VOV4.Jarai - Mơng akŏ blan 11/2021 truh ră anai, tơring čar Gia Lai hơmâo ƀuh anih hơmâo klin Covid-19 prong ƀơi hơdôm boh plơi pla mơnuih djuai ƀiă ƀơi plơi prong Pleiku hăng tơring glông Đăk Đoa. Bruă klin ƀă hyu bơdjơ̆ nao bruă ngă ngor ngă yang rơbang, biă ñu mơyut jôk atâu amăng plơi.

Hơdôm hrơi anai, să Hà Bầu, tơring glông Đăk Đoa jing anih phrâo hơđuh đĭ klin mơng tơring čar Gia Lai. Amăng rơbêh ha wơ̆t hrơi tơjuh, tơring glông anai hơmâo 200 čô mơnuih ƀă klin Covid-19 ƀơi 6 boh plơi djuai ania ƀiă. Amăng anun, kơnong ƀơi plơi Nú hơmâo 88 čô. Lu mơnuih ƀă klin hơmâo pơsit lơ̆m gơñu nao mơñum ƀong amăng hrơi mơyut jôk atâu amăng 2 hrơi, lơ 10 hăng 11/11. Yă Dương Thị Kim Quý - Kơ-iăng khua Jơnum min mơnuih ƀon sang să Hà Bầu, tơring glông Đăk Đoa brơi thâo:

“Anom bruă git gai hơmâo jap kơ grup Covid-19 amăng plơi pla, pơtă pơtăn abih bang ƀu dưi tum pơƀut lu mơnuih; ƀuh mơnuih mơng plơi pla, mơng să pơkŏn lĕ čih glăi anăn. Pơhmu tui, ƀing Yuan ƀuh klin tui anun lĕ kơnong nao tŭi ñang, giong anun glăi hlao.  Samơ̆ neh met wa pơ anai lĕ phara, dŏ mă tơngan, ră ruai, ƀong ha bơbah asơi, mơñum sa kơčok tơpai ƀơ̆i kah mơng glăi. Yua hnun, pơgang klin tơnap biă”.

Tui tơlơi phiăn, plơi pla djru gơnam ƀong huă hrŏm hăng sang anŏ pơphun mơyut atâo amăng 3 hrơi.

Bơ ƀơi plơi prong Pleiku, ră anai abih bang 3 boh plơi djuai ania Jarai ta lêng hơmâo arăng pơgăn laih yua ƀuh hơdôm rơtuh čô mơnuih ƀă klin Covid-19, ăt bơdjơ̆ nao bruă mơyut jôk mơn. Ơi Rčom Thót, Khua git gai ping gah plơi Ốp (phường Hoa Lư, plơi prong Pleiku) brơi thâo, bruă mơyut jôk atâu tui tơlơi phiăn lơ̆m glăk hơmâo klin kơtang jing ngă 77 čô amăng plơi djơ̆ klin:

“Lơ̆m hơmâo mơnuih djai lĕ ană plơi nao mơyut yơh, gơñu hơmâo čeh tơpai lĕ djă ba pơ sang pô djai; bui mơnŭ lĕ kơnung djuai prăp lui, tui hluai kơ sang anŏ hơmâo mơn. Juăt ñu lĕ mơnŭ, bui; dŏ ƀong huă hrŏm, mơñum tơpai hrŏm. Pơphun mơng 2 truh 3 hrơi, hrơi tal 4 kah mơng abih, ngă sat kơ tơlơi suaih pral, rơngiă prăk lu biă. Ră anai ăt dŏ ngă tui anun mơn, aka ƀu thâo lui ôh”.

Lu plơi pla djuai ƀiă ƀơi tơring glông Đăk Đoa, Gia Lai glăk pơgăn hĭ či hyu ĕp, kah đuăi mơnuih dŏ jê̆ giăm hăng F0, F1 tơbiă mơng plơi pla.

Ră anai, ƀơi Gia Lai hơmâo năng ai 1000 boh plơi pla djuai ania ƀiă dŏ mơng đưm sô laih ƀơi 17 boh tơring glông, plơi prong. Hăng djŏp djuai ania ƀiă kual Dap Kơdư, plơi pla jê̆ giăm nao rai biă, pơƀuh amăng djŏp bruă mă, tơlơi ngui ngor. Samơ̆ amăng mông hơmâo klin Covid-19 glăk kơtang tui anai, anai jing tơlơi tơnap kơ bruă pơgang klin mơng tơring čar.

Ơi Lê Văn Quang - Khua Jơnum min mơnuih ƀon sang phường Hoa Lư, plơi prong Pleiku brơi thâo, kiăng pơsir kơ tơlơi anai, kiăng abih bang anom bruă gum ngă, biă ñu lĕ khŏm pơtrut tui tơlơi gơgrong bruă mơng ƀing arăng đăo gơnang amăng plơi pla, hyu pơtô pơblang kiăng mơnuih ƀon sang gum djru ha pran jua, kiăo tui tơlơi pơtrun pơgang klin.

“Amăng hrơi pơgăn plơi pla, kŏm tơbiă hyu, amăng plơi Ốp hơmâo mơnuih djai. Gơmơi hơmâo nao pơtô lăi kiăng sang anŏ pô djai thâo laih: ƀu dưi pơphun pơ sang ôh. Tơdơi kơ sang anŏ tŭ ư, arăng klơi lui luh, ba mơnuih djai glăi dor hlao mơtăm, ƀu dưi pơƀut lu mơnuih ôh, hŭi arăng nao mơyut jôk lu”.

Nguyễn Thảo: Čih - Siu H’Mai: Pơblang