VOV4.Jarai - Mơguah lơ 29/6, Anom jŭ yap lăi pơthâo mrô yap bơwih ƀong – mơnuih mơnam 6 blan akô̆ thun. Lăp đing nao, khă amăng tơlơi klin Covid-19 gluh glăi ƀơi lu anih anom, samơ̆ mrô gơnam amăng lŏn ia ta (GDP) 6 blan akô̆ thun ăt đĭ mơn 5,64%. Amăng rơnoh đĭ kyar hrom mơng abih bang bruă bơwih ƀong amăng ha mơkrah thun anai, kual đang hmua, đang kyâu, akan hơdang đĭ 3,28% bơhmu hăng thun hlâo. Bruă mă yua prăk kak, sang prăk hăng hră pơgang đĭ 9,27%. Kual sang măi hăng man pơdŏng đĭ 8,36%. Khă amăng hơdôm hrơi klin ngă bơdjơ̆ nao ƀu klă, samơ̆ mrô anom bơwih ƀong rơkâo pơdŏng phrâo amăng 6 blan akô̆ thun ăt hmâo mơn rơbêh kơ 67 rơbâo bôh anom bơwih ƀong, đĭ 8,1% bơhmu hăng thun hlâo hăng đĭ 34,3% gah prăk ngă hră mă yua. Tơlơi đĭ lu gah mrô hăng ngăn drăp mơng anom bơwih ƀong hmâo rơkâo pơdŏng phrâo brơi ƀuh tơlơi gir run hăng pran jua pơphun bruă mă mơng khul bơwih ƀong huă./.

Siu H’ Prăk: Pô pơblang