VOV4.Jarai - Anom bruă Kơnuk kơna phrâo ngă hră lăi pơthâo glăi lơ 7/11/2021 tơlơi pơhiăp mơng Kơ-iăng khua dêh čar ơi Vũ Đức Đam, ƀơi mông jơnum lăng amăng tivi hăng hơdôm boh tơring čar kual Yŭ Dơnung hăng Dap Kơdư kơ bruă pơgang klin Covid-19. Tơdơi kơ pơhmư̆ tơlơi lăi glăi mơng hơdôm boh tơring čar, tơlơi pơgôp hiăp mơng khua Ding jum ia jrao, Ding jum Kông an, Grup ngă bruă yôm mơng Kơnuk kơna hăng ƀing khua nao pơhmư̆ mông jơnum, Kơ-iăng khua dêh čar ơi Vũ Đức Đam kiăng Ding jum ia jrao ječ ameč kah pơpha, git gai bruă tlâ̆o vaccine ƀơi hơdôm tơring čar kual Dơnung hăng Dap Kơdư, pơhlôm tlâ̆o djŏp arăt 1 amăng 5 hrơi kơ mơnuih mơng 18 thun; tlâ̆o arăt 2 tañ, djŏp mơnuih; tlâ̆o brơi ƀing čơđai mơng 12 truh 17 thun. Ding jum ia jrao, Ding jum Ling tơhan prăp lui mơnuih djru kiăng tlâ̆o tañ hloh. Ding jum ia jrao pơtô ba rơđah, pơhlôm hơmâo jrao pơjrao brơi tañ mơng blung a mơtăm kơ ƀing ƀă klin F0 đah mơng plai ƀiă ruă kơtang, djai brŭ.

Siu H’Mai: Pơblang