh ƀơi mông anai lĕ ngă hiư̆m pă dưi pơjrao brơi ƀing ruă kơtang, đah mơng plai ƀiă hơmâo mơnuih djai. rơngiao kơ mơnuih apăn bruă hơdeč hmar hlâo kơ anun, Ding jum ia jrao iâu abih khua mua mơng anom bruă prong bơdjơ̆ nao, khua sang ia jrao yôm phara, sang ia jrao apăn bruă pơjrao sa tơlơi ruă mơng gơnong dlông nao pơ ƀon prong Hồ Chí Minh či akŏ pơjing anih pơjrao, biă ñu lĕ pơjrao brơi sông glăi tơlơi hơdip ƀing ƀă kman Covid-19.

Siu H’Mai: Pơblang